ភ្នំពេញៈ គិតត្រឹមដើមឆ្នាំ ២០២២ នេះ អត្រាគ្របដណ្តប់អនាម័យនៃការបញ្ឈប់បន្ទោបង់ពាសវាលពាសកាល (ODF) ទូទាំងខេត្តស្វាយរៀងសម្រេចបាន ១០០ ភាគរយ តាមរយៈការញ្ជ្រាបការយល់ដឹង និងអប់រំលើកកម្ពស់អនាម័យនៅតាមជនបទ។
ក្នុងសន្និសីទសារព័ត៌មានស្តីពីវឌ្ឍនភាពមូលដ្ឋានឃុំ-សង្កាត់ និងទិសដៅការងារបន្តនៅខេត្តស្វាយរៀងនៅទីស្តីការគណៈរដ្ឋមន្ត្រីថ្ងៃទី ៣ ខែកុម្ភៈនេះ ប្រធានក្រុមប្រឹក្សាខេត្តលោក ជុំ ហាត ថ្លែងថា តាមរយៈការយកចិត្តទុកដាក់ពីក្រុមប្រឹក្សាខេត្តគណៈអភិបាលខេត្ត និងមន្ទីរអភិវឌ្ឍន៍ជនបទខេត្តបានអនុវត្តសកម្មភាពអប់រំលើកកម្ពស់អនាម័យជនបទ ប្រជាពលរដ្ឋបានយល់ដឹងពីសារៈសំខាន់នៃទម្លាប់អនាម័យល្អប្រចាំថ្ងៃ។
លោកបន្តថា ទម្លាប់នោះតាមរយៈការប្រតិបត្តិអនាម័យល្អ ៣ យ៉ាងគឺ បន្ទោបង់ក្នុងបង្គន់ ហូបទឹកស្អាត និងលាងដៃជាមួយសាប៊ូ ជាពិសេសចូលរួមអនុវត្តវិធានការ ៣ កុំ និង ៣ ការពាររបស់រាជរដ្ឋាភិបាល ដើម្បីទប់ស្កាត់ការឆ្លងរីករាលដាលជំងឺកូវីដ ១៩ ជាហេតុធ្វើឱ្យស្ថានភាពអនាម័យទូទាំងខេត្តស្វាយរៀង រីកចម្រើនបានល្អប្រសើរយ៉ាងឆាប់រហ័ស។
លោកបន្តថា៖ «មកដល់បច្ចុប្បន្ននេះអត្រាគ្របដណ្តប់អនាម័យការបញ្ឈប់បន្ទោបង់ពាសវាលពាសកាល (ODF) ទូទាំងខេត្តសម្រេចបាន ១០០ ភាគរយ»។
លោក ជុំ ហាត បានគូសបញ្ជាក់ថា កត្តាដែលនាំឱ្យការធ្វើការបញ្ឈប់បន្ទោបង់ពាសវាលពាសកាល ទទួលបានជោគជ័យ ១០០ ភាគរយ គឺមានកត្តាសំខាន់ៗចំនួន ៥ រួមមាន ១ មានការសហការល្អប្រសើររបស់ក្រុមការងារអនាម័យជនបទថ្នាក់ខេត្ត ក្រុង ស្រុក ក្នុងការផ្សព្វផ្សាយតាមខ្នងផ្ទះ។
២- ការធ្វើបច្ចុប្បន្នភាពផែនការជាប្រចាំ និងការលើកទឹកចិត្ត (ថវិកា និងសម្ភារ) ដល់អ្នកអនុវត្តផ្ទាល់ជាមួយប្រជាពលរដ្ឋក្នុងសហគមន៍។
៣- ការធ្វើបច្ចុប្បន្នភាពសៀវភៅទិន្នន័យអនាម័យ ការគូសលើផែនទីអនាម័យភូមិ (កំណើនបង្គន់ និងកន្លែងលាងសម្អាតដៃថ្មីៗ) និងការរកដំណោះស្រាយខ្នងផ្ទះដែលគ្មានបង្គន់។ ៤- ការផ្តល់សេវាកម្ម ការជំរុញ និងលើកទឹកចិត្តឱ្យសាងសង់ និងការស្វែងរកការគាំទ្រពីអង្គការដៃគូក្នុងការឧបត្ថម្ភធន។ លោកបន្តថា កត្តាទី ៥ គឺការពង្រឹងសមត្ថភាពដល់មន្ត្រីថ្នាក់ខេត្ត ក្រុង ស្រុក ឃុំ សង្កាត់ ក្នុងការចុះធ្វើការអប់រំ ផ្សព្វផ្សាយ និងកត់ត្រាសៀវភៅទិន្នន័យអនាម័យ។
អភិបាលរងខេត្តស្វាយរៀងលោក រស់ ផារិទ្ធ បានថ្លែងប្រាប់ភ្នំពេញប៉ុស្ដិ៍ថា លោកមានមោទនភាពចំពោះខេត្តរបស់លោកដែលអនុវត្តសម្រេចបាន ១០០ ភាគរយ ក្នុងការបញ្ឈប់ការបន្ទោបង់ពាសវាលពាសកាល។ ក្រសួងអភិវឌ្ឍន៍ជនបទក៏បានចេញវិញ្ញាបនបត្របញ្ជាក់ថាមិនមានការបន្ទោបង់ពាសវាលពាសកាលទៀតទេ។
លោកថា៖ «ពីដើមទម្លាប់ប្រជាជនបន្ទោបង់ពាសវាលពាសកាលនៅតាមគុម្ពព្រៃ តាមប្រឡាយទឹក ប៉ុន្តែឥឡូវអត់មានទៀតទេ»៕