.jpg)
កំពតៈ មន្ត្រីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ(ក.ប.ប.) ខេត្តកំពត រកឃើញបង្គានាំចូលពីបរទេសប្រមាណជាង ១០០គីឡូក្រាម មានសារធាតុ CMC (ចាហួយ) នៅច្រកទ្វារព្រំដែនខេត្តកំពត។ ការរកឃើញនេះគឺ បន្ទាប់ពីបានត្រួតពិនិត្យបង្គាស្រស់នាំចូលនៅច្រកទ្វាព្រំដែនអន្តរជាតិព្រែកចាក នៅថ្ងៃទី៤ ខែកុម្ភៈ។
ក្រុមការងារ ក.ប.ប. បញ្ជាក់ថា មន្ត្រីជំនាញសាខាក.ប.ប. ខេត្តកំពត បានចុះសហការត្រួតពិនិត្យបង្គាស្រស់នាំចូលនៅច្រកទ្វាព្រំដែនអន្តរជាតិព្រែកចាក ខេត្តកំពត នៅថ្ងៃទី៤ ខែមករា ឆ្នាំ២០២២ នេះ។ ក្នុងចំណោមបង្គានាំចូលសរុបចំនួន ១៣តោន ៦២៥គីឡូក្រាម មន្ត្រីជំនាញបានរកឃើញបង្គាចំនួន ១២៨គីឡូក្រាមមានសារធាតុ CMC (ចាហួយ) ។
ក្រុមការងារនេះបញ្ជាក់ថា៖«មន្ត្រីជំនាញបានដកហូតបង្គាដែលមានសារធាតុ CMC ទាំងនោះទៅកម្ទេចចោលតាមនីតិវិធី»។
ក្រុមការងារនេះបានឱ្យដឹងថា ការចុះបង្ក្រាបនេះធ្វើឡើងដោយអនុវត្តតាម ប្រកាសអន្តរក្រសួងលេខ៥៧៤ សហវ.ប្រក ស្តីពីកិច្ចសហការរវាងអគ្គនាយកដ្ឋានគយ និងរដ្ឋាករកម្ពុជា និងអគ្គនាយកដ្ឋានកម្ពុជាត្រួតពិនិត្យទំនិញនីហរ័ណ អាហរ័ណ និងបង្ក្រាបការក្លែងបន្លំ (កាំកុងត្រូល) និងយោងតាមសំណើរបស់សាខាគយ និងរដ្ឋាករច្រកទ្វារអន្តរជាតិព្រែកចាក៕
