.jpg)
លោកហ៊ុន ម៉ាណែត(ស្តាំ)អគ្គមេបញ្ជាការរងនៃកងយោធពលខេមរភូមិន្ទ និជាមេបញ្ជាការកងទ័ពជើងគោក ក្នុងជំនួបជាមួយមេបញ្ជាការកងទ័ពជើងគោកថៃ នាថ្ងៃទី៣ កុម្ភៈ។ រូបថត Hun Manet's page
ភ្នំពេញៈ មេបញ្ជាការកងទ័ពជើងគោក កម្ពុជា-ថៃ ចុះហត្ថលេខារួមគ្នាលើលក្ខខណ្ឌស្តីពីកិច្ចសហប្រតិបត្តិការ រវាងកងទ័ពជើងគោកនៃប្រទេសទាំង២ និងប្តេជ្ញាខិតខំរួមចំណែកក្នុងការកសាង និងពង្រឹងតំបន់ព្រំដែនមិត្តភាព សន្តិភាព ដោយឈរលើស្មារតីអត់ធ្មត់ គោរពបូរណភាពទឹកដីទៅវិញទៅមក។
នាយឧត្តមសេនីយ៍ ណារ៉ុងផាន់ ជិតកែវធែ (Narongpan Jittkaewtae) មេបញ្ជាការកងទ័ពជើងគោកភូមិន្ទថៃ បានអញ្ជើញមកបំពេញទស្សនកិច្ចជាផ្លូវការរយៈពេល២ថ្ងៃ នៅកម្ពុជាជាលើកដំបូង ចាប់ពីថ្ងៃទី៣-៤ ខែកុម្ភៈនេះ។ ក្នុងអំឡុងពេលនៃដំណើរទស្សនកិច្ចនេះ នៅថ្ងៃទី៣ ខែកុម្ភៈ លោកណារ៉ុងផាន់ ជិតកែវធែ បានដឹកនាំគណៈប្រតិភូជាន់ខ្ពស់នៃកងទ័ពជើងគោកភូមិន្ទថៃ ចូលជួបពិភាក្សាការងារទ្វេភាគីជាមួយ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក នៅបញ្ជាការដ្ឋានកងទ័ពជើងគោក។
នាយកដ្ឋានព័ត៌មានក្រសួងការពារជាតិ បានឱ្យដឹងថា ជាលទ្ធផលនៃជំនួបពិភាក្សាទ្វេភាគីនេះ មេបញ្ជាការកងទ័ពជើងគោក កម្ពុជា-ថៃ បានសម្រេចចុះហត្ថលេខារួមគ្នាលើ “លក្ខខណ្ឌស្តីពីកិច្ចសហប្រតិបត្តិការ” រវាងកងទ័ពជើងគោកនៃកងយោធពលខេមរភូមិន្ទ និងកងទ័ពជើងគោកភូមិន្ទថៃ ក្នុងគោលបំណង ដើម្បីពង្រឹងនិងពង្រីកនូវទំនាក់ទំនងមិត្តភាព និងកិច្ចសហប្រតិបត្តិការទ្វេភាគី ព្រមទាំងការជំរុញឱ្យមានកិច្ចពិភាក្សាដោយបើកចំហលើប្រធានបទដែលផ្តល់ផលប្រយោជន៍រួម។
កិច្ចសហការនេះជាមូលដ្ឋានមួយដ៏សំខាន់ក្នុងការត្រួសត្រាយផ្លូវដើម្បីឈានទៅលើកកម្ពស់កិច្ចសហប្រតិបត្តិការលើគ្រប់វិស័យ ក្នុងក្របខ័ណ្ឌកងទ័ពជើងគោក នៃប្រទេសទាំង២កម្ពុជា-ថៃ ឱ្យមានកម្រិតកាន់តែខ្ពស់ឡើងបន្ថែមទៀត។ ព្រឹត្តិការណ៍នេះ អាចចាត់ទុកថា ជាការបើកទំព័រប្រវត្តិសាស្ត្រថ្មីមួយទៀត នៃកិច្ចទំនាក់ទំនង រវាងកងទ័ពជើងគោកទាំង២ផងដែរ។
ភាគីទាំង២ ក៏បានធ្វើការវាយតម្លៃខ្ពស់ចំពោះកិច្ចសហប្រតិបត្តិការយោធា កម្ពុជា-ថៃ ដែលបានដំណើរការបោះជំហានរីកចម្រើនទៅមុខនិងសម្រេចបានលទ្ធផលផ្លែផ្កាជាច្រើនទាំងក្នុងក្របខ័ណ្ឌ និងក្នុងកម្រិតកងទ័ពជើងគោក ជាអាទិ៍ ការអប់រំបណ្តុះបណ្តាលធនធានមនុស្ស ការអនុវត្តលំហាត់ហ្វឹកហ្វឺន ក៏ដូចជាការរក្សាបានទំនាក់ទំនងចំណុះកងទ័ពជើងគោកទាំង២ ដែលនៅឈរជើងនៅតាមបណ្តោយព្រំដែន ក្នុងការថែរក្សាសន្តិភាព សន្តិសុខ និងការទប់ស្កាត់បង្ក្រាបបទល្មើសឆ្លងដែននានា។
ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា លោក គិន ភា ថ្លែងថា ជារឿងល្អ ក្នុងក្របខ័ណ្ឌនៃកិច្ចសហការ រវាងកងទ័ពប្រទេស២ដែលមានព្រំដែនជាប់គ្នា គឺជារឿងមួយដែលចាំបាច់ ពីព្រោះដើម្បីរក្សាសន្តិសុខ ភាពស្ងប់សុខ រវាងប្រទេសទាំង២។ កិច្ចសហការកងទ័ពនេះទាមទារឱ្យមានភាពស្មោះត្រង់ចំពោះគ្នា និងការចែករំលែកព័ត៌មាន រវាងគ្នា គឺជារឿងសំខាន់។ ព្រោះជាទូទៅ កម្ពុជាមានចិត្តស្មោះត្រង់ មិនថាជាមួយថៃឬជាមួយប្រទេសណាទេ។
លោកថ្លែងថា៖«ប៉ុន្តែអ្នកជិតខាងយើងមួយចំនួនអត់សូវមានភាពស្មោះត្រង់។ ជួនកាលគាត់ធ្វើអីមួយ ដោយអត់មានការជូនដំណឹង ហើយរំលោភអធិបតេយ្យភាពដូចការបញ្ជូនទ័ពឈុតខ្មៅ ដោយអត់មានការផ្តល់ព័ត៌មាន អត់មានហេតុផលសមរម្យ។ ជួនកាលគាត់បង្ហោះយន្តហោះ ឧទ្ធម្ភាគចក្រចូលជ្រុលមកព្រំដែនកម្ពុជាយើង។ អ៊ីចឹងភាពស្មោះត្រង់ ការគោរពធិបតេយ្យ បូរណភាពទឹកដីគ្នាទៅវិញទៅមក គឺជារឿងសំខាន់ដែលកងទ័ពទាំង២ត្រូវធ្វើ និងគោរពគ្នា»។
ទន្ទឹមគ្នានេះកងទ័ពជើងគោកនៃប្រទេសទាំង២ បានប្តេជ្ញាខិតខំចូលរួមចំណែកក្នុងការកសាង និងពង្រឹងតំបន់ព្រំដែនមិត្តភាព សន្តិភាព សហប្រតិបត្តិការ និងការអភិវឌ្ឍ ដោយឈរលើស្មារតីអត់ធ្មត់ និងសម្របសម្រួលដោះស្រាយបញ្ហាតាមយន្តការគ្រប់កម្រិត ក្នុងគោលការណ៍គោរពឯករាជ្យ អធិបតេយ្យ និងបូរណភាពទឹកដីទៅវិញទៅមក។
ភាគីទាំង២បានបញ្ជាក់ថា សន្តិភាព សន្តិសុខ និងស្ថិរភាពនៅតាមបណ្តោយព្រំដែន គឺពិតជាបានបង្កនូវលក្ខណៈអំណោយផលដល់ការដោះដូរពាណិជ្ជកម្មឆ្លងដែន ដែលជាការចូលរួមចំណែកយ៉ាងសំខាន់ ក្នុងការបង្កើតឱកាសការងារ និងការលើកកម្ពស់ជីវភាពរបស់ប្រជាជននៃប្រទេសទាំង២។
ក្នុងដំណើរទស្សនកិច្ចនេះ លោកណារ៉ុងផាន់ ជិតកែវធែ ក៏បានចូលជួបសម្ដែងការគួរសមជាមួយលោក ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដើម្បីពិភាក្សាការងារផងដែរ៕
