.jpg)
សមត្ថកិច្ច និងសាធារណៈជននៅទីតាំងសពយុវជនដែលត្រូវបានគេកាប់ស្លាប់។ រូបថត ហ្វេសប៊ុក
កំពង់ស្ពឺៈ នគរបាលព្រហ្មទណ្ឌខេត្ត កំពង់ស្ពឺ កំពុងស្រាវជ្រាវស្វែងរកចាប់ខ្លួនជនសង្ស័យ ដែលបានកាប់យុវជនម្នាក់ស្លាប់នៅកណ្តាលវាលស្រែ កាលពីយប់ថ្ងៃទី ៥ កុម្ភៈ ស្ថិតក្នុងភូមិ អង្គតាឡឹក ឃុំ សំបូរ ស្រុក សំរោងទង ។
លោក សម សាក់ ស្នងការរងទទួលបន្ទុកផ្នែកព្រហ្មទណ្ឌខេត្តកំពង់ស្ពឺប្រាប់នៅថ្ងៃទី ៦ កុម្ភៈថា យុវជនរងគ្រោះឈ្មោះ សឺន សៅកៀរ ភេទ ប្រុសអាយុ ២១ ឆ្នាំ រស់នៅភូមិ អង្គតាឡឹក ឃុំ សំបូរ ស្រុកសំរោងទង។
យុវជនរងគ្រោះត្រូវបានគេប្រទះឃើញស្លាប់នៅកណ្តាលវាលស្រែកាលពីថ្ងៃ ៥ កុម្ភៈនៅចំណុចខាងលើ។
លោកថ្លែងថា៖ «រឿងនេះជារឿងឃាតកម្ម ហើយពេលនេះសមត្ថកិច្ចជំនាញខេត្ត កំពុងបើកការស្រាវជ្រាវជុំវិញករណីនេះហើយ។ ទាំងកម្លាំងខេត្ត និងកម្លាំងស្រុកសំរោងទង កំពុងធ្វើការងារនេះយ៉ាងសកម្មបំផុត»។
លោក សម សាក់ បានថ្លែងដោយយោងទៅលើការបំភ្លឺរបស់សាក្សីថា កាលពីវេលាម៉ោងជាង ១០ យប់ថ្ងៃទី ៥ កុម្ភៈ ឆ្នាំ ២០២២ មានយុវជន ៣ នាក់ បានជិះម៉ូតូ ១ គ្រឿងម៉ាក C-125 ឌុបគ្នា។
លុះជិះដល់កន្លែងកើតហេតុ ស្រាប់តែមានមនុស្សជិះម៉ូតូ (មិនចាំចំនួនម៉ូតូ និងមនុស្ស) សំដៅមកកាប់ពួកគេម្នាក់។
ចំណែកគ្នាគេ ២ នាក់ទៀត បានរត់គេចរួចខ្លួនពីការកាប់ប្រហារនេះ។
លោកបញ្ជាក់ប្រាប់ថា យុវជនរងគ្រោះ ត្រូវបានជនសង្ស័យកាប់ត្រូវគល់គុម្ពត្រចៀកខាងឆ្វេងរយះដល់ចង្ការដួលស្លាប់នៅកណ្តាលវាលស្រែ ស្ថិតក្នុងភូមិ-ឃុំកើតហេតុខាងលើ។
ចំណែកយុវជនរងគ្រោះ ២ នាក់ទៀត រត់ចោលស្បែកជើងទុកនៅកណ្តាលវាលស្រែ។
ទោះយ៉ាងណា បើតាមនគរបាលមូលដ្ឋានឃុំ សំបូរ ដែលសុំមិនបញ្ចេញឈ្មោះឱ្យដឹងនៅថ្ងៃទី ៦ កុម្ភៈ ថា អំពើមនុស្សឃាតនេះ បើទោះបីជាជនសង្ស័យរត់រួចខ្លួនយ៉ាងណាក្តី ប៉ុន្តែសមត្ថកិច្ចនគរបាលមានជំនាញគ្រប់គ្រាន់ក្នុងការវែកមុខ ដើម្បីចាប់ខ្លួនជនដៃដល់ យកមកផ្តន្ទាទោស។
អ្វីដែលសំខាន់គឺសាក្សីស្ថិតនៅក្នុងព្រឹត្តិការណ៍នោះផ្ទាល់ និងជាអ្នកបានឃើញសកម្មភាពប្រព្រឹត្តរបស់ជនល្មើស។
មន្ត្រីដដែលថា៖ «ពេលនេះ យើងចាប់ជនល្មើសអត់បានមែន តែផ្អែកតាមជំនាញរបស់យើង គឺសមត្ថកិច្ចមានវិធីសាស្ត្រទាក់ទងការបង្ក្រាប ឬចាប់ជនបង្កបទល្មើសបាន»៕
