.jpg)
គ្រាប់យុទ្ធភណ្ឌមិនទាន់ផ្ទុះ ត្រូវបានមន្ត្រីជំនាញស៊ីម៉ាក់រកឃើញ នាពេលកន្លងទៅ។ រូបថត ហ្វេសប៊ុក
កំពង់ស្ពឺៈ គ្រាប់យុទ្ធភណ្ឌចម្រុះចំនួន ៤ ៤៤៩ គ្រាប់ត្រូវបានមន្ត្រីអង្គភាពស៊ីម៉ាក់ធ្វើការកម្ទេចចោលនៅថ្ងៃទី ៨ កុម្ភៈ បន្ទាប់ពីពលរដ្ឋកាយដីប្រទះឃើញ និងមានការចុះមករាវរកជាបន្តបន្ទាប់ពីមន្ត្រីជំនាញស៊ីម៉ាក់អស់រយៈពេលជាច្រើនថ្ងៃកន្លងមកនៅភូមិឈើទាលជ្រុំ ឃុំត្រពាំងជោរ ស្រុកឱរ៉ាល់។
លោក ម៉ម អាន អធិការរងស្រុកឱរ៉ាល់ឱ្យដឹងថា អាវុធយុទ្ធភណ្ឌចម្រុះចំនួន ៤ ៤៤៩ គ្រាប់ដែលពលរដ្ឋប្រទះឃើញនោះត្រូវបានមន្ត្រីអង្គភាពកម្ចាត់គ្រាប់មីនស៊ីម៉ាក់ធ្វើការកម្ទេចចោលហើយនៅថ្ងៃទី ៨ កុម្ភៈ ហើយក៏ទទួលបានសុវត្ថិភាព និងមិនរំខានដល់ពលរដ្ឋឡើយ។ «គ្រាប់ទាំងនោះមានមួយចំនួននៅមានគុណភាពអាចផ្ទុះបង្កគ្រោះថ្នាក់ដល់មនុស្សបាន»។
លោកបន្តថា នៅតំបន់ក្នុងស្រុកឱរ៉ាល់កាលពីមុន គឺជាតំបន់ទាហានខ្មែរក្រហមឆ្លងកាត់ និងតំបន់ខ្លះជាបន្ទាយបណ្តោះអាសន្នរបស់ខ្មែរក្រហម។ ហេតុដូច្នេះហើយបានជាមានគ្រាប់នៅសេសសល់ខ្លះកប់ក្នុងដី។
លោក នៅ ណន នាយប៉ុស្តិ៍នគរបាល ឃុំត្រពាំងជោរ ឱ្យដឹងនៅថ្ងៃទី ៨ កុម្ភៈថា ចំពោះគ្រាប់ទាំងនោះមានគ្រាប់ AK57 ចំនួន ១០ កេះ ស្មើនឹង ៤ ៤០០ គ្រាប់គ្រាប់ DK82 ចំនួន ១៩ គ្រាប់ និងគ្រាប់ឡង់ចំនួន ៣០ គ្រាប់។ គ្រាប់ DK57 និងគ្រាប់ DK82 នេះគឺជាប្រភេទគ្រាប់កាំភ្លើងដែលទាហានប្រើសម្រាប់បាញ់បុកដែលអាចបាញ់រថយន្ត ឬរថក្រោះបានដូចគ្នា។
បើតាមលោកនៅ ណន កាលពីថ្ងៃទី ២៣ មករា បុរសជាកសិករម្នាក់បានកាយដីនៅក្នុងបរិវេណដីឡូត៍ជាលក្ខណៈដីលំនៅឋានរបស់គាត់ ហើយក៏ប្រទះឃើញកេះគ្រាប់កាំភ្លើង AK57 ចំនួន ១០ កេះ។ ក្រោយពីប្រទះឃើញគ្រាប់មក កសិកររូបនោះបានរាយការណ៍ប្រាប់នគរបាលប៉ុស្តិ៍របស់លោក ហើយលោកបានរាយការណ៍បន្តទៅលោក ប៊ុត ប៊ុនធឿន អធិការនគរបាលស្រុកឱរ៉ាល់ដើម្បីចុះស្រាវជ្រាវ។ បន្ទាប់ពីកម្លាំងនគរបាលស្រុកឱរ៉ាល់ចុះពិនិត្យមកក៏រាយការណ៍ទៅអង្គភាពស៊ីម៉ាក់ប្រចាំខេត្តកំពង់ស្ពឺហើយមន្ត្រីស៊ីម៉ាក់បានចុះរាវរកឃើញជាបន្តបន្ទាប់ពីថ្ងៃទី ១៩ មករា ដល់ ២៣ មករា និងថ្ងៃទី ៧ កុម្ភៈ។ «យើងតែងតែអប់រំផ្សព្វផ្សាយនៅតាមភូមិក្នុងឃុំរបស់យើងដល់ពលរដ្ឋអំពីគ្រោះថ្នាក់ដោយសារគ្រាប់មីន។ បញ្ហានេះបន្ទាប់ពីមានការផ្សព្វផ្សាយជាហូរហែមក ពលរដ្ឋក៏មិនឃើញជួបប្រទះគ្រោះថ្នាក់ដោយសំណល់គ្រាប់ដែរ»៕
