តាកែវៈ កម្មកររោងចក្រដេរកាបូប ហាធ័រ អ៊ីនធើណេសិនណល នៅភូមិចោមពល ឃុំពពេល ស្រុកត្រាំកក់ចំនួន ៨១ នាក់ បានដួលសន្លប់ជាបន្តបន្ទាប់ នៅថ្ងៃទី ៨ កុម្ភៈ ដែលមន្ត្រីថា ការដួលសន្លប់នេះ គឺដោយសារកត្តាអាកាសធាតុក្តៅ និងបរិយាកាសការងារមិនល្អនៅក្នុងរោងចក្រ។
អភិបាលរងខេត្តតាកែវលោក លី សាវេត ប្រាប់ភ្នំពេញប៉ុស្តិ៍ថា ក្រោយពីទទួលដំណឹងនេះ រូបលោក និងមន្ត្រីអធិការកិច្ចការងាររួមជាមួយអាជ្ញាធរមូលដ្ឋានខេត្ត និងស្រុកត្រាំកក់ ព្រមទាំងសមត្ថកិច្ចពាក់ព័ន្ធបានចុះជួយករណីកម្មករសន្លប់នេះ។ ក្នុងនោះរកឃើញមានកម្មករដួលសន្លប់ចំនួន ៨១ នាក់ដោយគិតត្រឹមម៉ោង ១២ និង ២៣ នាទី នាថ្ងៃទី ៨ ខែកុម្ភៈ ហើយកម្មករដែលដួលសន្លប់ត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែករកា។
លោកបន្តថា ក្រោយពីបានសាកសួរព័ត៌មានពីកម្មករ និយោជិត និងតាមរយៈក្រុមការងារបានចុះអង្កេតកន្លែងធ្វើការជាក់ស្តែងបានពិនិត្យឃើញថា ការដួលសន្លប់នេះដោយសារកត្តាអាកាសធាតុក្តៅ ហើយមានការគរសម្ភារ (ផលិតផលសម្រេច) នៅច្រកចេញ-ចូល ដែលបណ្តាលឱ្យមានការបាំងខ្យល់ចេញចូលអគារ និងកង្ហារមួយចំនួនតូចត្រូវបានខូច។ «នេះជាព័ត៌មានបឋមដែលបានចុះស្រាវជ្រាវដល់រោងចក្រ ហើយយើងកំពុងសាកសួរព័ត៌មាន និងការចុះអង្កេតថែមទៀត»។ ធម្មតានៅចុងខែកុម្ភៈ ឬដើមខែមីនា មន្ត្រីជំនាញចាប់ផ្តើមធ្វើអធិការកិច្ច ពីព្រោះរាល់ឆ្នាំកន្លងមក កម្មករភាគច្រើនដួលសន្លប់នៅខែមីនា មេសា និងឧសភាជាខែដែលមានអាកាសធាតុក្តៅ។ លោកឱ្យដឹងថា ក្រុមហ៊ុននេះមានកម្មករសរុប ១ ៤១៥ នាក់ ប្រុស ២០៦ នាក់ និងមានជនជាតិចិនចំនួន ៣០ នាក់ ។
បើតាមលោក លី សាវេត គណ:កម្មការទប់ស្កាត់ករណីសន្លប់ និងបង្ការគ្រោះថ្នាក់ការងាររបស់កម្មករ និយោជិត តាមសហគ្រាស គ្រឹះស្ថាន ក៏បានទៅដល់ក្រុមហ៊ុននោះប្រហែលម៉ោង ២ និង ៣០ នាទីរសៀល ដើម្បីពិនិត្យ និងផ្តល់អនុសាសន៍បន្ថែមដល់អ្នកគ្រប់គ្រងក្រុមហ៊ុន ដើម្បីអនុវត្តបន្តចៀសវាងការដួលសន្លប់បែបនេះម្តងទៀត។
ប្រធានសហភាពការងារកម្ពុជាលោក អាត់ ធន់ យល់ថា ករណីកម្មករដួលសន្លប់ជារឿងដដែលៗ ដោយសារការធ្វេសប្រហែសរបស់ម្ចាស់រោងចក្រ។ លោកជំរុញដល់ស្ថាប័នជំនាញ ពង្រឹងការចុះធ្វើអធិការកិច្ចនៅតាមរោងចក្រ សហគ្រាសឱ្យកាន់តែមានប្រសិទ្ធភាព។ លោកថា៖ «អាចមកពីមន្ត្រីអធិការកិច្ចរបស់យើងនៅធូររលុង ស្របពេលដែលក្រុមហ៊ុន និងរោងចក្រខ្លះមិនសូវគោរពច្បាប់ ទើបធ្វើឱ្យមានការធ្វេសប្រហែសបញ្ហាហានិភ័យកើតឡើង»។
លោកលើកឡើងថា ការដួលសន្លប់ជាញឹកញាប់អាចនឹងបណ្តាលឱ្យប៉ះពាល់ដល់សុខភាពកម្មករ ជាពិសេសប៉ះពាល់ដល់កេរ្តិ៍ឈ្មោះក្រុមហ៊ុន ដែលនាំឱ្យអ្នកបញ្ជាទិញមានការពិចារណា។
របាយការណ៍របស់ក្រុមការងារទប់ស្កាត់ករណីសន្លប់ និងបង្ការគ្រោះថ្នាក់ការងាររបស់កម្មករនិយោជិតតាមសហគ្រាស គ្រឹះស្ថាន (ទ.ស.ប.ក) នៃរបបសន្តិសុខសង្គមបានឱ្យដឹងថា ក្នុងឆ្នាំ ២០២១ មានកម្មករនិយោជិតសន្លប់ចំនួន ៣ រោងចក្រមានកម្មករនិយោជិតជាស្ត្រីសរុប ៣៨ នាក់ ហើយភាគច្រើននៃកម្មករនិយោជិតដួលសន្លប់ ដោយផ្តើមចេញពីកម្មករនិយោជិតសន្លប់ម្នាក់ ឬ ២ នាក់ប៉ុណ្ណោះ បន្ទាប់មកមានកម្មករនិយោជិតបានដួលសន្លប់តៗគ្នាជាបន្តបន្ទាប់ ដែលគេហៅថាជាជំងឺស្នេហ៍ហ្វូង។ ទ.ស.ប.ក បានរកឃើញមូលហេតុចម្បងៗចំនួន ៧ ចំណុចដែលបណ្តាលឱ្យមានករណីដួលសន្លប់តាមបណ្តារោងចក្រ គឺ ១- បញ្ហាគីមី ២- បញ្ហារូបសាស្ត្រ ៣- បញ្ហាជីវសាស្ត្រ ៤- បញ្ហាចិត្តសាស្ត្រសង្គម ៥- បញ្ហាមេកានិក ៦- បញ្ហាវិទ្យាសាស្ត្ររៀបចំការងារ និង ៧- បញ្ហាការងារបន្ថែមម៉ោងជាដើម។
លោក ប៉ុក វណ្ណថាត ទីប្រឹក្សាក្រសួងការងារ និងជាប្រធាន ទ.ស.ប.ក បញ្ជាក់ថា៖ «ក្នុងចំណោមបញ្ហាទាំងអស់ ដែលក្រុមការងារបានស្វែងរកឃើញខាងលើនេះ គឺបញ្ហាចិត្តសាស្ត្រសង្គម បញ្ហារូបសាស្ត្រ និងបញ្ហាជីវសាស្ត្រ មានភាគរយខ្ពស់ជាងគេ»៕
វីដេអូ៖