.jpg)
ភ្លុកដំរីដែលសមត្ថកិច្ចចាប់បានកាលពីឆ្នាំ ២០១៦។ រូបថត AFP
ភ្នំពេញៈ សាលាឧទ្ធរណ៍ភ្នំពេញនៅថ្ងៃទី ៨ កុម្ភៈបានបើកសវនាការជំនុំជម្រះក្ដីបុរសម្នាក់ក្នុងសំណុំរឿងជួញដូរភ្លុកដំរីជាង ៣ តោនពីប្រទេសអាហ្វ្រិកខាងត្បូងមកប្រទេសកម្ពុជា ហើយត្រូវបានសមត្ថកិច្ចគយកម្ពុជាឆែកឃើញនៅក្នុងទូកុងតឺន័រកាលពីថ្ងៃទី ៩ ឧសភា ឆ្នាំ ២០១៤ នៅកំពង់ផែស្វយ័តក្រុង-ខេត្ត ព្រះសីហនុ។
នៅចំពោះមុខជនជាប់ចោទម្នាក់ក្នុងបន្ទប់សវនាការសាលាឧទ្ធរណ៍ភ្នំពេញ លោកចៅក្រម សួស សំអាត ប្រធានក្រុមប្រឹក្សាជំនុំជម្រះក្នុងសមាសភាពចៅក្រម ៣ រូប និងមានលោក តាន់ សេណារ៉ុង ជាតំណាងមហាអយ្យការនោះបានអានអង្គហេតុថា កាលពីថ្ងៃទី ៩ ឧសភា ឆ្នាំ ២០១៤ សាខាគយ និងរដ្ឋាករប្រចាំខេត្តព្រះសីហនុបានស្គែនទូកុងតឺន័រមួយនៅក្នុងកំពង់ផែក្រុង-ខេត្តព្រះសីហនុ ហើយបានរកឃើញភ្លុកដីរីកប់បន្លំជាមួយគ្រាប់សណ្តែក។
លោកបន្តថា បន្ទាប់ពីសមត្ថកិច្ចគយឆែកឃើញភ្លុកដំរីចំនួន ១០៨ ដុំ ស្មើនឹង ៧៧៦ ដើមទម្ងន់ ៣ ០០៨ គីឡូក្រាមមក កម្លាំងគយបានសហការជាមួយសមត្ថកិច្ចពាក់ព័ន្ធបើកការស្រាវជ្រាវរកឃើញក្រុមហ៊ុនខ្មែរក្នុងស្រុកមួយឈ្មោះ រេហូបូសខេមបូឌាខូអិលធីឌី (Reho Both Cambodia Co,Ltd) ពាក់ព័ន្ធនឹងជំនួញភ្លុកដំរីនោះដែលមានម្ចាស់ក្រុមហ៊ុនឈ្មោះ ខាន់ ស៊ីនិត ភេទប្រុស អាយុ ៤១ ឆ្នាំ។
សំណុំរឿងនេះត្រូវបានសាលាដំបូងខេត្តព្រះសីហនុ បើកសវនាការ និងប្រកាសសាលក្រមកាលពីថ្ងៃទី ១៣ ធ្នូ ឆ្នាំ ២០១៦ ដោយសម្រេចផ្តន្ទាទោសដាក់ពន្ធនាគារ ៣ ឆ្នាំ ប៉ុន្តែតុលាការបង្គាប់ឱ្យអនុវត្តទោសក្នុងពន្ធនាគារ ១ ឆ្នាំ រីឯទោស ២ ឆ្នាំទៀតត្រូវព្យួរ និងពិន័យប្រាក់ចំនួន ៥០ លានរៀលចូលក្នុងថវិការដ្ឋ។ ប៉ុន្តែដោយមិនសុខចិត្តនឹងសាលក្រមនេះ លោក ខាន់ ស៊ីនិត បានប្តឹងជំទាស់មកកាន់សាលាឧទ្ធរណ៍ភ្នំពេញនៅថ្ងៃទី ១២ មករា ឆ្នាំ ២០១៧។
ក្នុងបន្ទប់សវនាការនៅថ្ងៃទី ៨ កុម្ភៈ លោក ខាន់ ស៊ីនិត បានឆ្លើយប្រាប់ចៅក្រមថា លោកមានក្រុមហ៊ុនមួយឈ្មោះ Reho Both Cambodia ហើយបម្រើសេវាទទួលបញ្ញើទំនិញ។ ទន្ទឹមនឹងនេះក៏មានក្រុមហ៊ុនមួយនាំចូលទូរស័ព្ទពីក្រៅប្រទេស ហើយក៏ជាដៃគូជាមួយក្រុមហ៊ុនលោកដែរ។ តាមរយៈការងារនេះ ក្រុមហ៊ុនមួយនោះបានពឹងលោកឱ្យចុះហត្ថលេខាលើលិខិតសម្រាប់នាំទំនិញ (លិខិតរត់ការគយ) ហើយពេលខ្លះលោកបានចុះហត្ថលេខា និងបោះត្រាទុកឈ្មោះក្រុមហ៊ុនរបស់លោកទុកចោលសម្រាប់ឱ្យក្រុមហ៊ុននោះប្រើប្រាស់ផង។ ការធ្វើបែបនេះក៏ដោយមានការជឿទុកចិត្តគ្នាក្នុងនាមជាអ្នករកស៊ីជាមួយគ្នា។
លោកបានបញ្ជាក់ថា៖ «ប៉ុន្តែមិនដឹងជាយ៉ាងម៉េច ស្រាប់តែខ្ញុំឃើញនៅលើលិខិតចូលទៅយកទំនិញភ្លុកដំរីនោះមានឈ្មោះក្រុមហ៊ុនរបស់ខ្ញុំទៅវិញ។ បែបនេះហើយទើបខ្ញុំមិនសុខចិត្ត ហើយប្តឹងមកសាលាឧទ្ធរណ៍ភ្នំពេញ។ ខ្ញុំសូមចៅក្រមលើកលែងបទចោទនេះដល់ខ្ញុំផង»។
លោក តាន់ សេណារ៉ុង តំណាងមហាអយ្យការសន្និដ្ឋានក្នុងបន្ទប់សវនាការនៅថ្ងៃទី ៨ ខែកុម្ភៈថា តាមរយៈចម្លើយរបស់ជនជាប់ចោទឆ្លើយបំភ្លឺក្នុងសវនាការពេលនេះនៅមិនទាន់មានលក្ខណៈគ្រប់គ្រាន់តាមផ្លូវច្បាប់ទេ។
ហេតុដូច្នេះលោកស្នើសុំដល់ជនជាប់ចោទបំភ្លឺជាលាយលក្ខណ៍អក្សរដាក់ជូនលោកចៅក្រមប្រធានក្រុមប្រឹក្សាជំនុំជម្រះសាលាឧទ្ធរណ៍ភ្នំពេញ ដើម្បីសិក្សាឱ្យបានល្អិតល្អន់លើសំណុំរឿងនេះ។
លោកបានថ្លែងថា៖ «សំណុំរឿងនេះ តុលាការខេត្តព្រះសីហនុបានផ្តន្ទាទោសជនជាប់ចោទ ៣ ឆ្នាំ ហើយឱ្យអនុវត្តទោសក្នុងពន្ធនាគារ ១ ឆ្នាំ និងព្យួរ ២ ឆ្នាំ។ បើគាត់គ្មានឯកសារអ្វីបំភ្លឺបន្ថែមទេខ្ញុំសូមតម្កល់សាលក្រមរបស់តុលាការខេត្តព្រះសីហនុនៅដដែល»។
ក្រោយជំនុំជម្រះជិត ១ ម៉ោងមក លោកចៅក្រម សួស សំអាត ប្រធានក្រុមប្រឹក្សាជំនុំជម្រះថ្លែងថា សាលដីកានៃសំណុំរឿងនេះនឹងប្រកាសនៅថ្ងៃទី ២៨ ខែកុម្ភៈ ឆ្នាំ ២០២២៕
វីដេអូ៖
