.jpg)
គ្រឿងចក្រកម្ទេចមីនដែលបានដឹកមកដល់កម្ពុជា។ រូបថត CMAC
ភ្នំពេញៈ រដ្ឋាភិបាលជប៉ុន បន្តផ្ដល់គ្រឿងចក្រកម្ទេចគ្រាប់មីន ១ គ្រឿងទៀតតម្លៃប្រមាណ ៨០ ម៉ឺនដុល្លារ ដល់ប្រទេសកម្ពុជា ដើម្បីគាំទ្រសកម្មភាពបោសម្អាតមីនរបស់អង្គភាពស៊ីម៉ាក់នៅខេត្ដបាត់ដំបង ខណៈបច្ចុប្បន្នកម្ពុជាមានគ្រឿងចក្រកម្ទេចគ្រាប់មីននេះប្រមាណ ៥០ គ្រឿងសម្រាប់អនុវត្ដសកម្មភាពបោសសម្អាតមីននូវទូទាំងប្រទេស។ នេះបើតាមលោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC)។
លោក ហេង រតនា ថ្លែងប្រាប់ភ្នំពេញប៉ុស្ដិ៍ កាលពីថ្ងៃទី ៦ កុម្ភៈនេះថា គ្រឿងចក្រកម្ទេចគ្រាប់មីន ដែលជាជំនួយរបស់រដ្ឋាភិបាលជប៉ុន ផ្តល់ជូនរាជរដ្ឋាភិបាលកម្ពុជា ដើម្បីគាំទ្រសកម្មភាពបោសម្អាតមីនរបស់អង្គភាពស៊ីម៉ាក់ បានបញ្ជូនទៅ ដល់ទីបញ្ជាការ CMAC ខេត្តបាត់ដំបង កាលពីល្ងាចថ្ងៃទី៤ ខែកុម្ភៈនេះ តាមច្រកព្រំដែនគោកកម្ពុជា-ថៃ។
លោកថ្លែងថា គ្រឿងចក្រទាំងនេះ ផលិតនៅប្រទេសជប៉ុន ១ គ្រឿង មានតម្លៃប្រមាណ ៨០ ម៉ឺនដុល្លារ។ លោកបញ្ជាក់ថា ជាការកត់សម្គាល់ ទោះបីបញ្ហាកូវីដនៅបន្តញាំញីពិភពលោកក៏ដោយ ក៏ក្រុមហ៊ុនជប៉ុន បានខិតខំប្រឹងប្រែងផលិត និងផ្តល់ជូនអង្គភាព CMAC ទៅតាមផែនការកំណត់ដែរ។
លោក រតនា ថ្លែងថា៖ «ជំនួយគ្រឿងចក្រកម្ទេចគ្រាប់មីនបន្ថែម ១គ្រឿងនេះ គឺជាចំណែកនៃគម្រោងបោសសម្អាតមីនរយៈពេល ៣ ឆ្នាំ ដែលរដ្ឋាភិបាលជប៉ុនផ្ដល់ដល់កម្ពុជា សម្រាប់បោសសម្អាតមីននៅក្នុងខេត្តប៉ៃលិន បាត់ដំបង និងខេត្ដពោធិ៍សាត់ ដែល CMAC កំពុងតែអនុវត្ដ»។
លោកបានឱ្យដឹងថាគម្រោងបោសសម្អាតមីនរយៈពេល ៣ ឆ្នាំ ២០២០-២០២២ ខេត្តប៉ៃលិន បាត់ដំបង និងខេត្ដពោធិ៍សាត់ ដែលទទួលបានការគាំទ្រដោយរដ្ឋាភិបាលជប៉ុននឹងបញ្ចប់នៅចុងខែកម្ភៈនេះ។ ប៉ុន្ដែរដ្ឋាភិបាលជប៉ុន នឹងបន្តគាំទ្រក្នុងរយៈពេល ៤ ឆ្នាំបន្តទៀត។
បើតាមលោក ហេង រតនា គុណប្រយោជន៍សំខាន់នៃគ្រឿងចក្រកម្ទេចគ្រាប់មីននេះ គឺបានជួយបង្កើនល្បឿននៃការបោសសម្អាតមីននៅក្នុងប្រទេសកម្ពុជា ដោយសារគ្រឿងចក្រនេះ គឺជាគ្រឿងចក្រកម្ទេចគ្រាប់មីន ដោយវាយចោះទៅក្នុងដី កម្ទេចគ្រាប់មីនតែម្ដងដោយមិនបាច់ឱ្យមានការចុះទៅរាវរកគ្រាប់មីនដោយមន្ដ្រី CMAC នោះទេ។
លោកថា គ្រឿងចក្រនេះ បានជួយកាត់បន្ថយការលំបាកដល់មន្ដ្រីដោះមីន ដែលស្ថិតនៅទីតាំងប្រឈមការលំបាក ដូចជាតំបន់ព្រៃ ព្រៃឬស្សី ដែលមនុស្សពិបាកចូលរុករកមីន ប៉ុន្ដែគ្រឿងចក្រអាចចូលទៅបាន។
លោកថ្លែងថា៖ «តាមរយៈគ្រឿងចក្រនេះយើងបានកាត់បន្ថយការលំបាកទាំងអស់សម្រាប់អ្នកដោះមីន។ គ្រឿងចក្រនេះប្រើសម្រាប់កម្ទេចគ្រាប់មីនប្រឆាំងមនុស្ស។ បច្ចុប្បន្ន CMAC មានគ្រឿងចក្រកម្ទេចមីនជាង ៥០ គ្រឿងដែលកំពុងប្រតិបត្ដិការ បោសសម្អាតមីននៅទូទាំងប្រទេស»។
បើតាមអាជ្ញាធរមីនទោះបីជាកម្ពុជាកំពុងជួបបញ្ហាប្រឈមជំងឺសកលក៏ដោយ។ គិតត្រឹមខែវិច្ឆិកា ឆ្នាំ ២០២១ កម្ពុជា ធ្វើការបោសសម្អាតមីន និងសំណល់ជាតិផ្ទុះពីសង្គ្រាមបានផ្ទៃដី ១៥៣ គីឡូម៉ែត្រក្រឡា កម្ទេចគ្រាប់មីនប្រឆាំងមនុស្ស បានចំនួន ២០ ០២៦ គ្រាប់ គ្រាប់មីនប្រឆាំងរថក្រោះចំនួន ៣៧២ គ្រាប់ និងសំណល់ជាតិផ្ទុះចំនួន ៧៣ ៥៦៦៕
វីដេអូ៖
