The Phnom Penh Post Search

Search form




Logo of Phnom Penh Post newspaper Phnom Penh Post - លោក ​ស៊ុន ចាន់ថុល ជជែក​ជាមួយ UNDP ពី​ការប្រើ​រថយន្ត​ដើរ​ដោយ​ចរន្តអគ្គិសនី

លោក ​ស៊ុន ចាន់ថុល ជជែក​ជាមួយ UNDP ពី​ការប្រើ​រថយន្ត​ដើរ​ដោយ​ចរន្តអគ្គិសនី

Content image - Phnom Penh Post
លោក​ ស៊ុន ចាន់ថុល ក្នុងជំនួប​ជាមួយ​តំណាង UNDP ពីថ្ងៃ​ទី​ ២ ​កុម្ភៈ​។ រូប ក្រសួង​សាធារណការ

លោក ​ស៊ុន ចាន់ថុល ជជែក​ជាមួយ UNDP ពី​ការប្រើ​រថយន្ត​ដើរ​ដោយ​ចរន្តអគ្គិសនី

ភ្នំពេញៈ លោក​ ស៊ុន ចាន់ថុល រដ្ឋមន្ត្រី​ក្រសួង​សាធារណការ និង​ដឹកជញ្ជូន​បាន​លើកយក​សេចក្តីព្រាង​គោលនយោបាយ​ដឹកជញ្ជូន​ផ្លូវគោក​ដែលមាន​ការគិតគូរ​អំពី​ការអភិវឌ្ឍ​ហេដ្ឋារចនាសម្ព័ន្ធ​សម្រាប់​គាំទ្រ​ដល់​ការប្រើប្រាស់​រថយន្ត​ដើរ​ដោយ​ថាមពល​អគ្គិសនី​ទៅ​ជជែក​ជាមួយ​អង្គការ​អភិវឌ្ឍន៍​សហប្រជាជាតិ (UNDP)​។

កាលពី​ថ្ងៃទី​ ២ ខែកុម្ភៈ ឆ្នាំ​ ២០២២ លោក ស៊ុន ចាន់ថុល បាន​ជួប​ជជែក​អំពី​ការរៀបចំ​សេចក្តីព្រាង​គោលនយោបាយ​ដឹកជញ្ជូន​ផ្លូវគោក​កាលដែល​គិតពី​ការអភិវឌ្ឍ​ហេដ្ឋារចនាសម្ព័ន្ធ​សម្រាប់​គាំទ្រ​ដល់​ការប្រើប្រាស់​រថយន្ត​ដើរ​ដោយ​ថាមពល​អគ្គិសនី​នេះ​ក្នុង​ជំនួប​សម្តែង​ការគួរសម និង​ពិភាក្សា​ការងារ​ជាមួយ​គណៈប្រតិភូ​កម្មវិធី​អភិវឌ្ឍន៍​សហប្រជាជាតិ (UNDP)​ប្រចាំ​នៅ​កម្ពុជា​។ នៅក្នុង​ជំនួប​នោះ លោក ស៊ុន ចាន់ថុល បាន​ថ្លែងថា​ក្រសួង​កំពុង​រៀបចំ​សេចក្តីព្រាង​គោលនយោបាយ​ដឹកជញ្ជូន ផ្លូវគោក​ដែលមាន​ការគិតគូរ​អំពី​ការអភិវឌ្ឍ​ហេដ្ឋារចនាសម្ព័ន្ធ​សម្រាប់​គាំទ្រ​ដល់​ការប្រើប្រាស់​រថយន្ត​ដើរ​ដោយ​ថាមពល​អគ្គិសនី ដើម្បី​កាត់បន្ថយ​ផលប៉ះពាល់​អវិជ្ជមាន​ពី​ការបញ្ចេញ​ឧស្ម័ន​កាបូន​ទៅក្នុង​បរិយាកាស​។

លោក​បន្តថា សេចក្តី​ព្រាងច្បាប់​នេះ​ក៏​ជា​ផ្នែក​មួយ​របស់​គម្រោង​កិច្ចសហប្រតិបត្តិការ​រវាង​ក្រសួង​សាធារណការ និង​ដឹកជញ្ជូន​ជាមួយ​កម្មវិធី​អភិវឌ្ឍន៍​សហប្រជាជាតិ ​(UNDP) ដើម្បី​ដំឡើង​ស្ថានីយ​សាកថ្ម​រថយន្ត​ដើរ​ដោយ​ថាមពល​អគ្គិសនី (EVs)​។

ជាមួយ​គ្នា​នោះ លោក​បានបញ្ជាក់​ថា​៖ «​គម្រោង​នេះ ក៏​សហការ​ជាមួយ​អគ្គនាយកដ្ឋាន​គយ និង​ពន្ធដារ ដើម្បី​រៀបចំ​ជា​ផែនការ​សម្រាប់​ការ​នាំចូល​រថយន្ត​ចាស់ៗ ដែលមាន​អាយុ​ ១០ ​ឆ្នាំ និង​គម្រោង​ជួបពិភាក្សា​ជាមួយនឹង​ស្ថានីយ​ប្រេងឥន្ធនៈ​ទាក់ទង​នឹង​ការដំឡើង​ស្ថានីយ​សាក​ថ្ម​រថយន្ត EVs ដែល​ក្នុងនោះ​រួមមាន​ស្ថានីយ​សាំង​តូតាល់ កាល់តិច សូគីមិច និង​តេលា​ជាដើម​»​។

បន្ថែម​ពីនេះ​លោក​បាន​ណែនាំ​ឱ្យ​អគ្គនាយកដ្ឋាន​ដឹកជញ្ជូន​ផ្លូវគោក​នៃ​ក្រសួង​សាធារណការ​រៀបចំ​ផែនទី​បង្ហាញផ្លូវ​គ្រប់​ជ្រុងជ្រោយ​ទាក់ទង​នឹង​ការអភិវឌ្ឍ​ហេដ្ឋារចនាសម្ព័ន្ធ​គាំទ្រ​ការប្រើប្រាស់​យានយន្ត​ដើរ​ដោយ​ថាមពល​អគ្គិសនី និង​ពិភាក្សា​ជាមួយ​សេវា​ដឹកជញ្ជូន​ម្ហូបអាហារ​ដូចជា Food Panda និង NHA-M24 ដើម្បី​ពិនិត្យ​លទ្ធភាព​លើ​ការប្រើប្រាស់​ម៉ូតូ​ដើរ​ដោយ​ថាមពល​អគ្គិសនី ជំនួស​ម៉ូតូ​ដែល​ប្រើ​សាំង​ក្នុង​ការបម្រើ​សេវា​របស់​ខ្លួន​សំដៅ​ឆ្លើយតប​ទៅនឹង​គម្រោង​ផែនការ និង​គោលនយោបាយ​ដឹកជញ្ជូន​ផ្លូវគោក​ប្រកបដោយ​ចីរភាព​ផងដែរ​។

លោកស្រី Alissar Chaker តំណាង អង្គការ​អភិវឌ្ឍន៍​សហប្រជាជាតិ (UNDP) បាន​ថ្លែងថា និន្នាការ​ពិភពលោក​ឆ្ពោះទៅរក​ការប្រើប្រាស់​រថយន្ត​ដើរ​ដោយ​ថាមពល​អគ្គិសនី ដើម្បី​ធានាបាន​នូវ​ការអភិវឌ្ឍ​ប្រកប​ដោយ​ចីរភាព និង​បម្រែបម្រួល​អាកាសធាតុ​។ គម្រោង​កំពុង​អនុវត្ត​ទាក់ទង​នឹង​ការដឹកជញ្ជូន​ប្រកបដោយ​ចីរភាព គឺជា​ផ្នែក​មួយ​នៃ​គោលដៅ​អភិវឌ្ឍន៍​ប្រកបដោយ​ចីរភាព​ក្នុងការ​ធានាបាន​នូវ​ការរស់នៅ​ប្រកបដោយ​បរិស្ថាន​ល្អ​។

លោកស្រី បានស្នើ​យោបល់​ឱ្យ​ក្រសួង​សហការ​ឱ្យបាន​ជិតស្និទ្ធ​ជាមួយ​ដៃគូ​អភិវឌ្ឍន៍ ក៏ដូចជា​វិស័យ​ឯកជន​ដើម្បី​អភិវឌ្ឍ​ហេដ្ឋារចនាសម្ព័ន្ធ​ទ្រទ្រង់​រថយន្ត​ដើរ​ដោយ​ថាមពល​អគ្គិសនី និង​ជំរុញឱ្យមាន​ការចូលរួម​ពី​ក្រសួង​ស្ថាប័ន​ពាក់ព័ន្ធ​លើ​បញ្ហា​នេះ​។

កន្លងទៅ លោក ​ស៊ុន ចាន់ថុល ធ្លាប់បាន​លើកឡើងថា កិច្ចសហការ​រវាង​ក្រសួង​សាធារណការ និង​អង្គការ UNDP នឹងមាន​ការដំឡើង​ស្ថានីយ​សាកថ្ម Evs ចំនួន​ ៥​ ទីតាំង គឺ​នៅ​ទីស្តីការក្រសួង​សាធារណការ និង​បណ្តា​រាជធានី​-​ខេត្ត​មួយ​ចំនួន​។ ក្នុង​គម្រោង​នេះ ក្រសួង​ក៏មាន​ផែនការ​ដំឡើង​ស្ថានីយ​សាកថ្ម EV នៅតាម​ផ្លូវ​ល្បឿន​លឿន​ភ្នំពេញ​ក្រុងព្រះសីហនុ ដោយ​គ្រោង​ដាក់ឱ្យ​ប្រើប្រាស់​ក្នុង​ខែកញ្ញា ឆ្នាំ​ ២០២២ ដែល​ការដំឡើង​នេះ គឺ​សហការ​ជាមួយ​ស្ថានីយប្រេងឥន្ធនៈ PTT ។

យោងតាម​ការសិក្សា​ថ្មីៗ​ចុងក្រោយ​ដោយ​ក្រុម​អ្នកជំនាញ​នៅឯ​សាកលវិទ្យាល័យ​ក្នុងប្រទេស​ន័រវែស និង​ការសិក្សា​របស់​អ្នកជំនាញ​មកពី​វិទ្យាស្ថាន​បច្ចេកវិទ្យា MIT របស់​សហរដ្ឋអាមេរិក​បាន​រកឃើញថា រថយន្ត​អគ្គិសនី​បញ្ចេញ​ឧស្ម័ន​កាបូនិក​តិចជាង​រថយន្ត​ធម្មតា ដោយ​ខ្លះ​អាចជួយ​កាត់បន្ថយ​ការបញ្ចេញ​ឧស្ម័ន​កាបូ​និក​រហូតដល់​ទៅ​ប្រមាណ ៥០ ​ភាគរយ ខណៈ​ខ្លះទៀត​ជួយ​កាត់បន្ថយ​ដល់​ ៨០ ​ភាគរយ​អាស្រ័យ​ទៅតាម​ម៉ូដែល និង​ទៅតាម​បច្ចេកវិទ្យា​ដែល​គេ​យកមក​ប្រើប្រាស់​៕

អត្ថបទគួរចាប់អារម្មណ៍