ភ្នំពេញៈ ស្នងការនគរបាលរាជធានីភ្នំពេញ កាលពីម្សិលមិញបានបញ្ជូនខ្លួនអតីតបុគ្គលិកក្រុមហ៊ុនណាហ្គាវើលដ៍ចំនួន ៣ នាក់ទៅតុលាការ ក្រោយពីបានឃាត់ខ្លួនតាមដីកាបញ្ជាឱ្យចូលខ្លួនរបស់ព្រះរាជអាជ្ញានៃអយ្យការអមសាលាដំបូងរាជធានី-ភ្នំពេញពាក់ព័ន្ធករណីរារាំងដល់ការអនុវត្តវិធានការទប់ស្កាត់ជំងឺកូវីដ ១៩ ខណៈសមត្ថកិច្ចប្រកាសតាមចាប់ខ្លួន ៤ នាក់បន្ថែមទៀត។
អតីតបុគ្គលិកក្រុមហ៊ុនណាហ្គាវើលដ៍ចំនួន ៣ នាក់ត្រូវបានសមត្ថកិច្ចចាប់ឃាត់ខ្លួនជាបន្តបន្ទាប់កាលពីថ្ងៃទី ៥ កុម្ភៈ បន្ទាប់ពីចាកចេញពីកន្លែងធ្វើតេស្តយកសំណាកកូវីដ ១៩ នៅកោះពេជ្រ ដែលការឃាត់ខ្លួននេះគឺធ្វើឡើងតាមដីកាបញ្ជាឱ្យចូលខ្លួនរបស់ព្រះរាជអាជ្ញាសាលាដំបូងរាជធានីពាក់ព័ន្ធករណីរារាំងដល់ការអនុវត្តវិធានការទប់ស្កាត់ជំងឺកូវីដ ១៩ ដោយយោងលើមាត្រា ១១ នៃច្បាប់ប្រយុទ្ធប្រឆាំងកូវីដ។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ ប្រាប់ភ្នំពេញ-ប៉ុស្តិ៍នៅថ្ងៃទី ៨ កុម្ភៈថា ក្រោយធ្វើការឃាត់ខ្លួនពួកគេជាបន្តបន្ទាប់ ដើម្បីសាកសួរតាមនីតិវិធីច្បាប់ ស្នងការនគរបាលរាជធានីបានសម្រេចបញ្ជូនពួកគេទាំងនោះទៅតុលាការនៅថ្ងៃទី ៨ កុម្ភៈ។ លោកថា៖ «៣ នាក់នេះ គឺមានឈ្មោះ ជួប ចាន់ណាត ឈ្មោះ សេង វណ្ណារិទ្ធ និងឈ្មោះ សៅ សម្បត្តិ»។
ជាមួយគ្នានេះ លោក សាន សុខសីហា ក៏បានឱ្យដឹងទៀតថា សមត្ថកិច្ចកំពុងបន្តស្វែងរក និងតាមចាប់ខ្លួនអតីតបុគ្គលិកក្រុមហ៊ុននេះចំនួន ៤ នាក់បន្ថែមទៀត ដែលមានឈ្មោះ អ៊ុក សុភ័ក្រម៉ូលីកា, អេង ស្រីបូ, ម៉េង កាន់នីកា និងឈ្មោះ ម៉េង ចន្តា បន្ទាប់ពីបានទទួលដីកាបញ្ជារបស់ព្រះរាជអាជ្ញារងលោក សេង ហៀង ពាក់ព័ន្ធនឹងបទល្មើសដូចគ្នា។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីថ្លែងនៅថ្ងៃទី ៨ កុម្ភៈថា លោកមិនទាន់ទទួលបានព័ត៌មាននេះនៅឡើយទេ។
ជាមួយគ្នានេះ អតីតបុគ្គលិកដែលត្រូវបានសមត្ថកិច្ចប្រកាសតាមចាប់ខ្លួនទាំង ៤ នាក់បានសរសេរនៅលើទំព័រហ្វេសប៊ុករបស់ខ្លួនថា ពួកគេមិនបានគេចវេះពីការចូលខ្លួននៅចំពោះមុខតុលាការនោះទេ ហើយក៏ប្រកាសចូលខ្លួនតាមដីកាកោះក្រោយធ្វើចត្តាឡីស័ករួចរាល់តាមវិធានសុខាភិបាល។
អ្នកនាង អេង ស្រីបូ ជាអតីតបុគ្គលិកម្នាក់ក្នុងចំណោម ៤ នាក់ ដែលមានឈ្មោះក្នុងដីកាកោះបានលើកឡើងថា ពួកគេក្នុងពេលនេះគឺកំពុងបន្តធ្វើចត្តាឡីស័កតាមការណែនាំរបស់ក្រសួងសុខាភិបាលបន្ទាប់ពីទទួលបានលទ្ធផលអវិជ្ជមាន ដោយមិនមានចេតនាគេចវេះដូចការចោទប្រកាន់នោះឡើយ។
អ្នកនាងបញ្ជាក់ថា៖ «ក្នុងការចុះផ្សាយពីបណ្តាសារព័ត៌មាន និងទូរទស្សន៍មកលើការស្វែងរកចាប់ខ្លួន ហើយខ្ញុំផ្ទាល់នឹងទំនាក់ទំនងទៅចូលខ្លួនស្រាយបំភ្លឺនៅតុលាការ។ ខ្ញុំសូមបញ្ជាក់ដែរថា តាំងពីថ្ងៃទី ៣ ខែ ១ រហូតដល់ថ្ងៃទី ៦ ខែ ២ ខ្ញុំមិនបានចូលរួមធ្វើកូដកម្មទេ ដោយសារមានធុរៈផ្ទាល់ខ្លួន។ ខ្ញុំបានធ្វើតេស្តរហ័សដោយលទ្ធផលអវិជ្ជមានហើយខ្ញុំជាប់ធ្វើចត្តាឡីស័កតាមក្រសួង។ ខ្ញុំនឹងកាន់ដីការបស់ព្រះរាជអាជ្ញាចូលខ្លួនទៅតាមការកំណត់»។
នៅថ្ងៃទី ៨ កុម្ភៈ សហជីពទ្រទ្រង់សិទ្ធិការងារបុគ្គលិកកម្មករ-ខ្មែរនៃក្រុមហ៊ុនណាហ្គាវើលដ៍ ក៏ប្រកាសដែរថា ក្រុមគ្រូពេទ្យជំនាញបានណែនាំចំពោះអ្នកដែល «អវិជ្ជមាន» ត្រូវធ្វើចត្តាឡីស័កចំនួន ៧ ថ្ងៃ និង ៣ ថ្ងៃទៀតក្នុងការរង់ចាំលទ្ធផលពីម៉ាស៊ីន PCR សរុបគឺមានរយៈពេល ១០ ថ្ងៃ។ សហជីពនេះបញ្ជាក់ថា ក្រោយពេលបញ្ចប់ធ្វើចត្តាឡីស័ក អតីតកម្មករទាំងអស់នឹងបន្តធ្វើការតវ៉ាបន្តទៀត ដើម្បីឱ្យមានការដោះលែងតំណាងរបស់ខ្លួន និងឱ្យក្រុមហ៊ុនទទួលកម្មករចូលធ្វើការវិញ។
ការចោទប្រកាន់ និងការឃាត់ខ្លួនអតីតបុគ្គលិកក្រុមហ៊ុនណាហ្គាវើលដ៍ទាំងនេះធ្វើឡើងក្រោយពីគណៈកម្មការ ប្រយុទ្ធនឹងជំងឺកូវីដ ១៩ ថ្នាក់រាជធានីបញ្ជាឱ្យពួកគេបញ្ឈប់ជាបន្ទាន់នូវការប្រមូលផ្ដុំធ្វើបាតុកម្ម ហើយតម្រូវឱ្យពួកគេមកធ្វើសំណាករកវីរុសកូវីដ ១៩ ក្រោយពីប្រកាសរកឃើញករណីវិជ្ជមានកូវីដ ១៩ ប្រភេទអូមីក្រុង ១ ករណីលើអតីតបុគ្គលិកក្រុមហ៊ុននេះ ដែលជាស្ត្រីមានផ្ទៃពោះ។
គិតត្រឹមថ្ងៃទី ៧ កុម្ភៈ ក្រុមគ្រូពេទ្យមន្ទីរសុខាភិបាលរាជធានី-ភ្នំពេញ សហការជាមួយក្រុមគ្រូពេទ្យស្ម័គ្រចិត្ត TYDA បានរកឃើញករណីវិជ្ជមានថ្មីរហូតដល់ទៅ ៤១ នាក់ក្នុងចំណោមអតីតបុគ្គលិកក្រុមហ៊ុនណាហ្គាវើលដ៍ចំនួន ៥៤៦ នាក់ដែលបានទៅធ្វើតេស្ត។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានអំពាវនាវដល់ក្រុមបាតុករទាំងអស់ និងអ្នកពាក់ព័ន្ធឱ្យគោរពនូវវិធានការសុខាភិបាល និងចូលរួមយកសំណាកឱ្យបានទាន់ពេលវេលា ចៀសវាងជំងឺកូវីដ ១៩ ឆ្លងរាលដាលចេញពីការដែលមិនស្ដាប់តាមការណែនាំ ដែលប្រឈមនឹងការអនុវត្តតាមផ្លូវច្បាប់ជាធរមាន។
ក្នុងបទសម្ភាសជាមួយអ្នកសារព័ត៌មានពេលចុះពិនិត្យដំណើរការចាក់វ៉ាក់សាំងបង្ការជំងឺកូវីដ ១៩ នៅខេត្តត្បូងឃ្មុំកាលពីថ្ងៃទី ៧ ខែកុម្ភៈ លោកស្រី វណ្ណឌីន បញ្ជាក់ថា៖ «ជំងឺកូវីដ ១៩ ឆ្លងមិនមានព្រំដែនកំណត់ទេ ដោយមិនរើសក្រុម ឬបក្ខពួកនោះទេ ពោលឆ្លងគ្រប់ស្រទាប់វណ្ណៈទាំងអស់។ ខ្ញុំសុំថា មិនត្រូវប្រើប្រាស់បញ្ហាចម្លងកូវីដនេះ សម្រាប់ជាប្រយោជន៍ក្រុមរបស់ខ្លួន ឬសម្រាប់នយោបាយរបស់ខ្លួននោះទេ ព្រោះបញ្ហានេះ គឺប៉ះពាល់ដល់អាយុជីវិត»៕
វីដេអូ៖