.jpg)
កម្មករ-កម្មការិនីពេលចេញពីធ្វើការរោងចក្រនាពេលកន្លងមក។ ហុង មិនា
ភ្នំពេញៈ GMAC ប្រកាសឱ្យបណ្តារោងចក្រដែលជាសមាជិកទាក់ទងមក GMAC ដើម្បីទទួលយកម៉ាស់សម្រាប់ចែកជូនកម្មករដោយឥតគិតថ្លៃចាប់ពីថ្ងៃទី ១៦ ខែកុម្ភៈ រហូតដល់ថ្ងៃទី ៣១ ខែមីនា បន្ទាប់ពីស្ថាប័ននេះទទួលបានការបរិច្ចាគម៉ាស់ជាង ៩ លានម៉ាស់ពីក្រុមហ៊ុន Fast Retailing ដែលជាក្រុមហ៊ុនមេរបស់ម៉ាក Uniqlo ប្រទេសជប៉ុន។
ការជូនដំណឹងរបស់ GMAC បានធ្វើឡើងកាលពីថ្ងៃទី ៥ កុម្ភៈ នៅលើទំព័រហ្វេសប៊ុករបស់ខ្លួនដោយបានលើកឡើងថា សមាគមទទួលបានជោគជ័យក្នុងការស្នើសុំការបរិច្ចាគម៉ាស់ពីក្រុមហ៊ុន Fast Retailing ដែលជាក្រុមហ៊ុនមេរបស់ម៉ាក Uniqlo ពីប្រទេសជប៉ុន ហើយម៉ាស់នេះអាចប្រើឡើងវិញបានច្រើនដង។
GMAC បន្តថា៖ «ការបរិច្ចាគម៉ាស់នេះ គឺកើតចេញពីកិច្ចខិតខំប្រឹងប្រែងជាបន្តបន្ទាប់របស់សមាគម និងក្រុមហ៊ុនម៉ាក Uniqlo ដើម្បីជួយឧស្សាហកម្មរបស់យើងក្នុងការដោះស្រាយបញ្ហាកូវីដ ១៩។ យើងនឹងចែកម៉ាស់ចំនួន ៩ ទៅកម្មករម្នាក់ៗ។ សូមសមាជិកទាំងអស់មកយកម៉ាស់ពីសមាគមចាប់ពីថ្ងៃទី ១៦ ខែកុម្ភៈ រហូតដល់ថ្ងៃទី ៣១ ខែមីនា ដើម្បីជួយចែកទៅកម្មកររបស់លោក លោកស្រី»។
បន្ថែមពីនេះ GMAC ក៏បានណែនាំឱ្យបណ្តារោងចក្រសហគ្រាសដែលជាសមាជិកទាំងអស់ត្រូវទាក់ទងមកជាមុនតាមរយៈលេខទូរស័ព្ទ ២ ខ្សែ គឺ 015888158 និង 016835835 ដើម្បីបញ្ជាក់អំពីចំនួនម៉ាស់ដែលរោងចក្រត្រូវការ និងកាលបរិច្ឆេទមកទទួលយកម៉ាស់ជាក់លាក់។
លោក កាំង ម៉ូនីកា អគ្គលេខាធិការរង GMAC បានប្រាប់ភ្នំពេញប៉ុស្តិ៍បន្ថែមនៅថ្ងៃទី ៦ កុម្ភៈថា ម៉ាស់ដែលទទួលបានពីក្រុមហ៊ុន Fast Retailing ដែលជាក្រុមហ៊ុនមេរបស់ម៉ាក Uniqlo ប្រទេសជប៉ុននេះ គឺមានសរុបជាង ៩ លានម៉ាស់។ GMAC នឹងធ្វើការបែងចែកម៉ាស់ដែលទទួលបានទាំងអស់នេះទៅកាន់គ្រប់បណ្តារោងចក្រ និងគ្រប់កម្មករទាំងអស់ ព្រមទាំងស្ថាប័នពាក់ព័ន្ធមួយចំនួនទៀត ដែលបានទាក់ទងមកកាន់ GMAC ក្នុងអំឡុងពេលដែលបានកំណត់។
លោក កាំង ម៉ូនីកា បញ្ជាក់ថា៖ «ការចែកម៉ាស់ដល់កម្មករនេះ គឺជាការចូលរួមចំណែកដ៏មានតម្លៃរបស់ fast retailing ដែលជាម្ចាស់ម៉ាក Uniqlo ក្នុងការចូលរួមចំណែកជាមួយរាជរដ្ឋាភិបាលកម្ពុជា និងវិស័យរបស់យើងក្នុងការទប់ស្កាត់ជំងឺកូវីដ ១៩»។
អ្នកស្រី គង់ ច័ន្ទម៉ារ៉ាឌី បុគ្គលិករបស់ GMAC បានឱ្យដឹងដែរថា បន្ទាប់ពី GMAC បានប្រកាសពីការឱ្យមកទទួលម៉ាស់ដោយឥតគិតថ្លៃ គឺត្រឹមរយៈពេល ២ ថ្ងៃគឺមានបណ្តារោងចក្រជាង ២០ ហើយ ដែលបានទាក់ទងស្នើសុំម៉ាស់ទាំងនេះសម្រាប់ចែកជូនកម្មកររបស់ពួកគេ។ អ្នកស្រីបញ្ជាក់ថា រោងចក្រសហគមន៍ទាំង ២០ នេះ គឺបានស្នើម៉ាស់សម្រាប់កម្មកររបស់ពួកគេរាប់ម៉ឺននាក់ ហើយការទទួលស្នើសុំម៉ាស់ដោយឥតគិតថ្លៃ គឺនឹងធ្វើឡើងរហូតដល់ថ្ងៃផុតកំណត់។
អ្នកស្រីបន្ថែមថា៖ «ម៉ាស់យើងនឹងមកដល់ក្នុងពេលឆាប់ៗ ហើយយើងប្រកាសឱ្យគាត់ទាក់ទងមកមុន ហើយនៅពេលថ្ងៃកំណត់ គឺពួកគាត់អាចមកទទួលម៉ាស់ដែលពួកគាត់បានស្នើនេះនៅទីស្នាក់ការ GMAC»។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជាបានសាទរចំពោះកិច្ចខិតខំប្រឹងប្រែងរបស់ GMAC ក្នុងការស្វែងរកការគាំទ្រពីម្ចាស់ជំនួយ ដើម្បីទទួលបានម៉ាស់ទាំងនេះសម្រាប់ចែកជូនដល់កម្មករកម្ពុជាដោយឥតគិតថ្លៃ។ បន្ថែមពីនេះលោកក៏រំពឹងដែរថា GMAC នឹងបន្តខិតខំថែមទៀត ក្នុងការស្វែងរកការគាំទ្រពីដៃគូ ឬម្ចាស់ជំនួយផ្សេងទៀតក្នុងការផ្តល់ជាសម្ភារផ្សេងៗទៀត ដូចជាអាល់កុល ម៉ាស៊ីនពិនិត្យកម្តៅជាដើម សម្រាប់ទប់ស្កាត់ការឆ្លងរីករាលដាលជំងឺកូវីដ ១៩ ចូលក្នុងរោងចក្រ។
ការលើកឡើងយ៉ាងដូច្នេះក៏ព្រោះតែលោកសង្កេតឃើញថា ថ្មីៗនេះនៅតាមបណ្តារោងចក្រសហគ្រាសមួយចំនួនហាក់មិនបានគោរពតាមវិធានសុខាភិបាលក្នុងការបង្ការ និងការការពារការឆ្លងរីករាលដាលជំងឺកូវីដ ១៩ នៅក្នុងរោងចក្រឱ្យបានត្រឹមត្រូវនោះទេ ជាពិសេសនោះគឺការបាញ់សម្លាញ់មេរោគនៅក្នុងរោងចក្រឱ្យបានទៀងទាត់ ខណៈរោងចក្រខ្លះមិនបានធ្វើទាល់តែសោះក្នុងរយៈពេលចុងក្រោយនេះ។
លោកបញ្ជាក់ថា៖ «ទោះបីជំងឺកូវីដមានការថមថយ ក៏យើងកំពុងតែមានការវិវឌ្ឍគួរឱ្យកត់សម្គាល់ជុំវិញជំងឺបំប្លែងថ្មីអូមីក្រុងកាន់តែខ្លាំងក្លាថែមទៀត។ GMAC ត្រូវតែពង្រីកទំនាក់ទំនងបន្ថែមទៀតទៅម្ចាស់ជំនួយ ដើម្បីធ្វើយ៉ាងម៉េច បន្ថែមសម្ភារ និងឧបករណ៍ការពារទៅដល់រោងចក្រ សហគ្រាសដែលជាសមាជិករបស់ខ្លួនធ្វើការទប់ស្កាត់ការរីករាលដាលនៅកន្លែងធ្វើការ»៕
