.jpg)
នគរបាលចរាចរណ៍ពិនិត្យកន្លែងកើតហេតុគ្រោះថ្នាក់ចរាចរណ៍នាពេលកន្លងមក។ រូបថត FB
ភ្នំពេញៈ លោក ហ៊ុន សែន នាយករដ្ឋមន្ដ្រីនៃកម្ពុជាបានអំពានាវឱ្យប្រជាពលរដ្ឋចូលរួមគោរពច្បាប់ចរាចរណ៍កុំឱ្យមានការស្ដាយ ក្រោយពេលគ្រោះថ្នាក់កើតឡើង ដោយកាលពីថ្ងៃទី ៦ ខែកម្ភៈនេះ ក្នុងរយៈពេល ១ ថ្ងៃ មានមនុស្សស្លាប់ ៨ នាក់ និងរងរបួស ១៤ នាក់ ដោយសារគ្រោះថ្នាក់ចរាចរណ៍ តែបែរជាកូវីដ ១៩ មិនបណ្ដាលឱ្យមនុស្សស្លាប់ជាង ១ ខែមកនេះ។
លោកនាយករដ្ឋមន្ដ្រី ហ៊ុន សែន បានអំពាវនាវបែបនេះពេលអញ្ជើញធ្វើជាអធិបតីសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ៧ នៅចំណុចរង្វង់មូលខ្លាស្ទុះ ក្រុងក្រចេះ ទៅភូមិរមាត ឃុំអូរគ្រៀង ស្រុកសំបូរ ខេត្តក្រចេះ ប្រវែងប្រមាណ ៩៣.៥៦ គីឡូម៉ែត្រ ដែលសាងសង់ក្រោមជំនួយឥតសំណងរបស់រដ្ឋាភិបាលចិន ក្នុងទឹកប្រាក់ប្រមាណជាង ៣៣ លានដុល្លារអាមេរិក។
លោកនាយករដ្ឋមន្ដ្រីថ្លែងថា៖ «កូវីដ ១៩ ជាង ១ ខែហើយ អត់មានមនុស្សស្លាប់ដោយសារកូវីដ ១៩ ទេ។ ពីមុនកូវីដ ១៩ ស្លាប់ច្រើនជាងគ្រោះថ្នាក់ចរាចរណ៍ ឥឡូវគ្រោះថ្នាក់ចរចរណ៍ពីម្សិលមិញគ្រោះថ្នាក់ចរាចរណ៍កើតមាន ១១ ករណី ស្លាប់ ៨ នាក់ និងរបួស ១៤ នាក់។ នេះជារបាយការណ៍របស់សម្ដេចក្រឡាហោម ស ខេង។ អ៊ីចឹងបែរជាកូវីដ ១៩ អត់មានមនុស្សស្លាប់ក្នុងពេល១ខែគ្រោះថ្នាក់ចរារណ៍ គឺស្លាប់មនុស្សរាល់ថ្ងៃ»។
លោកបន្តថា៖ «អ៊ីចឹងទេអំពាវនាវឱ្យប្រជាពលរដ្ឋរបស់យើង គោរពច្បាប់ចរាចរណ៍ ព្រោះអត់មានអ្នកណាគ្រោះថ្នាក់ជំនួសយើងទេ។ អាពេលដែលវាបុកទៅហើយ បាក់ជើងស្អីទៅហើយ ស្លាប់ទៅហើយ វាហួសពេលហើយ ទោះបីយំយ៉ាងម៉េចក៏វាមិនរស់ឡើងវិញដែរ។ អ៊ីចឹង សូមប្រុងប្រយ័ត្នទៅលើបញ្ហានេះ»។
លោកនាយករដ្ឋមន្ដ្រីបង្ហាញ របាយការណ៍របស់លោក ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃដែលបានផ្ញើឱ្យរៀងរាល់ថ្ងៃថា គ្រោះថ្នាក់ចរាចរណ៍កើតឡើងកាលពីថ្ងៃទី៦ ខែកុម្ភៈនេះ បានកើតឡើង ១១ ករណី ក្នុងនោះបណ្ដាលឱ្យមនុស្សស្លាប់ ៨ នាក់ និងរបួស ១៤ នាក់។
លោកបានអំពាវនាវឱ្យពលរដ្ឋបើកបរម៉ូតូត្រូវពាក់មួកសុវត្ថិភាព កុំប្រើប្រាស់ទូរស័ព្ទពេលបើកបរ។ កុំយកដៃម្ខាងមកនិយាយ ចំណែកដៃម្ខាងទប់ចង្កូតម៉ូតូ និងប្រាប់ដល់ក្រុមគ្រួសារកុំខលទៅដៃគូរបើដឹងថា ពួកគេកំពុងបើកបរចេញពីកន្លែងការងារមកគេហដ្ឋាន ព្រោះអាចបណ្ដាលឱ្យមានគ្រោះថ្នាក់ចរាចរណ៍ក្នុងពេលលើកទូរស័ព្ទនិយាយជាដើម។
លោក ស ខេង ដែលជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានបញ្ជាក់ក្នុងពេលធ្វើជាអធិបតីនៃពិធីទិវាអន្តរជាតិ រំឭកដល់ជនរងគ្រោះ ដោយគ្រោះថ្នាក់ចរាចរណ៍ផ្លូវគោកលើកទី ១៦ កាលពីថ្ងៃទី ២៣ ខែធ្នូនេះ នៅស្រុកជើងព្រៃ ខេត្តកំពង់ចាម ថា ឥឡូវនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក បាននិងកំពុងសិក្សាយ៉ាងហ្មត់ចត់ ដើម្បីឈានទៅធ្វើវិសោធនកម្មច្បាប់ ស្ដីពីចរាចរណ៍ផ្លូវគោក។ ប៉ុន្ដែប្រហែលជាមិនមែនធ្វើវិសោធនកម្មទេ ដោយសារថា ចំណុចដែលត្រូវកែប្រែនោះច្រើនពេក ដូច្នេះអាចមានលទ្ធភាពធ្វើច្បាប់ថ្មី។
លោក គឹម បញ្ញា នាយកអង្គការមូលនិធិបង្ការរបួសអាស៊ីថ្លែងនៅថ្ងៃទី ៧ កុម្ភៈនេះថាក្រោយពីរាជរដ្ឋាភិបាលបានអនុញ្ញាតឱ្យមានការបើកប្រទេសជាប្រក្រតីឡើងវិញ បន្ទាប់ពីស្ថានភាពកូវីដ១៩មានការធូស្រាល បញ្ហាប្រឈមនៃគ្រោះថ្នាក់ចរាចរណ៍មានការកើនឡើង ចំពោះចំនួនអ្នកគ្រោះចរាចរណ៍ និងចំនួនអ្នកស្លាប់ និងរបួស។
លោកថ្លែងថា៖«ចំពោះបញ្ហាគ្រោះថ្នាក់ចរាចរណ៍នេះ អ្វីដែលយើងអាចធ្វើបាន គឺយើងត្រូវដោះស្រាយបញ្ហា ២ ក្នុងនោះទី១ យើងត្រូវកែប្រែឥរិយាបថអ្នកបើកបរនាពេលបច្ចុប្បន្ន និងទី២ យើងត្រូវបណ្ដុះឥរិយាបថឱ្យមានការគោរពសុវត្ថិភាពចរាចរណ៍ ដោយចាប់ផ្ដើមតាំងពីកុមារឡើងមកដើម្បីឱ្យមានឥទ្ធិពលយូរអង្វែងលើការងារសុវត្ថិភាពចរាចរណ៍ផ្លូវគោក»។
លោកលើកឡើងថា បើសិនជាមានការចាប់ផ្ដើមបណ្ដុះឥរិយាបទឱ្យមានការគោរពច្បាប់ចរាចរណ៍ដល់កុមារចាប់ពីបច្ចុប្បន្ន រហូតដល់១០-២០ ឆ្នាំខាងមុខនោះស្ថានភាព គ្រោះថ្នាក់ចរាចរណ៍នឹងមានភាពប្រសើឡើងវិញមិនខាន៕
