ភ្នំពេញៈ អង្គភាពប្រឆាំងអំពើពុករលួយ ACU ប្រកាសឱ្យបុគ្គលជាប់កាតព្វកិច្ចប្រកាសទ្រព្យសម្បត្តិ និងបំណុលចំនួន ៩ រូបដែលមិនទាន់មកបំពេញកាតព្វកិច្ចហើយបានព្រមានចាត់វិធានការតាមច្បាប់ទ្វេដងក្នុងករណីរឹងរូសមិនព្រមចូលខ្លួនតាមការអំពាវនាវនេះ។
សេចក្តីជូនដំណឹងរបស់ ACU បានឱ្យដឹងនៅថ្ងៃ ៧ កុម្ភៈថា ក្នុងរយៈពេលពេញ ១ ខែ មករា កន្លងមក ACU បានទទួលឯកសារប្រកាសទ្រព្យសម្បត្តិ និងបំណុលតាមរបប ២ ឆ្នាំរហូតទៅដល់ ៩៩,៨១% នៃចំនួនត្រូវប្រកាសសរុបដែល ACU បង្ហាញការកោតសរសើរយ៉ាងខ្លាំងចំពោះស្មារតីគោរពតាមគោលការណ៍ច្បាប់របស់អ្នកជាប់កាតព្វកិច្ចប្រកាសទ្រព្យសម្បត្តិ និងបំណុល និងការខិតខំប្រឹងប្រែងប្រកបដោយការយកចិត្តទុកដាក់ខ្ពស់របស់ជនបង្គោលប្រឆាំងអំពើពុករលួយនៅគ្រប់ក្រសួងស្ថាប័ន និងរាជធានី-ខេត្ត។
ទោះជាយ៉ាងណា ACU បានឱ្យដឹងទៀតថា គិតត្រឹមម៉ោង ១២ យប់ថ្ងៃទី ៣១ មករា ឆ្នាំ ២០២២ នៅមានបុគ្គលចំនួន ៩ រូប មិនទាន់មកបំពេញកាតព្វកិច្ច ទោះបីជាក្រុមជនបង្គោល និងក្រុមការងារបានព្យាយាមទាក់ទងជាច្រើនលើកច្រើនសា ប៉ុន្តែនៅតែមិនអាចទាក់ទងបាន។
ACU បានបញ្ជាក់ថា «ប្រការខាងលើនេះ បង្ខំឱ្យ ACU ត្រូវធ្វើការផ្សព្វផ្សាយជាសាធារណៈ និងអញ្ជើញបុគ្គលទាំង ៩ រូបនេះឱ្យចូលខ្លួនមកប្រកាសទ្រព្យសម្បត្តិ និងបំណុលឱ្យបានរួសរាន។ ក្នុងករណីរឹងរូសមិនព្រមប្រកាសទ្រព្យសម្បត្តិទៀត ត្រូវផ្តន្ទាទោសទ្វេដង»។
យោងតាមសេចក្តីប្រកាសរបស់ ACU បុគ្គលទាំង ៩ រូបដែលមិនទាន់មកបំពេញកាតព្វកិច្ច គឺមានឈ្មោះ លោក ទឹម សន ទីប្រឹក្សាក្រសួងព័ត៌មាន ឈ្មោះ ណយ ណុន នាយរងប៉ុស្តិ៍នគរបាលអាកាសយានដ្ឋានអន្តរជាតិព្រះសីហនុនៃអគ្គនាយកដ្ឋានអន្តោប្រវេសន៍ ឈ្មោះ យិន រស្មី ប្រធានផ្នែកផ្សព្វផ្សាយ និងព័ត៌មាននៃក្រសួងរៀបចំដែនដីនគរូបនីយកម្ម និងសំណង និងឈ្មោះ លឹម ឡោកពិសិដ្ឋទីប្រឹក្សាក្រសួងពាណិជ្ជកម្ម។
ចំណែក ៥ នាក់ទៀតមានឈ្មោះ សោម សាបាន និងឈ្មោះ សេរី ម៉ាណុប ដែលអ្នកទាំង ២ ជាទីប្រឹក្សាក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ឈ្មោះ ទិត្យរ៉ា ឫទ្ធីនី ជំនួយការក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ឈ្មោះ សំ សេរីរ័ត្ន អគ្គនាយករងនៃក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច និងឈ្មោះ ហេង ពិសាល នាយករងខុទ្ទកាល័យនៃក្រសួងក្រសួងមុខងារសាធារណៈ។
យោងតាមមាត្រា ៣៨ នៃច្បាប់ស្តីពីការប្រឆាំងអំពើពុករលួយបានចែងថា ជនណាដែលមិនបានប្រកាស ទ្រព្យសម្បត្តិ និងបំណុល ឬបានប្រកាសមិនត្រឹមត្រូវនូវទ្រព្យសម្បត្តិរបស់ខ្លួនទៅតាមបទប្បញ្ញត្តិនៃច្បាប់នេះត្រូវផ្តន្ទាទោសដាក់ពន្ធនាគារពី ១ ខែ ទៅ ១ ឆ្នាំ និងពិន័យជាប្រាក់ពី ១ សែនរៀលទៅ ២ លានរៀលហើយក៏ត្រូវបង្ខំឱ្យប្រកាសទ្រព្យសម្បត្តិជូនអង្គភាពប្រឆាំងអំពើពុករលួយផងដែរ។
លោក ប៉ិច ពិសី នាយកប្រតិបត្តិនៃអង្គការតម្លាភាពកម្ពុជាបានលើកឡើងថា ACU គឺធ្វើទៅតាមច្បាប់ដែលមានចែងពាក់ព័ន្ធនឹងច្បាប់ស្តីពីការប្រឆាំងអំពើពុករលួយ ដែលបានកំណត់យ៉ាងច្បាស់ចំពោះបុគ្គលដែលជាប់កាតព្វកិច្ចក្នុងការប្រកាសទ្រព្យសម្បត្តិ និងបំណុល។ លោកថា បុគ្គលដែលជាប់កាតព្វកិច្ចនេះ គឺត្រូវតែបំពេញកាតព្វកិច្ចឱ្យបានត្រឹមត្រូវ ហើយក្នុងករណីខកខាននឹងត្រូវទទួលទោសតាមច្បាប់កំណត់។
លោកបានបញ្ជាក់ថា៖ «ខ្ញុំ មិនមានព័ត៌មាន និងដឹងច្បាស់អំពីមូលហេតុដែលបុគ្គលទាំងហ្នឹង មិនចូលខ្លួនប្រកាសទ្រព្យសម្បត្តិ និងបំណុលទេ។ ប៉ុន្តែខ្ញុំដឹងថា នីតិវិធីនៃការប្រកាស គឺមានក្នុងច្បាប់ស្រាប់ ហើយធម្មតាខាងអង្គភាពគឺមានក្រុមការងារ ជាក់លាក់ និងមានការកំណត់ពេលវេលាច្បាស់លាស់ ដែលនេះមិនមែនជាកំហុសឆ្គងបច្ចេកទេសនោះទេ។ ខ្ញុំគិតថា ប្រហែលជាអ្នកជាប់កាតព្វកិច្ចនេះ មានការធ្វេសប្រហែស ឬអាចមានបញ្ហាផ្ទាល់ខ្លួន ដែលឈានទៅការសម្រេចចិត្តមិនប្រកាស»។
ជាមួយគ្នានេះ លោក ប៉ិច ពិសី បានស្នើឱ្យរដ្ឋាភិបាល និងស្ថាប័នពាក់ព័ន្ធរួមគ្នាពិនិត្យឡើងនូវច្បាប់ស្តីពីការប្រឆាំងអំពើពុករលួយ ដើម្បីបើកផ្លូវឱ្យការប្រកាសទ្រព្យរបស់មន្ត្រីជាប់កាតព្វកិច្ចត្រូវធ្វើជាសាធារណៈ ខណៈច្បាប់របស់កម្ពុជាបច្ចុប្បន្នចែងពីការប្រកាសទ្រព្យសម្បត្តិ និងបំណុលនេះត្រូវទុកជាការសម្ងាត់ ហើយក្នុងករណីអាចពិនិត្យការប្រកាសទ្រព្យរបស់មន្ត្រីណាម្នាក់បាន លុះត្រាមានភាពមិនប្រក្រតីកើតឡើង។
តាមលោក ខូយ លឹមហុង ឧបការីនៃអង្គភាពប្រឆាំងអំពើពុករលួយបានឱ្យដឹងថា មន្ត្រីទូទាំងប្រទេសដែលជាប់កាតព្វកិច្ចត្រូវប្រកាសទ្រព្យសម្បត្តិ និងបំណុលសរុប គឺមានប្រមាណ ៥ ម៉ឺននាក់ក្នុងនោះអ្នកត្រូវប្រកាសក្នុងឆ្នាំសេសមានប្រមាណ ៣៥ ០០០ នាក់ ខណៈអ្នកត្រូវប្រកាសក្នុងឆ្នាំគូមានប្រមាណ ១៥ ០០០ នាក់។
ទាក់ទងនឹងករណីនេះ ភ្នំពេញ-ប៉ុស្ដិ៍មិនអាចរកប្រភពសុំការបំភ្លឺពីមន្ត្រីទាំង ៩ រូបនោះបានទេ នៅថ្ងៃទី ៧ កុម្ភៈ។ ក៏ប៉ុន្តែលោក ណុប ចាន់ណារិន្ទ អ្នកនាំពាក្យក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ដែលស្ថាប័នលោកមានមន្ត្រីមួយចំនួនមិនទាន់បានប្រកាសទ្រព្យសម្បត្ដិ បានប្រាប់ភ្នំពេញប៉ុស្តិ៍ថា បន្ទាប់ពីទទួលបានការជូនដំណឹងជាផ្លូវការពី ACU ក្នុងមន្ត្រីដែលបានខកខានបំពេញកាតព្វកិច្ចក្នុងការប្រកាសទ្រព្យសម្បត្តិ និងបំណុលនេះនឹងចូលខ្លួនទៅប្រកាសទ្រព្យសម្បត្តិនៅក្នុងសប្តាហ៍នេះ។
លោកបានបន្តថា មូលហេតុដែលមន្ត្រីព្រឹទ្ធសភាខកខានមិនបានបំពេញកាព្វកិច្ចនេះដោយសារតែពួកគេមានការយល់ច្រឡំ និងខ្លះទៀតបំពេញបេសកកម្មដោយលោកអះអាងថា មន្ត្រីទាំងនោះមិនមានចេតនាគេចវេះឡើយ។
លោកបានបញ្ជាក់ថា៖ «ជាមួយនឹងការបង្ហាញនេះ ថ្នាក់ដឹកនាំក៏បានផ្សព្វផ្សាយបន្តដើម្បីឱ្យមន្ត្រីដែលខកខានទាំងនេះ ចូលខ្លួនទៅប្រកាសទ្រព្យសម្បត្តិ ក្នុងពេលឆាប់ៗនេះ នៅពេលពួកគាត់បានទទួលដំណឹងនេះ»៕