.jpg)
បុរសម្នាក់កំពុងបើកម៉ូតូកាត់ភ្លៀងកន្លងមក។ រូបថត ក្រសួងធនធានទឹក
ភ្នំពេញៈ ក្រសួងធនធានទឹក និងឧតុនិយមបានជូនដំណឹងថា ចាប់ពីថ្ងៃទី ៩ ដល់ថ្ងៃទី ១៥ ខែកុម្ភៈ បណ្ដាខេត្តមួយចំនួនក្នុងតំបន់វាលទំនាបកណ្ដាល និងតំបន់ជួរភ្នំក្រវាញ នឹងមានភ្លៀងធ្លាក់ពីតិចទៅច្រើន ខណៈនៅតំបន់មាត់សមុទ្រ អាកាសធាតុមានលក្ខណៈល្អប្រសើរជាងតំបន់នានាក្នុងប្រទេសកម្ពុជា។
បើតាមសេចក្តីជូនដំណឹងក្នុងអំឡុងពេលនេះ ជ្រលងសម្ពាធទាបពីប្រទេសឥណ្ឌូនេស៊ីនឹងបង្កើនឥទ្ធិពលពីខ្សោយទៅមធ្យមមកលើប្រទេសកម្ពុជា ខណៈឥទ្ធិពលនៃទ្រនុងសម្ពាធខ្ពស់ពីប្រទេសចិននៅមិនទាន់អស់ឥទ្ធិពលនៅឡើយ។ តាមការពិនិត្យអង្កេតឥទ្ធិពលទាំង ២ នេះអាចបង្កើតបានជាចំណុចប្រសព្វនៃធាតុក្ដៅ និងធាតុត្រជាក់ដែលនឹងបណ្ដាលឱ្យមានភ្លៀងធ្លាក់ដោយអន្លើ ។
ផ្អែកតាមស្ថានភាពខាងលើក្រុមមន្ត្រីជំនាញផ្នែកឧតុនិយមនៃក្រសួងធនធានទឹក និងឧតុនិយមព្យាករថា៖ «បណ្តារាជធានី-ខេត្តនៅតំបន់វាលទំនាបកណ្ដាលតំបន់ជួរភ្នំក្រវាញ និងតំបន់មាត់សមុទ្រនឹងមានភ្លៀងធ្លាក់ដោយអន្លើក្នុងកម្រិតពីតិចទៅច្រើន ខណៈបណ្តាខេត្តជាប់ជួរភ្នំដងរែក និងខ្ពង់រាបឦសាននឹងមានភ្លៀងធ្លាក់ដោយអន្លើក្នុងកម្រិតពីតិចទៅមធ្យម»។
តាមរយៈការព្យាករនោះ មន្ត្រីជំនាញផ្នែកឧតុនិយមក៏បានបញ្ជាក់អំពីស្ថានភាពអាកាសធាតុផងដែរថា ក្នុងអំឡុងពេលនេះ បណ្ដារាជធានី-ខេត្តក្នុងតំបន់វាលទំនាបកណ្ដាល តំបន់ជួរភ្នំក្រវាញ ដងរែក និងខ្ពង់រាបឦសានមានសីតុណ្ហភាពអប្បបរមាពី ២៣ ទៅ ២៦ អង្សាសេ និង សីតុណ្ហភាពអតិបរមាពី ៣៣ ទៅ ៣៦ អង្សាសេ។ ចំណែកបណ្តាខេត្តជាប់មាត់សមុទ្រមានសីតុណ្ហភាពអប្បបរមាមានពី ២២ ទៅ ២៥ អង្សាសេ និងសីតុណ្ហភាពអតិបរមាមានពី ២៧ ទៅ ៣០ អង្សាសេគឺមានភាពល្អជាងបណ្ដាខេត្តក្នុងតំបន់វាលទំនាប តំបន់ភ្នំ និងតំបន់ខ្ពង់រាប៕
