ភ្នំពេញៈ ក្រសួងអប់រំ យុវជន និងកីឡានៅថ្ងៃទី ២ ខែកុម្ភៈ ឆ្នាំ ២០២២ បានសម្រេចបិទបញ្ចប់ការធ្វើកោសល្យវិច័យលើលទ្ធផលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង ២៧ ធ្នូ ២០២១ បន្ទាប់ពីមានការប្ដឹងតវ៉ាពីបេក្ខជន មាតាបិតា និងអ្នកអាណាព្យាបាលសិស្សានុសិស្សពាក់ព័ន្ធការសង្ស័យលើលទ្ធផលនោះ។
សេចក្ដីប្រកាសព័ត៌មានរបស់ក្រសួងអប់រំកាលពីថ្ងៃទី ២ ខែកុម្ភៈ បានឱ្យដឹងថា គណៈកម្មការកោសល្យវិច័យបានរកឃើញថា លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិសម័យប្រឡង ២៧ ធ្នូ ២០២១ មិនមានការប្រែប្រួលទេ។
ក្រសួងបញ្ជាក់ថា៖ «ឈរលើមូលដ្ឋាននេះ ក្រសួងសូមប្រកាសបញ្ចប់ការទទួលពាក្យតវ៉ារបស់បេក្ខជន និងបញ្ចប់ដំណើរការពិនិត្យ និងដោះស្រាយ ការតវ៉ាចាប់ពីថ្ងៃចេញសេចក្តីប្រកាសព័ត៌មាននេះតទៅ»។
តាមរយៈសេចក្ដីប្រកាសក្រសួងអប់រំបានបញ្ជាក់ជូនដល់បេក្ខជន អ្នកអាណាព្យាបាល និងសាធារណជនទាំងអស់ថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៧ ធ្នូ ២០២១ បានប្រព្រឹត្តទៅដោយរលូនស្របតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបានស្របតាមលក្ខណៈបច្ចេកទេស ប្រឡង និងស្របតាមទស្សនាទាន «អ្នកចេះ គឺជាប់»។
ការប្រឡងនេះ ក្រោមការយកចិត្តទុកដាក់ពីប្រមុខរាជរដ្ឋាភិបាល និងកិច្ចសហការយ៉ាងជិតស្និទ្ធពីសំណាក់ក្រសួងមហាផ្ទៃ អង្គភាពប្រឆាំងអំពើពុករលួយ ក្រសួងសុខាភិបាល អាជ្ញាធរដែនដី កងកម្លាំង សហភាពសហព័ន្ធយុវជនកម្ពុជា អគ្គិសនីកម្ពុជា ក្រុមគ្រូពេទ្យស្ម័គ្រចិត្តយុវជនសម្តេចតេជោ និងគ្រប់ភាគីពាក់ព័ន្ធដទៃទៀត ជាពិសេស ការខិតខំប្រឹងប្រែងរៀនសូត្រផ្ទាល់របស់បេក្ខជន ព្រមទាំងការអនុវត្តភារកិច្ចប្រកបដោយភាពហ្មត់ចត់ វិជ្ជាជីវៈ មនសិការការងារ និងស្មារតីទទួលខុសត្រូវខ្ពស់របស់គណៈមេប្រយោគ និងគណៈកម្មការនានាគ្រប់ថ្នាក់។
យុវជនប្រឡងធ្លាក់បាក់ឌុបឆ្នាំនេះម្នាក់ឈ្មោះ សុខ ដានី លើកឡើងថា នេះឬលទ្ធផលក្រសួងថាទទួលយកបាន? មុខវិជ្ជាដែលរូបគេធ្វើបានល្អហើយផ្ទៀងចម្លើយពេលចេញពីប្រឡងត្រូវបែរជាប្រឡងធ្លាក់មុខវិជ្ជានោះទៅវិញ (ភូមិ F ប្រវត្តិ F)? យុវជនរូបនេះលើកឡើងថា «សម្រាប់មុខវិជ្ជាភាសាខ្មែរឧទាហរណ៍បាន ៣.៤ រឿងដែលលើកចំណុចចំៗមកបកស្រាយតែចេញលទ្ធផលមកធ្លាក់ (F) សីលធម៌ធ្វើបានតិចណាស់គ្មានសង្ឃឹមបែរជាជាប់ក្នុងការប្រឡងទៅវិញ។
យុវជនរូបនេះថា៖ «ពិន្ទុខ្ញុំអាចនឹងរាលទៅដល់សិស្សម្នាក់អង្គុយក្រោយខ្ញុំក៏ថា បាន ពិន្ទុមុខវិជ្ជាដែលខ្ញុំរំពឹងថាជាប់ទៅជាធ្លាក់ ហើយអ្នកអង្គុយក្បែរខ្ញុំបែរជាជាប់ ដែលភាគច្រើនសុទ្ធតែមុខវិជ្ជា ដែលខ្ញុំសង្ឃឹមថាជាប់។ មិនមែនមើលងាយសមត្ថភាពគេទេតែម្នាក់ហ្នឹងមិនចេះមែន ហើយក៏ធ្វើចម្លើយបានតិចតួចដែរ ពេលប្រឡង គឺហៅខ្ញុំ កេះសួរខ្ញុំរហូត»។
ដានី បញ្ជាក់ថា ក្រសួងអាចនឹងសុក្រឹតក្នុងការប្រឡងហើយ ប៉ុន្ដែអ្នកកែអាចកែដោយរបៀបណាវិញ ឬគ្រាន់តែកាន់ប៊ិកឆូត? ពិនិត្យ និងផ្ទៀងផ្ទាត់ចម្លើយឱ្យច្បាស់ៗបន្ដិចបានទេ?
យុវជនប្រឡងធ្លាក់ម្នាក់ទៀតឈ្មោះ ឌី ស្ស៊ី បានលើកឡើងថា បើសិនជាអាចរូបគេសឹងតែស្នើក្រសួងប្រឡងម្ដងទៀតតែម្ដងទើបអស់ចិត្តលើលទ្ធផលនៃការប្រឡងឆ្នាំនេះ។ «ធ្វើផ្ទាល់ កែផ្ទាល់ និយាយឱ្យត្រង់ទៅលំហាត់ក្រសួងស្រួលទេ ហេតុអ្វីធ្វើបានហើយ ពេលចេញពីប្រឡង មើលកំណែឃើញថា ត្រូវឡើង ៨៥% ទៅ ៨៩%។ ខ្ញុំសង្ឃឹមថាខ្ញុំជាប់បាននិទ្ទេសល្អទៀតផង។ អ្នកមិនសង្ឃឹមបែរជាជាប់ទៅវិញ។
បើតាមក្រសួងអប់រំ ដើម្បីឆ្លើយតបចំពោះសំណូមពរ និងការតវ៉ារបស់បេក្ខជនចំពោះលទ្ធផលនៃការប្រឡង ក្រសួងអប់រំបានបង្កើត «គណៈកម្មការកោសល្យវិច័យ» ដើម្បីពិនិត្យ និងដោះស្រាយធ្វើយ៉ាងណាឱ្យបេក្ខជន មាតាបិតា អ្នកអាណាព្យាបាល និងសាធារណជនជឿទុកចិត្តចំពោះលទ្ធផលប្រឡង។
ក្រសួងបញ្ជាក់ថា៖ «ក្រោយពីបានបញ្ចប់ការធ្វើកោសល្យវិច័យ គណៈកម្មការកោសល្យវិច័យបានរកឃើញថា លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៧ ធ្នូ ២០២១ មិនមានការប្រែប្រួលទេ។ ឈរលើមូលដ្ឋាននេះ ក្រសួងសូមប្រកាសបញ្ចប់ការទទួលពាក្យតវ៉ារបស់បេក្ខជន និងបញ្ចប់ដំណើរការពិនិត្យ និងដោះស្រាយការតវ៉ាចាប់ពីថ្ងៃចេញសេចក្តីប្រកាសព័ត៌មាននេះតទៅ»។
ក្រសួងបន្តថា៖ «ចំពោះសិស្សប្រឡងធ្លាក់ ក្រសួងសូមលើកទឹកចិត្តឱ្យខិតខំរៀនសូត្របន្ត ដោយមានការជួយគាំទ្រពីសំណាក់ លោកគ្រូ អ្នកគ្រូ មាតាបិតា អ្នកអាណាព្យាបាល និងសហគមន៍ ដើម្បីទទួលបានជោគជ័យក្នុងការប្រឡងនៅឆ្នាំខាងមុខ»៕
វីដេអូ៖