.jpg)
កំពង់់ចាមៈ កម្លាំងសមត្ថកិច្ចនគរបាលខេត្តកំពង់ចាម សហការជាមួយកម្លាំងជំនាញនៃអធិការស្រុកស្ទឹងត្រង់ និងស្រុកចំការលើធ្វើការបង្ក្រាបបានករណីជួញដូរដោយខុសច្បាប់នូវសារធាតុញៀនចំនួន ១ករណី ឃាត់ខ្លួនជនសង្ស័យជាបន្តបន្ទាប់បានចំនួន៦នាក់ កាលពីថ្ងៃទី ៣ និងទី ៤ ខែកុម្ភៈនេះ។
សមត្ថកិច្ចនគរបាលខេត្តកំពង់ចាម បានឱ្យដឹងថា កម្លាំងជំនាញការិយាល័យប្រឆាំងគ្រឿងញៀនខេត្តកំពង់ចាម រួមជាមួយកម្លាំងជំនាញ នៃអធិការដ្ឋាននគរបាលស្រុកស្ទឹងត្រង់ កម្លាំងជំនាញ នៃអធិការដ្ឋាននគរបាលស្រុកចំការលើ និងកម្លាំងប៉ុស្ដិ៍នគរបាលរដ្ឋបាលដងក្ដារ បានបើកកិច្ចប្រតិបត្តិការចុះបង្ក្រាប ករណីជួញដូរ ដោយខុសច្បាប់នូវសារធាតុញៀនចំនួន ១ករណី ឃាត់ខ្លួនជនសង្ស័យសរុបចំនួន ៣នាក់ នៅថ្ងៃទី ៣ ខែកុម្ភៈ។
លោកឧត្តមសេនីយ៍ត្រី ជីវ សេងរស់ ស្នងការរង ទទួលផែនការងារប្រឆាំងគ្រឿងញៀន បានឱ្យដឹងថា ក្នុងប្រតិបត្តិការនេះ កម្លាំងសមត្ថកិច្ចបានដកហូតវត្ថុតាងរួមមាន ម្សៅក្រាមពណ៌សសង្ស័យជាថ្នាំញៀនចំនួន ៥កញ្ចប់, ទូរស័ព្ទដៃចំនួន ២គ្រឿង និងឧបករណ៍ប្រើប្រាស់ថ្នាំញៀនមួយចំនួន។
លោកបន្តថា រហូតដល់ថ្ងៃទី៤ ខែកុម្ភៈ សមត្ថកិច្ចបានបន្ដកិច្ចប្រតិបត្តិការធ្វើការស្រាវជ្រាវឃាត់ខ្លួនបានជនសង្ស័យចំនួន ៣នាក់បន្ថែមទៀត ដែលដកហូតវត្ថុតាងរួមមាន ម្សៅក្រាមពណ៌សសង្ស័យជាថ្នាំញៀនចំនួន ៣កញ្ចប់ និង ទូរស័ព្ទដៃចំនួន ៣គ្រឿង ។
លោកស្នងការរងបញ្ជាក់ថា៖«ករណីនេះ កម្លាំងជំនាញផ្នែកប្រឆាំងគ្រឿងញៀនបានកសាងសំណុំរឿង បញ្ជូនទៅអយ្យការអមសាលាដំបូងខេត្តដើម្បីអនុវត្តបន្តតាមនីតិវិធី»៕
