.jpg)
ប្រព័ន្ធធារាសាស្ត្របែបទំនើបនៅស្រុកស្រីសន្ធរ ខេត្តកំពង់ចាម។ រូបថត BTV
ភ្នំពេញៈ ក្រសួងធនធានទឹក និងឧតុនិយម កំពុងអភិវឌ្ឍប្រឡាយព្រែកពោធិ៍ ដែលត្រូវចំណាយថវិកាប្រមាណ ៣០លានដុល្លារជាប្រព័ន្ធធារាសាស្ត្របែបទំនើបកម្ម ក្នុងភូមិសាស្ត្រស្រុកស្រីសន្ធរ ដែលនឹងអាចឱ្យកសិករក្នុងឃុំចំនួន៧ ទាញទឹកពីប្រឡាយនេះយកទៅស្រោចស្រពដំណាំស្រូវទាំងដូវប្រាំងនិងរដូវវស្សា លើផ្ទៃស្រែប្រមាណជិត១ម៉ឺនហិកតា។ នេះបើតាមលោក អ៊ុម វិបុល ប្រធានមន្ទីរធនធាទឹកខេត្តកំពង់ចាម។
លោកអ៊ុម វិបុល ថ្លែងក្នុងសន្និសីទសារព័ត៌មានស្តីពីវឌ្ឍនភាពមូលដ្ឋានឃុំសង្កាត់ និងលើកទិសដៅបន្តរបស់ខេត្តកំពង់ចាម នាថ្ងៃទី២ មករា នៅទីស្ដីការគណៈរដ្ឋមន្ត្រី ថា កន្លងមក ស្រុកស្រីសន្ធរ ធ្លាប់មានស្ថានីយបូមទឹកជាអំណោយរបស់លោកនាយករដ្ឋមន្រ្ដីហ៊ុន សែន។ មានស្ថានីយទី៣០-៣១-៣២ និង៣៣ ដែលបូមទឹកពីទន្លេមេគង្គ ដោយប្រើប្រាស់ម៉ាស៊ីនបណ្ដែតបូមទម្លាក់ទៅប្រឡាយមេ និងបូមបន្តទៀតនាំទឹកចែកជូនប្រជាពលរដ្ឋខ្វះខាតទឹកស្រោចស្រពដំណាំកសិកម្ម។
លោកថ្លែងថា៖«ដើម្បីបង្កភាពងាយស្រួលក្នុងការនាំទឹកយកទៅផ្គត់ផ្គង់ដំណាំស្រូវរបស់ពលរដ្ឋទៀតនោះ ក្រសួងធនធានទឹកបានអភិវឌ្ឍប្រព័ន្ធធារាសាស្ត្រព្រែកពោធិ៍ ដែលជាស្ថានីយបូមទឹកដោយស្វ័យប្រវត្តិ អាចជួយស្រោចស្រពដំណាំស្រូវនៅរដូវវស្សាបានជាង៨ ៥០០ហិកតា និងនៅរដូវប្រាំងបានជាង៨៥០០ហិកតាដូចគ្នា»។
បើតាមលោកវិបុល នៅខេត្តកំពង់ចាម បច្ចុប្បន្ន មានប្រព័ន្ធធារាសាស្រ្តចំនួន ២៦១កន្លែង ក្នុងនោះមានខ្នាតធំ ១កន្លែង ខ្នាតមធ្យម ចំនួន៧៤កន្លែង និងខ្នាតតូច ចំនួន១៨១កន្លែង ។ ប្រព័ន្ធធារាសាស្រ្ដខ្នាតធំសំដៅដល់ប្រព័ន្ធធារាសាស្រ្ដដែលអាចស្រោចស្រពដំណាំបានចំនួន ៥ពាន់ហិកតា។ ខ្នាតមធ្យមសំដៅដល់ប្រព័ន្ធធារាសាស្រ្ដដែលអាចស្រោចស្រពចាប់ពី ៥០០ហិកតាឡើងទៅ និងខ្នាតតូចអាចស្រោចស្រពចាប់ពី២០០ ដល់៥០០ហិកតា។
លោកបញ្ជាក់ថា៖«ក្នុងខេត្ដកំពង់ចាម ពីមុនមកមិនដែលមានប្រព័ន្ធស្រោចស្រពបែបទំនើបកម្មនៅឡើយទេ។ ប៉ុន្តែថ្មីៗនេះ ឯកឧត្ដម លឹម គានហោ រដ្ឋមន្រ្ដីក្រសួងធនធានទឹក និងឧតុនិយម បានខិតខំស្វែងរកថវិកា ដើម្បីអភិវឌ្ឍប្រឡាយព្រែកពោធិ៍ដែលជាប្រព័ន្ធធារាសាស្ត្របែបទំនើបកម្ម នៅក្នុងភូមិសាស្ត្រស្រុកស្រីសន្ធរនេះ»។
លោកខ្លូត ផន ប្រធានក្រុមប្រឹក្សាខេត្តកំពង់ចាម បានឱ្យដឹងក្នុងសន្និសីទនេះដែរថា ខេត្តកំពង់ចាម ចែកចេញជា ក្រុង១ ស្រុក៩ សង្កាត់៤ និង១០៥ឃុំ ស្មើនឹង ៩១៦ភូមិ។ ខេត្ដនេះ មានប្រជាពលរដ្ឋរស់នៅជាង ១.១លាននាក់ ស្រីជាង ៥៧ ម៉ឺននាក់ ស្មើនឹង២៨៤ ៣៨៩គ្រួសារ។
លោកបានឱ្យដឹងថា សក្តានុពលខេត្តកំពង់ចាម ពឹងផ្អែកលើវិស័យកសិកម្មជាចម្បងចំនួន ៦៤,២០% ឧស្សាហកម្ម និងសិប្បកម្ម០,៦៧% និងរបរសេវាកម្ម ៣៥,១៣% និង GDP របស់មនុស្សម្នាក់ៗទទួលបាន ១,៦៧៩ដុល្លារអាមេរិក ធ្វើឱ្យអត្រាភាពក្រីក្រថយចុះមកត្រឹម១៣,២% នៅឆ្នាំ២០២១។
លោកថ្លែងថា កសិករនៅខេត្តកំពង់ចាមដែលធ្វើស្រែប្រាំង គឺពឹងផ្អែកលើប្រព័ន្ធធារាសាស្ត្រ។ ក្នុងឆ្នាំនេះ ប្រជាពលរដ្ឋបានធ្វើស្រែប្រាំងមុនរដូវ ដូចនេះ មិនមានបញ្ហាខ្វះទឹកឡើយ។ មន្ទីរកសិកម្មខេត្ត បានណែនាំឱ្យប្រជាពលរដ្ឋធ្វើស្រូវដែលមានរយៈពេលខ្លី និងសមស្របទៅនឹងប្រព័ន្ធទឹកដែលមាន។ ពលរដ្ឋទទួលបានទិន្នផលស្រូវជាមធ្យមក្នុង១ឆ្នាំគឺប្រមាណ៤តោន ទៅ ៥តោន ក្នុង១គ្រួសារ។
លោកខ្លូត ផន បញ្ជាក់ថា នៅខេត្តកំពង់ចាមទាំងមូលមាន២ឃុំ ដែលមិនទាន់មានទឹកស្អាតប្រើប្រាស់គ្រប់គ្រាន់ គឺឃុំទួលសំបួរ និងឃុំអូរម្លូ។ ព្រោះជាឃុំដែលនៅដាច់ស្រយាលប្រជាពលរដ្ឋមានទីលំនៅមិនប្រមូលផ្តុំគ្នា ពិបាកក្នុងការវិនិយោគតបណ្ដាញទឹកទៅដល់។
លោកថ្លែងថា៖«បញ្ហានេះ រដ្ឋបាលខេត្តបានកំពុងខិតខំជំរុញឱ្យក្រុមហ៊ុនដែលមានអាជ្ញាប័ណ្ណគ្រប់គ្រងទឹកស្អាត ពង្រីកបណ្ដាញចែកចាយទឹកស្អាតនេះ ទៅដល់ឃុំទាំង២ខាងលើ ឱ្យស្របទៅនឹងគោលនយោបាយរបស់រាជរដ្ឋាភិបាល គឺនៅឆ្នាំ២០២៥ នឹងមានប្រព័ន្ធទឹកប្រើប្រាស់១០០%»៕
