ភ្នំពេញៈ សាលា​រាជធានី​ភ្នំពេញ​បានធ្វើការ​ព្រមាន​ និង​ដាក់ចេញ​នូវ​វិធានការ​បន្ទាន់​មួយចំនួន​ដោយ​ហាម​ដាច់ខាត​មិនឱ្យ​អតីត​បុគ្គលិក​ក្រុមហ៊ុន​ណាហ្គាលវើលដ៍​ធ្វើការ​ប្រមូលផ្តុំ​គ្នា​តវ៉ា​ជាថ្មី​ទៀតឡើយ ដើម្បី​ទប់ស្កាត់​ការឆ្លង​រាលដាល​ជំងឺ​កូវីដ ១៩ ក្រោយពី​រកឃើញ​អតីត​បុគ្គលិក​ក្រុមហ៊ុន​នេះ​មាន​ផ្ទុកមេរោគ​កូវីដ- ១៩ បំប្លែង​ថ្មី​អូមីក្រុង​មានការ​កើនឡើង​ជា​បន្តបន្ទាប់​រហូតដល់ ៤១ នាក់​។

គិត​ត្រឹម​ថ្ងៃទី ​៦ កុម្ភៈ​ក្រុម​គ្រូពេទ្យ​មន្ទីរ​សុខាភិបាល​រាជធានី​ភ្នំពេញ​សហការ​ជាមួយ​ក្រុម​គ្រូពេទ្យ​ស្ម័គ្រចិត្ត TYDA បាន​រកឃើញ​ករណី​វិជ្ជមាន​ថ្មី​រហូតដល់​ទៅ ៤១ នាក់​ក្នុងចំណោម​អតីត​បុគ្គលិក​ក្រុមហ៊ុន​ណាហ្គាវើលដ៍​ចំនួន​ ៥៤៦ ​នាក់​ដែល​បាន​ទៅធ្វើ​តេស្ត​។ អ្នក​រកឃើញ​វិជ្ជមាន​ទាំងនោះ​មួយចំនួន​ត្រូវឱ្យ​ព្យាបាល​នៅផ្ទះ​ និង​ភាគច្រើន​សម្រាក​ព្យាបាល​នៅ​មន្ទីរពេទ្យ​។

ដោយ​ចាត់ទុកថា នេះ​ជា​ចំនួន​ឆ្លង​ដ៏ច្រើន​គួរឱ្យ​ព្រួយបារម្ភ​យ៉ាងខ្លាំង សាលា​រាជធានី​ភ្នំពេញ​បានចេញ​សេចក្តី​ណែនាំ ដើម្បី​ថែរក្សា​អាយុជីវិត​ក្រុមបាតុករ និង​ក្រុមគ្រួសារ​សាច់ញាតិ ក៏ដូចជា​ដើម្បី​ចៀសវាង​សោកនាដកម្ម​នៃ​ការឆ្លង​រាលដាល​ធ្ងន់ធ្ងរ​ទៅក្នុង​សហគមន៍​ជា​ទ្រង់ទ្រាយ​ធំ ជាពិសេស​ធានាបាន​នូវ​ការរស់នៅ​តាម​គន្លង​ប្រក្រតីភាព​ថ្មី​។

សាលា​រាជធានី​បាន​ណែនាំ​ថា​៖ «​មន្ទីរ​សុខាភិបាល​នៃ​រដ្ឋបាល​រាជធានី​ភ្នំពេញ ត្រូវ​ចាត់ចែង​បាញ់ថ្នាំ​សម្លាប់​មេរោគ​ចំពោះ​មធ្យោបាយ ធ្វើដំណើរ និង​ទីតាំង​សាធារណៈ​ដែល​ក្រុមបាតុករ​ធ្លាប់បាន​ប្រើប្រាស់ ដូចជា​រថយន្តក្រុង​ដែល ក្រុមបាតុករ​ធ្លាប់បាន​ធ្វើដំណើរ​ទៅយក​សំណាក​ទីតាំង​ផ្ញើ​ទុកដាក់​យានជំនិះ​របស់​ក្រុមបាតុករ ទីតាំង​ហូប​អាហារ និង​បន្ទប់ទឹក​ជាដើម​»​។

ចំពោះ​ក្រុមបាតុករ​ដែល​មិនទាន់​ទៅយក​សំណាក ត្រូវ​រួសរាន់​ទៅយក​សំណាក​ដោយ​អនុវត្តតាម​ការណែនាំ​របស់​ក្រុម​គ្រូពេទ្យ និង​ត្រូវ​ណែនាំ​ដល់​ក្រុម​គ្រួសារ​សាច់ញាតិ​មិត្តភក្តិ ដែល​សង្ស័យ​មាន​ជាប់​ពាក់ព័ន្ឋ​ដោយ​ផ្ទាល់ ឬ​ដោយ​ប្រយោល​ត្រូវ​អញ្ជើញ​ទៅយក​សំណាក​តេស្ត​រក​ជំងឺ​កូវីដ​ ១៩ ជាដាច់ខាត​។ បន្ថែម​ពីនេះ សាលា​រាជធានី​ក៏បាន​ណែនាំ​ឱ្យ​ក្រុមបាតុករ និង​អ្នក​ជាប់​ពាក់ព័ន្ធ​ដោយផ្ទាល់ ឬ​ដោយ​ប្រយោល​ត្រូវធ្វើ​ចត្តាឡីស័ក​រយៈពេល ៧ ថ្ងៃ និង​ត្រូវ​បញ្ឈប់​នូវ​រាល់​ការប្រមូលផ្តុំ​។

ជាមួយ​គ្នា​នោះ សាលា​រាជធានី​ក៏បាន​ព្រមាន​ដែរ​ថា​៖ «​ក្នុងករណី​មិន​អនុវត្តតាម​វិធាន​សុខាភិបាល អាជ្ញាធរ​មាន​សមត្ថកិច្ច​នឹង​ចាត់វិធានការ​រដ្ឋបាល​ចាត់​បញ្ជូន​បុគ្គល​រឹងរូស​ឱ្យទៅ​ធ្វើ​ចត្តាឡីស័ក​នៅ​មណ្ឌល​ចត្តាឡីស័ក​រាជធានី​ភ្នំពេញ (​ព្រែកព្នៅ​)​។ ក្នុងនោះ​បុគ្គល​ដែល​គេចវេះ​ពី​ការធ្វើ​ចត្តាឡីស័ក ឬ​បុគ្គល​ដែល​គេច​ចេញពី​ទីកន្លែង​ធ្វើ​ចត្តាឡីស័ក​នឹងត្រូវ​ទទួលពិន័យ​អន្តរការណ៍​ជា​ប្រាក់​ពី ១ ​លាន ដល់ ៥​ លាន​រៀល ព្រមទាំង​ត្រូវ​ផ្តន្ទាទោស​តាមច្បាប់​ព្រហ្មទណ្ឌ​ជា​ធរមាន​»​។

លោក ឃួង ស្រេង អភិបាល​រាជធានី​ភ្នំពេញ​ថ្លែងថា​៖ «​គណៈបញ្ជាការ​ដឹកនាំ​ការអនុវត្ត​ច្បាប់​នៅ​ថ្នាក់​រាជធានី​ភ្នំពេញ​ស្នងការដ្ឋាន​នគរបាល​រាជធានី​ភ្នំពេញ បញ្ជាការដ្ឋាន​កងរាជអាវុធហត្ថ​រាជធានី​ភ្នំពេញ រដ្ឋបាល​ខណ្ឌចំការមន រដ្ឋបាល​ខណ្ឌដូនពេញ និង​មន្ទីរ​សុខាភិបាល រដ្ឋបាល​រាជធានី​ភ្នំពេញ​ត្រូវ​ចាត់​វិធានការ​រដ្ឋបាល និង​វិធានការ​ច្បាប់​ចំពោះ​បុគ្គល​ទាំងឡាយណា​ដែល​បន្ត​ការប្រមូលផ្តុំ ឬ​ការជួបជុំ​ដោយ​មិន​អនុវត្តតាម​វិធានការ​សុខាភិបាល​បង្ក​ការរាំងស្ទះ​ដល់​ការបំពេញ​ការងារ​របស់​ក្រុម​គ្រូពេទ្យ​ និង​អាជ្ញាធរ​មាន​សមត្ថកិច្ច ដោយ​ការផាកពិន័យ និង​ទោស​ដាក់ពន្ធនាគារ ដោយ​គ្មាន​ការលើកលែង​ឡើយ​»​។

ឆ្លើយតប​នឹង​បញ្ហា​នេះ​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​នៃ​ក្រុមហ៊ុន​ណាហ្គាវើលដ៍​បានបញ្ជាក់​នៅក្នុង​សេចក្តី​ថ្លែងការណ៍​របស់​ខ្លួន​ថា កូដករ​ទាំងអស់​នឹង​បន្តធ្វើ​ចត្តាឡីស័ក​តាម​វិធានការ​របស់​ក្រសួង​សុខាភិបាល ដើម្បី​ចូលរួម​ទប់ស្កាត់​ការឆ្លង​ក្នុង​សហគមន៍ និង​ចូលរួម​ការពារ​សុខុមាលភាព​របស់​សាធារណជន​ដោយ​ស្មារតី​ទទួលខុសត្រូវ​។

សហជីព​នេះ​បាន​បញ្ជាក់ថា​៖​ «​ខណៈពេល​ដែល​កំពុង​ធ្វើ​​ចត្តាឡីស័ក យើងខ្ញុំ​នៅតែ​បន្ត​ធ្វើ​យុទ្ធនាការ​តាមរយៈ​ការផុស​លើ​បណ្តាញ​សង្គម ដើម្បីឱ្យ​ក្រុមហ៊ុន​ណាហ្គាវើលដ៍ មាន​ការទទួលស្គាល់​សិទ្ធិ​សហជីព ដោះលែង​ថ្នាក់ដឹកនាំ​គណៈកម្មាធិការ​សហជីព សកម្មជន​សហជីព ដែល​បាន​ចាប់ខ្លួន​ជា​បន្តបន្ទាប់ និង​ទទួលយក​កម្មករ​ ៣៦៥ ​នាក់ និង​អ្នក​កំពុង​ធ្វើ​កូដកម្ម​ចូលធ្វើ​ការងារ​វិញ​ហើយ​ធ្វើ​ការចរចា​ជាមួយ​សហជីព​ដោយស្មោះ​ត្រង់​»​។

បន្ថែម​ពីនេះ សហជីព​នេះ​ក៏បាន​បញ្ជាក់ទៀតថា ក្រោយពី​បញ្ចប់​ការធ្វើ​ចត្តាឡីស័ក អតីត​កម្មករ​ទាំងអស់​គ្នា ដែលជា​កូដករ​នឹង​បន្តធ្វើ​កូដកម្ម​ជា​បន្តទៀត ដើម្បី​ស្នើ​អាជ្ញាធរ​បញ្ឈប់​ការចោទប្រកាន់ យាយី មកលើ​ក្រុម​កូដករ ដោយ​បើកផ្លូវ​ឱ្យមាន​ការធ្វើ​កូដកម្ម​នៅមុខ​ក្រុមហ៊ុន​ស្របតាម​ច្បាប់​។

ពាក់ព័ន្ធ​នឹង​វិវាទ​នេះ​នៅ​ថ្ងៃទី ៧ កុម្ភៈ សហភាព​សហជីព សហព័ន្ធ​សហជីព សមាគម បណ្តាញ​សហគមន៍ អង្គការ​សង្គម​ស៊ីវិល អ្នកវិភាគ​ឯករាជ្យ អ្នកសិក្សា​ស្រាវជ្រាវ និង​អភិវឌ្ឍន៍​សង្គម សកម្មជន​បរិស្ថាន​ជាង ១៣០ ស្ថាប័ន​ក៏បាន​ចេញ​លិខិត​ចំហ​មួយ​ដាក់ជូន​លោក ស ខេង រដ្ឋមន្ត្រី ក្រសួងមហាផ្ទៃ ដើម្បី​ស្នើ​អន្តរាគមន៍​ដោះស្រាយ​ផងដែរ​។ លិខិត​ចំហ​នេះ​បានស្នើ​ឱ្យមាន​ការអន្តរាគមន៍​ដោះស្រាយ​វិវាទ​ការងារ​របស់​ណាហ្គាវើលដ៍ និង​ស្នើឱ្យ​មានការ​ដោះលែង និង​ទម្លាក់​ការចោទប្រកាន់​លើ​ថ្នាក់ដឹកនាំ​សហជីព និង​សកម្មជន សហជីព​ទាំង​ ៨ រូប រួមទាំង​អ្នក​ដែល​ត្រូវបាន​ចាប់ខ្លួន​ជាបន្តបន្ទាប់​។

កាលពី​ថ្ងៃទី​ ៥ កុម្ភៈ សមត្ថកិច្ច​រាជធានី​ភ្នំពេញ​បាន​ឃាត់ខ្លួន​អតីត​បុគ្គលិក​ក្រុមហ៊ុន​នេះ​ចំនួន ២ នាក់​តាម​ដីកា​តុលាការ​ពាក់ព័ន្ធ​ករណី រារាំង​ដល់​ការអនុវត្ត​វិធានការ​ទប់ស្កាត់​ជំងឺ​កូវីដ ១៩ ​ហើយ​ជាមួយគ្នា​នោះ សហជីព​ក៏បាន​ប្រកាស​ដែរ​ថា សមាជិក​របស់ខ្លួន​ចំនួន ៤ នាក់​ផ្សេងទៀត​ក៏​ទទួលបាន​ដីកា​បញ្ជា​ឱ្យចូល​ខ្លួន​ក្រោម​ហេតុផល​រារាំង​ដល់​ការអនុវត្ត​វិធានការ​ទប់ស្កាត់​ជំងឺ​កូវីដ​ ១៩ ​ផងដែរ​៕

វីដេអូ៖