ភ្នំពេញៈ គិតត្រឹមល្ងាចថ្ងៃទី ៥ កុម្ភៈ អតីតបុគ្គលិកក្រុមហ៊ុនណាហ្គាវើលដ៍ ដែលប្រមូលផ្តុំគ្នាតវ៉ាចំនួន ៤ នាក់ត្រូវបានរកឃើញវិជ្ជមានជំងឺកូវីដ ១៩ ខណៈសហជីពបានអះអាងថា អតីតបុគ្គលិកចំនួន ៦ នាក់ទៀតត្រូវបានសមត្ថកិច្ចចាប់ឃាត់ខ្លួន ក្រោយពេលយកសំណាក ប៉ុន្តែមន្ត្រីនគរបាលថា សមត្ថកិច្ចបានឃាត់ខ្លួនទៅតាមដីកាតុលាការតែ ២ នាក់ប៉ុណ្ណោះ។
កាលពីថ្ងៃទី ៤ កុម្ភៈ គណៈកម្មការ ប្រយុទ្ធនឹងជំងឺកូវីដ ១៩ ថ្នាក់រាជធានី-ភ្នំពេញបានបញ្ជាឱ្យអតីតបុគ្គលិកក្រុមហ៊ុនណាហ្គាវើលដ៍ បញ្ឈប់ជាបន្ទាន់នូវការប្រមូលផ្ដុំធ្វើបាតុកម្ម ហើយតម្រូវឱ្យពួកគេមកធ្វើសំណាករកវីរុសកូវីដ-១៩ ក្រោយពីប្រកាសរកឃើញករណីវិជ្ជមានកូវីដ ១៩ ប្រភេទអូមីក្រុង ១ ករណីលើអតីតបុគ្គលិកក្រុមហ៊ុននេះ ដែលជាស្ត្រីមានផ្ទៃពោះ។
សេចក្តីជូនដំណឹងរបស់មន្ទីរសុខាភិបាល រាជធានីភ្នំពេញចុះថ្ងៃទី ៥ កុម្ភៈ បានឱ្យដឹងថា ក្រោយពីក្រុមគ្រូពេទ្យរបស់មន្ទីរសហការជាមួយក្រុមគ្រូពេទ្យស្ម័គ្រចិត្ត ធីតា បានធ្វើតេស្តយកសំណាកដើម្បីស្វែងរកមេរោគកូវីដ ១៩ លើក្រុមបាតុករអតីតបុគ្គលិកក្រុមហ៊ុនណាហ្គាវើលដ៍ចំនួន ២៦៣ នាក់ មន្ទីរសុខាភិបាលបានប្រកាសថា ជាលទ្ធផលមានបាតុករចំនួន ៤ នាក់ត្រូវបានរកឃើញថា មានផ្ទុកមេរោគកូវីដ ១៩ ដោយលទ្ធផលនេះ គឺពុំទាន់យកសំណាកអស់គ្រប់គ្នានោះទេ។
ជាមួយនឹងការរកឃើញនេះ មន្ទីរសុខាភិបាលរាជធានីភ្នំពេញបានណែនាំឱ្យអ្នកប៉ះពាល់ផ្ទាល់ជាមួយអ្នកវិជ្ជមាន ធ្វើចត្តាឡីស័ករយៈពេល ៧ ថ្ងៃដោយគោរពឱ្យបានម៉ឺងម៉ាត់តាមវិធានសុខាភិបាល ហើយបន្ទាប់ពីធ្វើចត្តាឡីស័កចប់ ត្រូវយកសំណាកនៅតាមកន្លែងដែលបានកំណត់ និងរាយការណ៍អំពីលទ្ធផលមកអាជ្ញាធរមូលដ្ឋាន និងមន្ទីរសុខាភិបាលជាកំហិត។
សេចក្តីជូនដំណឹងនេះបានបញ្ជាក់ថា៖ «ទន្ទឹមនឹងនេះ មន្ទីរសុខាភិបាលរាជធានីភ្នំពេញស្នើឱ្យអ្នកដែលបានប៉ះពាល់ផ្ទាល់ និងប្រយោលជាមួយក្រុមបាតុករ ព្រមទាំងបងប្អូនបាតុករ ដែលមិនទាន់បានយកសំណាកវិភាគមេរោគកូវីដ ១៩ ត្រូវទៅធ្វើតេស្តរកមេរោគតាមកន្លែងដែលបានកំណត់នៅរាជធានីភ្នំពេញ»។
ជាមួយនឹងការទៅធ្វើតេស្តយកសំណាកតាមការកំណត់របស់មន្ត្រីសុខាភិបាលនេះដែរ កាលពីថ្ងៃទី ៥ កុម្ភៈ សហជីព ទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ បានសរសេរនៅលើទំព័រហ្វេសប៊ុករបស់ខ្លួនថា សមាជិករបស់ខ្លួនចំនួន ៦ នាក់ត្រូវបានចាប់ខ្លួន បន្ទាប់ពីចាកចេញពីកន្លែងធ្វើតេស្តយកសំណាកនៅកោះពេជ្រ។ សហជីពនេះ បានអះអាងថា អ្នកដែលត្រូវបានចាប់ខ្លួនទាំង ៦ នាក់នេះគឺមានឈ្មោះ លោក សេង វណ្ណារិទ្ធ លោក ជួប ចាន់ណាត អ្នកនាង ទូច ដាណែត អ្នកស្រី អ៊ុក សោភ័ណ អ្នកនាង ឯម គន្ធា និងលោក សៅ សម្បត្តិ។
សហជីព ទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍សង្កត់ធ្ងន់ថា៖ «តាមការស្នើសុំរបស់ក្រសួងសុខាភិបាលដែលឱ្យពួកយើងជាកូដករទៅធ្វើតេស្តយកសំណាក។ ប៉ុន្តែឥឡូវបែរជាមកព័ទ្ធចាប់ពួកគាត់ទៅវិញ។ យើងខ្ញុំប្រកាសជំហរសហការក្នុងការយកសំណាកហើយ សូមស្នើក្រសួងសុខាភិបាលបន្តចុះមកយកសំណាករបស់ពួកយើងខ្ញុំ ដើម្បីបញ្ចៀសការរីករាលដាលជំងឺកូវីដ ១៩ ក្នុងសហគមន៍ ហើយចូលរួមទប់ស្កាត់ទាំងអស់គ្នា»។
ពាក់ព័ន្ធនឹងការចាប់ខ្លួននេះលោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ ប្រាប់ភ្នំពេញប៉ុស្តិ៍នៅថ្ងៃទី ៦ កុម្ភៈ ថា នគរបាលរាជធានីភ្នំពេញ គឺបានឃាត់ខ្លួន អតីតបុគ្គលិកក្រុមហ៊ុននេះចំនួនតែ ២ នាក់ប៉ុណ្ណោះគឺឈ្មោះ ជួប ចាន់ណាត និងឈ្មោះ សេង វណ្ណារិទ្ធ។ ការឃាត់ខ្លួននេះគឺយោងទៅតាមដីកាបញ្ជាឱ្យចូលខ្លួនរបស់ព្រះរាជអាជ្ញានៃអយ្យការអមសាលាដំបូងរាជធានីភ្នំពេញពាក់ព័ន្ធករណី រារាំងដល់ការអនុវត្តវិធានការទប់ស្កាត់ជំងឺកូវីដ ១៩ ដោយយោងលើមាត្រា ១១ នៃច្បាប់ប្រយុទ្ធប្រឆាំងកូវីដ ១៩។
លោកបានបញ្ជាក់ថា៖ «យើងឃាត់ខ្លួនតាមដីកាតែ ២ នាក់ប៉ុណ្ណោះពាក់ព័ន្ធករណីរារាំងដល់ការអនុវត្តវិធានការទប់ស្កាត់ជំងឺកូវីដ ១៩ ដែលកំពុងបន្តនីតិវិធីក្នុងការសាកសួរពួកគាត់នៅស្នងការដ្ឋាន។ យើងមានដីកាបញ្ជាឱ្យចូលខ្លួន ដូច្នេះយើងអាចនឹងបញ្ជូនទៅតុលាការក្នុងពេលឆាប់ៗ ដើម្បីបន្តនីតិវិធី។ ចំណែក ៤ នាក់ទៀត ដែលបានប្រកាសនោះ ខ្ញុំអត់ដឹងដែរ ព្រោះព័ត៌មានដែលខ្ញុំទទួលបាន គឺតែប៉ុណ្ណឹង»។
សូមជម្រាបថា វិវាទការងាររវាងក្រុមហ៊ុនណាហ្គាវើលដ៍ និងបុគ្គលិកដែលត្រូវបានបញ្ចប់កិច្ចសន្យាការងារជាង ៣០០ នាក់ត្រូវបានបន្តអូសបន្លាយមកដល់បច្ចុប្បន្ន បន្ទាប់ពីក្រុមហ៊ុននេះសម្រេចកាត់បន្ថយបុគ្គលិកជាបន្តបន្ទាប់កាលពីអំឡុងឆ្នាំ ២០២០ និងឆ្នាំ ២០២១ ជាង ១ ០០០ នាក់ នៅក្នុងចំណោមបុគ្គលិកជាង ៨ ០០០ នាក់។ បន្ទាប់ពីការចរចាមិនចុះសម្រុងគ្នា បុគ្គលិកទាំងអស់ក៏បានប្រមូលផ្តុំគ្នាតវ៉ានៅក្បែរក្រុមហ៊ុន ចាប់ផ្តើមតាំងពីពាក់កណ្តាលខែធ្នូ ឆ្នាំ ២០២១ មក ដើម្បីទាមទារឱ្យក្រុមហ៊ុនទទួលពួកគេចូលធ្វើការ ហើយការតវ៉ានេះក៏នាំឱ្យថ្នាក់ដឹកនាំ និងសកម្មជនរបស់សហជីពក្នុងក្រុមហ៊ុននេះចំនួន ៩ នាក់ត្រូវបានតុលាការធ្វើការចោទប្រកាន់ក្នុងនោះ ៨ នាក់ត្រូវបានតុលាការសម្រេចឃុំខ្លួនបណ្តោះអាសន្នពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»៕