.jpg)
លោកនាយករដ្ឋមន្ត្រី ហ៊ុន សែន និងប្រធានាធិបតីអាមេរិកលោក ចូ បៃដិន។ រូប SPM/ហ្វេសប៊ុក Joe Biden
ភ្នំពេញៈ រដ្ឋបាលប្រធានាធិបតីសហរដ្ឋអាមេរិក លោក ចូ បៃដិន (Joe Biden) ប្រកាសធ្វើការជាមួយកម្ពុជាក្នុងនាមជាប្រធានអាស៊ាន ខណៈសហរដ្ឋអាមេរិកសង្ឃឹមថា ទំនាក់ទំនងអាស៊ាន-សហរដ្ឋអាមេរិកនឹងកាន់តែរីកចម្រើន។
ក្នុងលិខិតចុះថ្ងៃទី ១៤ ខែមករា ផ្ញើមកកាន់លោកនាយករដ្ឋមន្ត្រី ហ៊ុន សែន លោក Joe Biden សរសេរថា៖ «រដ្ឋបាលរបស់ខ្ញុំទន្ទឹងរង់ចាំធ្វើការជាមួយកម្ពុជាក្នុងនាមជាប្រធានអាស៊ានសម្រាប់ឆ្នាំ ២០២២។ ក្រោមភាពជាប្រធានអាស៊ានរបស់កម្ពុជា សហរដ្ឋអាមេរិកសង្ឃឹមថា ទំនាក់ទំនងអាស៊ានសហរដ្ឋអាមេរិកនឹងកាន់តែរីកចម្រើន និងបន្តឆ្ពោះទៅសម្រេចគោលដៅរួមរបស់យើងនៅក្នុងតំបន់»។
លោកសរសេរថា សហរដ្ឋអាមេរិកគាំទ្រមជ្ឈភាពអាស៊ាន ហើយគាំទ្រឥតងាករេ ចំពោះនិម្មាបនកម្មតំបន់ដែលមានអាស៊ានជាស្នូល និងដែលជាបេះដូងនៃតំបន់ឥណ្ឌូប៉ាស៊ីហ្វិក។ លោករំពឹងថា លោក ហ៊ុន សែន បានជ្រាបរួចហើយតាមរយៈឥណ្ឌូនេស៊ី ដែលជាប្រទេសសម្របសម្រួលទំនាក់ទំនងអាស៊ាន-សហរដ្ឋអាមេរិកក្នុងការពាំនាំការតាំងចិត្តរបស់លោកអញ្ជើញថ្នាក់ដឹកនាំអាស៊ាន ចូលរួមកិច្ចប្រជុំកំពូលពិសេសជាមួយលោកនៅរដ្ឋធានីវ៉ាស៊ីនតោននៅប៉ុន្មានខែខាងមុខនេះទៀត។
លោក Joe Biden បញ្ជាក់ថា លោកសរសេរលិខិតនេះ គឺចង់ទាក់ទងទៅលោក ហ៊ុន សែន ដោយផ្ទាល់ផងដែរ ដើម្បីគូសបញ្ជាក់ថា លោករង់ចាំស្វាគមន៍លោក ហ៊ុន សែន ធ្វើដំណើរទៅកាន់រដ្ឋធានីវ៉ាស៊ីនតោនក្នុងឱកាសដ៏ឆាប់ខាងមុខ។
ឆ្លើយតបទៅនឹងលិខិតរបស់លោក Joe Biden លោក ហ៊ុន សែន បញ្ជាក់ក្នុងលិខិតចុះថ្ងៃទី ១ ខែកុម្ភៈថា លោកអរគុណដល់លោក Joe Biden ដែលបានផ្ញើលិខិត បញ្ជាក់អំពីគោលបំណងរបស់លោកអញ្ជើញលោក និងថ្នាក់ដឹកនាំអាស៊ានចូលរួមកិច្ចប្រជុំកំពូលពិសេសអាស៊ាន-សហរដ្ឋអាមេរិក ដែលគ្រោងរៀបចំនៅក្នុងរយៈពេលប៉ុន្មានខែខាងមុខនេះ និងបំណងប្រាថ្នាក្នុងការពង្រឹងទំនាក់ទំនង អាស៊ាន-សហរដ្ឋ-អាមេរិកបន្ថែមទៀត ក្នុងពេលកម្ពុជាធ្វើជាប្រធានអាស៊ាន។
លោក ហ៊ុន សែន សរសេរថាក្នុងនាមកម្ពុជាជាប្រធានអាស៊ាន ឆ្នាំ ២០២២ លោកបានបញ្ជាក់សាជាថ្មីអំពីការប្តេជ្ញា និងការគាំទ្រយ៉ាងពេញទំហឹង ចំពោះសហរដ្ឋអាមេរិកក្នុងការរៀបចំកិច្ចប្រជុំកំពូលពិសេសអាស៊ាន-សហរដ្ឋអាមេរិកនៅរដ្ឋធានីវ៉ាស៊ីនតោន។
លោកបានសរសេរថា៖ «ខ្ញុំមានជំនឿថា កិច្ចប្រជុំកំពូលនេះនឹងផ្តល់នូវកាលានុវត្តភាពល្អមួយសម្រាប់យើងផ្លាស់ប្តូរយោបល់គ្នា ថាតើត្រូវធ្វើយ៉ាងណា ដើម្បីឱ្យកិច្ចសហប្រតិបត្តិការអាស៊ាន-សហរដ្ឋអាមេរិក រីកចម្រើនទៅមុខបន្ថែមទៀត។ ខ្ញុំទន្ទឹងរង់ចាំធ្វើការយ៉ាងជិតស្និទ្ធជាមួយឯកឧត្តម និងជួបជាមួយឯកឧត្តមដោយផ្ទាល់នៅរដ្ឋធានីវ៉ាស៊ីនតោន»។
លោក ថុង ម៉េងដាវិត អ្នកសិក្សាស្រាវជ្រាវនៅមជ្ឈមណ្ឌលមេគង្គសម្រាប់ការសិក្សាយុទ្ធសាស្ត្រនៃវិទ្យាស្ថានចក្ខុវិស័យអាស៊ីប្រាប់ភ្នំពេញប៉ុស្តិ៍នាថ្ងៃទី ៦ ខែកុម្ភៈថា រដ្ឋបាលលោក Joe Biden បានបង្ហាញអំពីសុទិដ្ឋិនិយមចំពោះកម្ពុជា និងគាំទ្រកម្ពុជាក្នុងការធ្វើជាប្រធានអាស៊ាននៅឆ្នាំនេះ។ អាស៊ាននៅតែជាចំណុចស្នូលមួយក្នុងគោលនយោបាយការបរទេសអាមេរិក និងជាដៃគូពាណិជ្ជកម្មដ៏ធំរបស់អាមេរិក ដែលអាមេរិកមិនអាចឱ្យចិនដែលជាដៃគូប្រជែងយុទ្ធសាស្ត្ររបស់ខ្លួនមានឥទ្ធិពលកាន់តែខ្លាំងឡើងៗបានឡើយ។ អាមេរិកនឹងបង្កើនវត្តមានរបស់ខ្លួនកាន់តែច្រើនឡើងៗនៅអាស៊ាននាពេលខាងមុខ។
ទាក់ទងនឹងវិបត្តិនៅមីយ៉ាន់ម៉ាលោកថ្លែងថា កម្ពុជាគួរតែជំរុញឱ្យសហរដ្ឋអាមេរិកគាំទ្រកម្ពុជាក៏ដូចជាអាស៊ានក្នុងការដោះស្រាយវិបត្តិនៅមីយ៉ាន់ម៉ា តាមរយៈការផ្តល់ជំនួយមនុស្សធម៌ គាំទ្រយន្តការចំណុចឯកច្ឆន្ទទាំង ៥ របស់អាស៊ាន និងបន្តគាំទ្រគោលការណ៍ស្នូលនៃមជ្ឈភាពរបស់អាស៊ាន។
លោក ម៉េងដាវិត ថ្លែងថា៖ «នៅក្នុងកិច្ចប្រជុំអាមេរិកអាស៊ាននាពេលខាងមុខនេះ កម្ពុជាក៏ដូចជាសមាជិកអាស៊ានដទៃទៀតនឹងមានពិភាក្សាអំពីការស្វែងរកដំណោះស្រាយរួម និងយន្តការនានាក្នុងការដោះស្រាយវិបត្តិនយោបាយមីយ៉ាន់ម៉ា ការស្តារសេដ្ឋកិច្ចអាស៊ានឡើងវិញ ក្រោយវិបត្តិកូវីដ ១៩ និងកិច្ចសហប្រតិបត្តិការសន្តិសុខតំបន់»៕
វីដេអូ៖
