សៀមរាបៈ ពលរដ្ឋនៅតំបន់អង្គរនាំគ្នាប្រារព្ធពិធីឡើងមាឃសុំសេចក្តីសុខ ដើម្បីរក្សាប្រពៃណីពីបុរាណកាលដែលបានបន្សល់ទុកពីដូនតាមកដល់បច្ចុប្បន្ន។ អ្នកភូមិជឿថាការធ្វើពិធីនេះ គឺនាំឱ្យកូនចៅសុខសប្បាយ ធ្វើស្រែចម្ការទទួលបានភោគផលច្រើន និងចៀសផុតពីជំងឺ។
ពលរដ្ឋនៅតំបន់អង្គរបានទៅជួបជុំគ្នានៅមុខប្រាសាទអង្គរវត្តកាលពីថ្ងៃទី ៤ ខែមករា ដើម្បីរៀបចំប្រារព្ធពិធីឡើងមាឃ ឬឡើងអ្នកតា ដែលអ្នកភូមិជឿថា ពិធីនេះនឹងនាំឱ្យកូនចៅសុខសប្បាយ ធ្វើកសិកម្មទទួលបានផលច្រើន និងចៀសផុតពីជំងឺទៀតផង។
ស្ត្រីចំណាស់ម្នាក់ឈ្មោះ កែវ ចន្ថូ រស់នៅភូមិវាល សង្កាត់គោកចក បានឱ្យដឹងថា តាមទំនៀមប្រពៃណីពីបុរាណកាលមកមិនដែលខកខានឡើយ ឱ្យតែដល់ថ្ងៃ៣កើត ខែមាឃ ប្រជាពលរដ្ឋតែងតែមានការជួបជុំគ្នា ប្រារព្ធពិធីឡើងមាឃ ឬឡើងអ្នកតា ដើម្បីសុំសេចក្តីចម្រើនទៅតាមជំនឿរបស់ខ្លួន។
អាជ្ញាធរជាតិអប្សរាបានឱ្យដឹងថា នៅក្នុងឆ្នាំ២០២២នេះ ក៏មិនខុសប្លែកពីឆ្នាំមុនៗប៉ុន្មានដែរ អ្នកស្រុកក្នុងតំបន់អង្គរ មានក្មេងចាស់ ប្រុសស្រី បានមកជួបជុំគ្នានៅបរិវេណខាងមុខប្រាសាទអង្គរ ប្រាសាទវត្តអធ្វា អ្នកតាបាក់រទេះក្នុងភូមិនគរក្រៅ និងទីតាំងសំខាន់ៗផ្សេងទៀតក្នុងតំបន់អង្គរ ដើម្បីប្រារព្ធពិធីឡើងមាឃឬឡើងអ្នកតា ដើម្បីសុំសេចក្តីសុខចម្រើន ទាំងនេះសបញ្ជាក់ឱ្យឃើញថា អ្នកស្រុកអង្គរនៅតែបន្តថែរក្សាប្រពៃណីពីបុរាណកាលដែលបានបន្សល់ទុកពីដូនតាមកដល់បច្ចុប្បន្ន។
អាជ្ញាធរជាតិអប្សរាបញ្ជាក់ថា ៖«អ្នកភូមិជឿថា ការធ្វើពិធីឡើងអ្នកតា គឺនាំឱ្យកូនចៅសុខសប្បាយ ធ្វើស្រែចម្ការទទួលបានភោគផលច្រើន ចៀសផុតពីជំងឺ។ ដូច្នេះហើយ ទើបពួកគាត់ត្រូវរៀបចំពិធីនេះមិនដែលអាក់ខានឆ្នាំណាទេទៅតាមលទ្ធភាព ព្រោះអ្នកតា គឺជាវត្ថុស័ក្ដិសិទ្ធិ អ្នកថែរក្សាស្រុក ជាអ្នកឃុំគ្រងកូនចៅឱ្យបានសុខសប្បាយគួរឱ្យគោរពបូជា មិនអាចមើលងាយឬលេងសើចបានទេ»។
បើតាមអាជ្ញាធរជាតិអប្សរា ពិធីឡើងមាឃ ឬឡើងអ្នកតា ប្រារព្ធឡើងតាមបែបព្រះពុទ្ធសាសនាផង និងតាមជំនឿបែបព្រហ្មញ្ញសាសនាផង ដោយពេលព្រឹកព្រលឹម មានពិធីនិមន្តព្រះសង្ឃសូទ្រមន្តចម្រើនព្រះបរិត្ត និងវេភត្តាហារប្រគេនព្រះសង្ឃ និងពេលរសៀល មានរៀបចំជាគ្រឿងសក្តារៈ ដង្វាយបូជា ការប្រគំភ្លេងពិណពាទ្យ និងមានពិធីបួងសួងសុំសេចក្តីសុខចម្រើនដែរ៕