ភ្នំពេញៈ អភិបាលខេត្តបាត់ដំបងណែនាំមន្ត្រីសិក្សាឱ្យបានហ្មតចត់អំពីប្រពៃណី ទំនៀមទម្លាប់ និងទម្រង់ដើម នៃការលាបពណ៌អគារបុរាណ រៀបសណ្តាប់ធ្នាប់តាមសួន តាមផ្សារ ផ្លូវសាធារណៈ និងរៀបចំអាហារសុវត្ថិភាពទទួលភ្ញៀវ ដើម្បីលើកកម្ពស់សណ្តាប់ធ្នាប់និងសោភណ្ឌភាពខេត្ត។
ក្នុងកិច្ចប្រជុំគណៈកម្មការរៀបចំសណ្តាប់ធ្នាប់សោភ័ណភាពក្រុងបាត់ដំបង កាលពីថ្ងៃទី ៤ ខែមករាថា លោក សុខ លូ អភិបាលនៃគណៈអភិបាលខេត្តបាត់ដំបង បានណែនាំឱ្យក្រុមការងារគណៈកម្មការរៀបចំសណ្ដាប់ធ្នាប់សោភ័ណភាពខេត្ត សិក្សាឱ្យបានហ្មត់ចត់ ជាពិសេសអំពីប្រពៃណី ទំនៀមទម្លាប់ និងទម្រង់ដើម ដូចជាការលាបពណ៌អគារបុរាណ ថាត្រូវរៀបចំលាបពណ៌អ្វីដែលជាទម្រង់ដើមនៃអគារ ដើម្បីឱ្យសណ្តាប់ធ្នាប់ក្នុងក្រុងកាន់តែប្រសើរ។
លោកថា៖«បើចង់ឱ្យមានការរៀបចំសណ្ដាប់ធ្នាប់ក្នុងក្រុងកាន់តែមានប្រសិទ្ធភាព និងឆាប់រហ័ស ទាមទារឱ្យមានការចូលរួមទាំងអស់គ្នា ទាំងក្រុមការងារ និងប្រជាពលរដ្ឋ ធ្វើយ៉ាងណាគឺសហការគ្នាទៅវិញទៅមកទើបដំណើរការនៃការរៀបចំបានយ៉ាងរលូន»។
លោកអភិបាលខេត្តបានលើកឡើងទៀតថា ម្ហូបអាហារខេត្តបាត់ដំបង ក៏ជាចំណុចមួយសម្រាប់ទាក់ទាញភ្ញៀវទេសចរផងដែរ ហេតុនេះ ម្ហូបអាហារនានាត្រូវប្រាកដថាមានអនាម័យខ្ពស់ គ្មានជាតិគីមី និងមិនប៉ះពាល់ដល់សុខភាព ព្រោះខេត្តបាត់ដំបង ក៏ជាខេត្តមួយមានភាពល្បីល្បាញខាងផ្នែកម្ហូបអាហារ ដូចនេះត្រូវតែរៀបចំម្ហូបអាហារដែលសុវត្ថិភាពដល់ភ្ញៀវទេសចរផងដែរ។
បន្ថែមលើនោះ លោក សុខ លូ បានណែនាំឱ្យក្រុមការងារត្រូវយកចិត្តទុកដាក់ឱ្យបានខ្ពស់ ក្នុងការរៀបចំចំណតរថយន្ត និងម៉ូតូនៅជុំវិញផ្សារណាត់ (ផ្សារធំបាត់ដំបង) ដែលបច្ចុប្បន្ននេះ មានភាពអនាធិបតេយ្យក្នុងការចតយានយន្តជុំវិញផ្សារគ្មានសណ្ដាប់ធ្នាប់ ធ្វើឱ្យជុំវិញផ្សារណាត់ មានភាពរញ៉េរញ៉ៃ ចង្អៀត ពិបាកក្នុងការធ្វើដំណើរ។ លោកថា ក្នុងនោះក៏ត្រូវរៀបចំបរិស្ថានជុំវិញសួនច្បារនានាក្នុងក្រុង ការលក់ដូររបស់អាជីវករដែលលក់នៅតាមផ្លូវសាធារណៈផងដែរ៕