.jpg)
មន្ត្រីប្រជុំពីការរៀបចំខួបលើកទី ៤៤ នៃការបង្កើតកងទ័ព ពីថ្ងៃទី ៣ កុម្ភៈ។ រូប ក្រសួងការពារជាតិ
ភ្នំពេញៈ ពិធីអបអរសាទររំឭកខួបអនុស្សាវរីយ៍លើកទី៤៤ ឆ្នាំនៃការបង្កើតកងទ័ពកាលពីថ្ងៃទី ១២ ឧសភា ឆ្នាំ ១៩៧៨ ក្នុងបុព្វហេតុរំដោះប្រជាជន និងប្រទេសជាតិចេញពីរបបប្រល័យពូជសាសន៍ ប៉ុល ពត ក្រោមការដឹកនាំរបស់លោក ហ៊ុន សែន នឹងប្រារព្ធធ្វើនៅថ្ងៃទី ១២ ឧសភា ឆ្នាំ ២០២២ ក្រោមអធិបតីភាពរបស់លោកនាយករដ្ឋមន្ត្រី ហ៊ុន សែន។ នេះបើតាមនាយកដ្ឋានព័ត៌មាន ក្រសួងការពារជាតិ។
គណៈកម្មការរៀបចំរំឭកខួបបានបើកកិច្ចប្រជុំរបស់ខ្លួនកាលពីព្រឹកថ្ងៃទី ៣ ខែកុម្ភៈ ដើម្បីត្រៀមរៀបចំពិធីអបអរសាទររំឭកខួបអនុស្សាវរីយ៍លើកទី ៤៤ ឆ្នាំ នៃការបង្កើតកងទ័ព។ កិច្ចប្រជុំនេះត្រូវបានធ្វើឡើងនៅទីបញ្ជាការដ្ឋានអង្គរក្សក្រុងតាខ្មៅ ខេត្តកណ្តាលក្រោមអធិបតីភាពលោកនាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ និងជាគណៈកម្មការរៀបចំរំឭកខួបលើកទី ៤៤ នេះ។
លោក ម៉ឹង សំផន មានប្រសាសន៍ថា៖ «ខួបលើកទី ៤៤ នៃការបង្កើតកងទ័ព គឺពិតជាមានសារៈសំខាន់បំផុតដែលយើងត្រូវរៀបចំពិធីរំឭកខួប និងធ្វើការចងក្រងឯកសារជាប្រវត្តិសាស្ត្រ សម្រាប់ឱ្យកូនខ្មែរជំនាន់ក្រោយៗបានយល់ដឹងពីប្រវត្តិសាស្ត្រពិតជាក់ស្តែងរបស់កម្ពុជា។ ពិសេសពីសំណាក់សម្តេចតេជោ នាយករដ្ឋមន្ត្រី ហ៊ុន សែន ដែលជាប្រតិបត្តិករឯកតែមួយគត់ ដែលបានយកអាយុជីវិតរបស់សម្តេចធ្វើជាដើមទុនជាច្រើនលើក និងច្រើនសារហូតប្រទេសជាតិកម្ពុជាបានចាកផុតពីរបបប្រល័យពូជសាសន៍ ប៉ុលពត នាឆ្នាំ ១៩៧៩ និងទទួលបានសុខសន្តិភាពពេញលេញនាឆ្នាំ ១៩៩៨ នៅទូទាំងព្រះរាជាណាចក្រកម្ពុជា»។
កិច្ចប្រជុំគណៈកម្មការរៀបចំរំឭកខួបលើកទី ៤៤ នៃការបង្កើតកងទ័ពបានពិភាក្សាយ៉ាងយកចិត្តទុកដាក់បំផុតទៅលើខ្លឹមសារ និងទីតាំងប្រារព្ធពិធី។ ក្នុងនោះក៏បានសម្រេចចាត់បញ្ជូនក្រុមការងារសិក្សាស្រាវជ្រាវ ១ ក្រុមចុះទៅសិក្សាស្រាវជ្រាវទីតាំងប្រវត្តិសាស្ត្រមួយចំនួននៅលើទឹកដីប្រទេសវៀតណាម ដើម្បីបង្ហាញឱ្យឃើញភាពពិតជាក់ស្តែងនៃការតស៊ូរបស់ប្រមុខរដ្ឋាភិបាលនៃការបង្កើតឡើងនូវអង្គភាព ១២៥ និងបានឯកភាពសម្រេចជ្រើសរើសយកទីតាំងបញ្ជាការដ្ឋានអង្គរក្ស ក្រុងតាខ្មៅ ខេត្តកណ្តាលប្រារព្ធពិធីអបអរសាទរខួបលើកទី ៤៤ ឆ្នាំនាថ្ងៃទី ១២ ខែឧសភា ឆ្នាំ ២០២២។
លោកគិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ថ្លែងនៅថ្ងៃទី ៧ ខែកុម្ភៈថា ការរៀបចំឱ្យមានកម្មវិធីបែបនេះគឺជាការរំឭកនូវប្រវត្តិសាស្ត្រនៃការរៀបចំកងកម្លាំងប្រដាប់អាវុធកម្ពុជាក្នុងការផ្តួលរំលំរបបប្រល័យពូជសាសន៍ហើយក៏ជាមេរៀនមួយសម្រាប់ការចងចាំដល់កូនខ្មែរជំនាន់ក្រោយឱ្យបានដឹងថាអ្វីៗដែលកម្ពុជាមានសព្វថ្ងៃនេះរួមមានទាំងការអភិវឌ្ឍសុខសន្តិភាព ស្ថិរភាពនយោបាយនោះ គឺមានដើមចមចេញពីចលនាតស៊ូមួយដែលវរកងទ័ពខ្មែរបានក្រោកឡើងធ្វើការលះបង់បូជាជីវិតដើម្បីបុព្វហេតុនៃការរំដោះប្រជាជនខ្មែរចេញពីរបបប្រល័យពូជសាសន៍។
លោកថ្លែងថា៖ «ខ្ញុំគិតថាទិវានេះ ឬក៏ការប្រារព្ធពិធីនេះ គឺបង្ហាញពីការដឹងគុណរបស់មនុស្សជំនាន់នេះចំពោះវីរកងទ័ពរបស់យើង ដែលបានបូជាជីវិតសម្រាប់បុព្វ-ហេតុនៃការរស់ឡើងវិញនៃប្រជាជាតិកម្ពុជាទាំងមូលហើយវាជាការបង្ហាញអំពីគុណធម៌ និងសច្ចធម៌នៃមនុស្សជំនាន់នេះដែលមិនដែលបំភ្លេចនូវគុណូបការៈនៃការបូជាសាច់ស្រស់ឈាមស្រស់ សម្រាប់បុព្វហេតុជាតិនៃវីរកងទ័ពរបស់យើងនៅសម័យនោះក្រោមការដឹកនាំរបស់សម្តេចតេជោ ហ៊ុន សែន»៕
