.jpg)
ពលរដ្ឋចូលរួមលេងល្បែងប្រពៃណីពេលចូលឆ្នាំនាពេលកន្លងមក។ រូបថត ភ្នំពេញប៉ុស្តិ៍
ភ្នំពេញៈ លោកនាយករដ្ឋមន្ត្រី ហ៊ុន សែន បានប្រកាសថានឹងប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរនៅឆ្នាំនេះឱ្យបាន បន្ទាប់ពីកម្ពុជាបានខកខានអស់រយៈពេល ២ ឆ្នាំហើយដោយសារការរីករាលដាលនៃមេរោគកូវីដ ១៩ ប៉ុន្តែលោកបានអំពាវនាវឱ្យប្រជាពលរដ្ឋត្រូវការពារពីការឆ្លងមេរោគនេះ និងបន្តចូលរួមចាក់វ៉ាក់សាំងបង្ការជំងឺកូវីដ ១៩ ឱ្យបានគ្រប់ៗគ្នា។
លោកបានថ្លែងដូចនេះក្នុងពិធីសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ ៧ ពីចំណុចរង្វង់មូលខ្លាស្ទុះ ក្រុងក្រចេះ ទៅភូមិរមាត ឃុំអូរគ្រៀង ស្រុកសំបូរ ខេត្តក្រចេះ នាព្រឹកថ្ងៃទី ៧ ខែកុម្ភៈ ឆ្នាំ ២០២២ ដោយលោកបានបញ្ជាក់ថា មិនត្រូវមានការធ្វេសប្រហែសដែលធ្វើឱ្យប្រទេសដើរថយក្រោយវិញឡើយ។
លោកមានប្រសាសន៍ថា៖ «ខ្ញុំសុំអំពាវនាវចំពោះប្រជាពលរដ្ឋរបស់យើងប្រឹងប្រែងដើម្បីធ្វើយ៉ាងណាកុំឱ្យដើរថយក្រោយ។ យើងខានចូលឆ្នាំខ្មែរ ២ ឆ្នាំហើយ ឥឡូវឆ្នាំនេះគឺប្តូរផ្តាច់ចូលឆ្នាំ នាំគ្នារាំលេងសប្បាយទៅ តែរាំឱ្យឃ្លាតពីគ្នាបន្តិច កុំពពាក់ពពូនគ្នា»។
ជាមួយគ្នានោះដែរ លោក ហ៊ុន សែន ក៏បានជំរុញឱ្យធ្វើការខិតខំបង្កើតមូលដ្ឋានផលិតវ៉ាក់សាំងនៅកម្ពុជា ហើយប្រសិនបើធ្វើបាននៅកម្ពុជា ពេលនោះគឺកម្ពុជាមានរបស់ក្នុងដៃហើយ បើទោះបីជាកម្ពុជានៅតែមានការបញ្ជាទិញវ៉ាក់សាំងពីរោងចក្រនៅកម្ពុជា ប៉ុន្តែវាមានមូលដ្ឋានក្នុងប្រទេសតែម្តង ដោយមិនពិបាកក្នុងការដឹកជញ្ជូនពីចម្ងាយ។ លោកសន្យាជាមួយនឹងក្រុមហ៊ុនផលិតវ៉ាក់សាំងរបស់ចិនថា ឈប់ផ្តល់វ៉ាក់សាំងជូនទៅឱ្យប្រទេសផ្សេងហើយ ខណៈដែលលោកបន្តប្រកាសចាក់វ៉ាក់សាំងកូវីដ ១៩ ជូនប្រជាពលរដ្ឋខ្មែរ និងបរទេសដោយមិនគិតថ្លៃដដែល។ ប្រទេសកម្ពុជាធ្លាប់បានផ្តល់វ៉ាក់សាំងប្រភេទស៊ីណូវ៉ាក់ទៅកាន់ប្រទេសឡាវចំនួន ៧០ ម៉ឺនដូស និងបានផ្តល់ឱ្យប្រទេសវៀតណាមចំនួន ២០ ម៉ឺនដូសនូវវ៉ាក់សាំងស៊ីណូហ្វាម។
លោកថ្លែងថា៖ «ដូចនេះ ខ្ញុំមិនផ្តល់ទៅឱ្យអ្នកណាទៀតទេ ដោយសារប្រទេសទាំងនោះមានវ៉ាក់សាំងរបស់គេហើយ។ ដូចនេះវ៉ាក់សាំងដែលយើងមានគឺសម្រាប់ប្រើតែនៅក្នុងប្រទេសប៉ុណ្ណោះ»។
លោកថា ក្នុងយុទ្ធនាការចាក់ដូសទី ៣ ឬដូសជំរុញក្នុងរយៈពេលចុងក្រោយនេះ ចំនួនវ៉ាក់សាំងនៅក្នុងឃ្លាំងបានថយចុះមកនៅសល់តែ ៨,៨ លានដូស ដូចនេះហើយបានជាលោកស្នើឱ្យខាងភាគីចិនជួយផ្តល់វ៉ាក់សាំងមកដល់កម្ពុជាបានលឿន ដែលលោកបានបញ្ជាទិញបន្ថែម ៣ លានដូស និងការសន្យាផ្តល់មកកម្ពុជាពីឯកអគ្គរដ្ឋទូតចិនប្រចាំកម្ពុជា ចំនួន ៥ លានដូសផងដែរ។
លោក ហ៊ុន សែនថា៖ «ដោយសារខ្ញុំត្រូវការមធ្យោបាយក្នុងដៃ ១ ជាក់លាក់ដើម្បីខ្ញុំធានាជាមួយនឹងពលរដ្ឋរបស់ខ្ញុំថា វ៉ាក់សាំងជាយុទ្ធសាស្ត្រនេះត្រូវបានចាក់ជូនប្រជាពលរដ្ឋដោយមានភាពសុំា ធានាកុំឱ្យមានមនុស្សស្លាប់បន្តទៀត ដោយសារកូវីដ-១៩។ នេះជារបៀបធ្វើការរបស់ខ្ញុំ»។
លោកថា រាជរដ្ឋាភិបាលនៅតែបន្តគោលនយោបាយចាក់វ៉ាក់សាំងជូនពលរដ្ឋដោយឥតគិតថ្លៃដដែល។
លោកថា៖ «បងប្អូនខ្លះបានលើកយោបល់ថា ចាក់ដូសទី ១ ទី ២ រួចហើយ អ៊ីចឹងដូសទី ៣ ឬដូសជំរុញគួរយកប្រាក់ ប៉ុន្តែខ្ញុំថា សម្រាប់ប្រជាពលរដ្ឋរបស់យើងចាក់ជូនដោយមិនគិតប្រាក់ ហើយប្រសិនបើយកប្រាក់ពីប្រជាពលរដ្ឋពីការចាក់វ៉ាក់សាំងនេះ ក៏យើងមិនអាចក្លាយជាអ្នកមានដែរ ហើយជនបរទេសនៅស្រុកខ្មែរ ក៏ចាក់មិនយកលុយដែរ»។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសនៅថ្ងៃទី ៧ ខែកុម្ភៈ ក៏បានបន្តក្រើនរំឭកទៅដល់ប្រជាពលរដ្ឋត្រូវតែរួសរាន់ទៅទទួលយកនូវការចាក់វ៉ាក់សាំងឱ្យបានគ្រប់ៗគ្នា នៅតាមទីតាំង និងមូលដ្ឋានសុខាភិបាលតែម្ដង។
លោកស្រីថា៖ «ប្រជាពលរដ្ឋត្រូវចូលរួមថែរក្សាអនាម័យឱ្យបានគ្រប់ៗគ្នា ក៏ដូចជាពាក្យស្លោក ៣ កុំ ៣ ការពារបូករួមជាមួយការចាក់វ៉ាក់សាំងឱ្យបានគ្រប់ចំនួនដូសផងដែរ»។
តំណាងអង្គការសុខភាពពិភពលោកប្រចាំកម្ពុជា លោកស្រី លី អៃឡែន បានលើកឡើងកាលពីសប្តាហ៍មុនថា វីរុសអូមីក្រុងអាចធ្វើឱ្យមនុស្សមួយចំនួនធំធ្លាក់ខ្លួនឈឺ ជាពិសេសប្រសិនបើមិនបានអនុវត្តតាមវិធានការការពារពីមេរោគកូវីដ ១៩ ឱ្យបានត្រឹមត្រូវ ឬពឹងផ្អែកតែទៅលើវ៉ាក់សាំង ដើម្បីកាត់បន្ថយការចម្លង។
លោកស្រីថា៖ «ដើម្បីចៀសវាងកុំឱ្យឆ្លងហួសខ្សែបន្ទាត់ក្រហម និងដើម្បីការពារអ្នកងាយរងគ្រោះ យើងត្រូវកាត់បន្ថយការចម្លងមិនចំពោះថាការចម្លងដោយមេរោគបំប្លែងខ្លួនថ្មីប្រភេទណានោះទេ។ ការថែទាំរហូតដល់ជាសះស្បើយនៅតាមផ្ទះ សម្រាប់អ្នកជំងឺដែលគ្មានរោគសញ្ញា ឬរោគសញ្ញាស្រាលជាផ្នែកមួយសំខាន់នៃយុទ្ធសាស្ត្រឆ្លើយតបចំពោះកូវីដ ១៩ ទាំងមូល ជាពិសេសចំពោះមេរោគកូវីដ ១៩ បំប្លែងខ្លួនថ្មីប្រភេទអូមីក្រុងបច្ចុប្បន្ន»។
ក្នុងរយៈពេលជាង ៣០ ថ្ងៃមកនេះ កម្ពុជាមិនមានអ្នកស្លាប់ដោយសារជំងឺកូវីដ ១៩ ទេ ខណៈដែលសេដ្ឋកិច្ចបើកពេញលេញ រួមទាំងការបើកនូវក្លិបកម្សាន្តនានា ប៉ុន្តែត្រូវការការពារ ហើយនិងបន្តយុទ្ធនាការនៃការចាក់វ៉ាក់សាំងដូសជំរុញ៕
វីដេអូ៖
