ភ្នំពេញៈ លោកនាយករដ្ឋមន្ត្រី ហ៊ុន សែន បានសម្រេចផ្ទេរភារកិច្ចលោក អ៊ិន រស្មីឫទ្ធា ហៅ សុខ វ៉ាន់នា ពីអគ្គនាយករងនៃអគ្គនាយកដ្ឋានពន្ធនាគារ ទៅជាទីប្រឹក្សាក្រសួងមហាផ្ទៃវិញ ឋានៈស្មើអគ្គនាយករង ក្រោយពីអតីតមន្រ្ដីអគ្គនាយកដ្ឋានពន្ធនាគាររូបនេះរងបណ្ដឹងពីពលរដ្ឋករណីឆបោកលុយជាង ៧ ម៉ឺនដុល្លារជាថ្នូរចូលក្របខ័ណ្ឌមន្រ្ដីនគរបាលជាតិ។
អនុក្រឹត្យរបស់លោកនាយករដ្ឋមន្រ្ដី ហ៊ុន សែន ស្ដីពីការផ្ទេរភារកិច្ចមន្រ្ដីរាជការ ចុះថ្ងៃទី៣ ខែកុម្ភៈ ឆ្នាំ ២០២២ ដោយយោងតាមសំណើរបស់រដ្ឋមន្រ្ដីក្រសួងមហាផ្ទៃ បានសម្រេចត្រូវផ្ទេរភារកិច្ចលោកឧត្ដមអគ្គានុរក្ស ថ្នាក់លេខ ១ អ៊ិន រស្មីឫទ្ធា ពីអគ្គនាយករងនៃអគ្គនាយកដ្ឋានពន្ធនាគារក្រសួងមហាផ្ទៃមកជាទីប្រឹក្សាក្រសួងមហាផ្ទៃមានឋានៈស្នើអគ្គនាយករង។
បើយោងតាមបានពាក្យបណ្ដឹងរបស់ ឈ្មោះ លៀង សៀវគួង ភេទប្រុស អាយុ ៣៥ ឆ្នាំ ដែលបានដាក់ប្តឹងទៅនាយកដ្ឋាននគរបាលព្រហ្មទណ្ឌក្រសួងមហាផ្ទៃកាលពីថ្ងៃទី៩ ខែមិថុនា ឆ្នាំ ២០២១ បានប្ដឹងលោក អ៊ិន រស្មីឫទ្ធា អាយុ ៥១ ឆ្នាំ មានតួនាទីជាអគ្គនាយករងអគ្គនាយកដ្ឋានពន្ធនាគារ ស្នាក់នៅផ្ទះលេខ ២៤ ផ្លូវលេខ ១១៥ ភូមិសន្សំកុសល សង្កាត់បឹងទំពុន ខណ្ឌមានជ័យ ពីបទឆបោកប្រាក់ចំនួន ៧១ ០០០ ដុល្លារ កាលពីថ្ងៃទី ១២ ខែសីហា ឆ្នាំ ២០២០។
នៅក្នុងពាក្យបណ្តឹងសរសេរថា កាលពីថ្ងៃទី ១២ ខែសីហា ឆ្នាំ ២០២០ លោក អ៊ិន រស្មីឫទ្ធា បានអះអាងថាក្រសួងមហាផ្ទៃត្រូវការជ្រើសរើសក្របខ័ណ្ឌមន្ដ្រីនគរបាលជាតិ សម្រាប់ឆ្នាំ ២០២០ ជាច្រើននាក់ ហើយ សៀវគួង ក៏បានទំនាក់ទំនងជាមួយ លោក អ៊ិន រស្មីឫទ្ធា ថា បើមានការជ្រើសរើសមែននោះរូបគេមានបងប្អូនមិត្តភក្តិចំនួន ៧ នាក់ ដែលចង់ចូលបម្រើការងារក្របខ័ណ្ឌមន្ត្រីនគរបាលជាតិ ហើយលោក អ៊ិន រស្មីឫទ្ធា តម្រូវឱ្យបង់ប្រាក់ក្នុង ១ នាក់ ១ ម៉ឺនដុល្លារ ដើម្បីយកទៅធ្វើបែបបទជូនថ្នាក់លើឱ្យចូលក្របខ័ណ្ឌពេញសិទ្ធ ដោយ លោក អ៊ិន រស្មីឫទ្ធា បានសន្យាថាក្របខ័ណ្ឌនេះ រយៈពេល ២ ទៅ ៣ ខែបានចូលក្របខ័ណ្ឌពេញសិទ្ធហើយ។
ក្រោយពីស្ដាប់ការអះអាងរបស់លោក អ៊ិន រស្មីឫទ្ធា រួចហើយឈ្មោះ សៀវគួង បានប្រមូលលុយពីបងប្អូនមិត្តភក្តិទាំង ៧ នាក់ យកទៅឱ្យលោក អ៊ិន រស្មីឫទ្ធា ដែលក្នុងកិច្ចសន្យាប្រគល់-ទទួលប្រាក់ មានស្នាមមេដៃរបស់លោក អ៊ិន រស្មីឫទ្ធា ប៉ុន្ដែបានដាក់ឈ្មោះថា សុខ វ៉ាន់នា ជំនួស។ នេះបើតាមការសរសេរបញ្ជាក់ក្នុងពាក្យបណ្ដឹង។
ឈ្មោះ សៀវគួង បញ្ជាក់តាមរយៈពាក្យបណ្ដឹងថា៖«ខ្ញុំអត់មានការសង្ស័យអ្វីឡើយ សំខាន់គាត់ (សុខ វ៉ាន់នា) គាត់ធានាអះអាងថាគាត់មានឋានន្តរសក្តិផ្កាយ ៣ រឿងអ្វីខ្លាចគាត់បោកប្រាស់ខ្ញុំ»។
សៀវគួង អះអាងថារូបគេបានប្រគល់លុយឱ្យចំនួន ៧១ ០០០ ដុល្លារ ដោយលោក អ៊ិន រស្មីឫទ្ធា សន្យាថា បើរត់ការមិនបាននឹងឱ្យលុយឱ្យគ្រប់ចំនួនវិញដោយគ្មានបាត់មួយរៀលឡើយ។ ប៉ុន្តែក្រោយពីបានទទួលប្រាក់ហើយរហូតមកដល់បច្ចុប្បន្នជាង ១២ ខែ ហើយ មិនឃើញមានលទ្ធផលអ្វីឡើយ ហើយជនរងគ្រោះបានទំនាក់ទំនងទៅ លោក អ៊ិន រស្មីឫទ្ធា ហៅ សុខ វ៉ាន់នា តែលោក អ៊ិន រស្មីឫទ្ធា បានកុហករហូត ហើយពេលទូរស័ព្ទទៅគាត់មិនលើកថែមទាំងបានគេចខ្លួនបិទទូរស័ព្ទរហូតមកដល់បច្ចុប្បន្ន។ នេះបើយោងតាមពាក្យបណ្ដឹង។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារ បញ្ជាក់ប្រាប់ភ្នំពេញប៉ុស្ដិ៍កាលពីថ្ងៃទី ៦ ខែកុម្ភៈនេះថា ទាក់ទងនឹងបញ្ហានេះ កាលពីឆ្នាំ ២០២១ ជនដើមបណ្ដឹងនោះ (លៀង សៀវគួង) បានផ្ញើឯកសារស្នើសុំជួយដោះស្រាយចូលមក ផេកហ្វេសប៊ុក លោក ស ខេង ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ ហើយស្របពេលជាទូទៅលោកតែងពិនិត្យមើលលើរបាយការណ៍ដែលមានសំណើសំណូមពរផ្សេងៗពីប្រជាពលរដ្ឋផ្ញើចូលមកនោះលោកបានបញ្ជាឱ្យអង្គភាពពាក់ព័ន្ធធ្វើការដោះស្រាយលើករណីនេះតែម្ដង។
លោកបានឱ្យដឹងថាករណីនេះ អគ្គនាយកដ្ឋានពន្ធនាគារ បានស្រាវជ្រាវតាំងពីឆ្នាំមុនមក។ ហើយខាងដើមបណ្ដឹងក៏បានប្ដឹងទៅនគរបាលព្រហ្មទណ្ឌបតាំងពីមុននឹងមានសេចក្ដីសម្រេចផ្ទេរភារកិច្ចពីលោកនាយករដ្ឋមន្រ្ដី ហ៊ុន សែន។
លោកថ្លែងថា៖ «ករណីនេះ អគ្គនាយករដ្ឋពន្ធនាគារបានដោះស្រាយតាមនីតិវិធីរដ្ឋបាលជាមួយ លោក អ៊ិន រស្មីឫទ្ធា រួចហើយដើម្បីបើកផ្លូវឱ្យសមត្ថកិច្ចជំនាញគាត់ធ្វើការតាមនីតិវិធីច្បាប់។ រឿងគេយ៉ាងម៉េចៗគេដោះស្រាយគ្នាគេទៅ។ កន្លងមកអគ្គនាយកដ្ឋានពន្ធនាគារ ធ្លាប់បានកោះហៅភាគីទាំងសងខាងមកសម្របសម្រួលគ្នាក្រៅប្រព័ន្ធតុលាការ។ ប៉ុន្ដែដោយសារមានការគេចវេសមិនចូលមកដោះស្រាយយើងក៏អនុវត្ដតាមនីតិវិធីរដ្ឋបាលទៅ»។
លោក សវនា បានឱ្យដឹងថា ក្រុមការងារជំនាញនៃអគ្គនាយករដ្ឋានពន្ធនាគារ ធ្វើការស្របតាមនីតិវិធីរដ្ឋបាល និងច្បាប់ទាំងអស់រាប់តាំងពីការកោះហៅចំនួន ២ លើក ទៅតាមច្បាប់ស្ដីពីលក្ខន្តិកៈនៃមន្រ្ដីរាជការស៊ីវិល។ ក្រុមការងារជំនាញក៏បានស្វែងរកដំណោះស្រាយលើករណីនេះដោយហៅភាគទីទាំង ២ មកដោះស្រាយគ្នា ដោយមិនចង់ឱ្យមានរឿងវែងឆ្ងាយ ក្នុងស្មារតីយុទ្ធសាស្រ្ដឈ្នះឈ្នះឬក៏ដោះស្រាយក្រៅប្រព័ន្ធតុលាការ។
កាលពីថ្ងៃទី ៦ ខែកុម្ភៈនេះ ភ្នំពេញប៉ុស្ដ៍មិនទាន់អាចទំនាក់ទំនង លោក អ៊ិន រស្មីឫទ្ធា ហៅ សុខ វ៉ាន់នា បំភ្លឺជុំវិញរៀងនេះ បានទេ៕