ភ្នំពេញៈ ធនាគា ADB បង្ហាញរបាយការណ៍ពីអនាគតនៃការដឹកជញ្ជូននៅទូទាំងអាស៊ី និងតំបន់ប៉ាស៊ីហ្វិក ដែលទាមទារឱ្យប្រទេសក្នុងតំបន់ទាំងនោះគិតគូរវែងឆ្ងាយពីទស្សនវិស័យ និងនិន្នាការក្នុងការរៀបចំផែនការ និងការសាងសង់ផ្លូវឱ្យស្របតាមការរីកចម្រើន និងការចង់បានរបស់ខ្លួនក្នុងថ្ងៃអនាគត។
របាយការណ៍នេះត្រូវបាន ADB ចេញផ្សាយពីខែមករាឆ្នាំនេះ ដោយបានកំណត់ពីនិន្នាការ គោលការណ៍ និងយុទ្ធសាស្ត្រសម្រាប់វិស័យដឹកជញ្ជូននាពេលអនាគតនៅអាស៊ី និងប៉ាស៊ីហ្វិកពាក់ព័ន្ធនឹងការដឹកជញ្ជូនដល់ឆ្នាំ ២០៣០ និងឆ្នាំ ២០៥០ ខាងមុខ។
របាយការណ៍នេះសរសេរថា ការដឹកជញ្ជូនមានសារៈសំខាន់ចំពោះសង្គម សេដ្ឋកិច្ច និងការអភិវឌ្ឍទូទាំងអាស៊ី និងប៉ាស៊ីហ្វិកដែលវាបង្កើតឱកាសសម្រាប់ការលូតលាស់ បង្កើតការងារ និងសម្រួលពាណិជ្ជកម្ម។ ទោះយ៉ាងណា ការរចនា និងការសាងសង់នៃការផ្តល់សេវាដឹកជញ្ជូននេះត្រូវបានរំពឹងទុកកាន់តែស្មុគស្មាញក្នុងទសវត្សរ៍ខាងមុខ។
របាយការណ៍នេះ បានសរសេរទៀតថា ការផ្លាស់ប្តូរសង្គម និងបច្ចេកវិទ្យានាប៉ុន្មានឆ្នាំចុងក្រោយនេះបានផ្លាស់ប្តូរយ៉ាងខ្លាំងនូវរបៀបដែលប្រព័ន្ធដឹកជញ្ជូនត្រូវបានប្រើប្រាស់ ហើយខ្លះទៀតប្រហែលជាលែងបំពេញតម្រូវការទៀតហើយ។
បន្ថែមពីនេះ មេរោគកូវីដ ១៩ និងផលប៉ះពាល់របស់វាលើការដឹកជញ្ជូននឹងនាំមកនូវបញ្ហាប្រឈមផ្នែកហិរញ្ញវត្ថុ ជាពិសេសលទ្ធភាពជោគជ័យនៃប្រព័ន្ធដឹកជញ្ជូន។ នេះបើតាមការប្រមើលមើលក្នុងរបាយការណ៍នេះ។
របាយការណ៍នេះបានណែនាំថា៖ «ការគិតអនាគតអាចជួយរៀបចំសង្គមរបស់យើងឱ្យឆ្លើយតបនឹងបញ្ហាប្រឈមនៅថ្ងៃស្អែក។
ដូច្នេះហើយ ធនាគារអភិវឌ្ឍន៍អាស៊ី (ADB) បានចាប់ផ្តើមអនុវត្ត "បច្ចេកទេសមើលឃើញជាមុន" ដើម្បីជួយរៀបចំផែនការក្នុងតំបន់»។ ADB និយាយថា គម្រោងដឹកជញ្ជូនគឺចាំបាច់ត្រូវការការរៀបចំឡើងទៅតាមការជាក់ស្តែងសម្រាប់ថ្ងៃអនាគត ដោយមិនមែនសម្រាប់ថ្ងៃនេះនោះទេ។
លោក គង់ វិមាន អនុរដ្ឋលេខាធិការ និងជាអ្នកនាំពាក្យក្រសួងសាធារណការ និងដឹកជញ្ជូនបានប្រាប់ភ្នំពេញប៉ុស្តិ៍នៅថ្ងៃទី ៣ កុម្ភៈថា លោកមិនទាន់បានទទួលរបាយការណ៍ ADB នេះទេ។ ជាមួយនឹងការអះអាងដូច្នេះ លោកថា ក្រសួងនឹងឆ្លើយតប ក្រោយពេលទទួលបានរបាយការណ៍នេះដើម្បីយកមកពិនិត្យ និងសិក្សាបន្ថែម។
លោកថា៖ «សុំអធ្យាស្រ័យ ខ្ញុំមិនទាន់ទទួលបានរបាយការណ៍នេះទេ ហើយក៏មិនទាន់បានឃើញខ្លឹមសារទាំងមូលយ៉ាងណានោះដែរ។ អ៊ីចឹងទេ មិនដឹងថាយកអ្វីជាមូលដ្ឋានក្នុងការឆ្លើយតបនេះទេ។ ដូច្នេះខ្ញុំសុំមិនទាន់ឆ្លើយឥឡូវទេ»៕