ភ្នំពេញៈ ប្រធាននាយកដ្ឋានបង្ការពន្លត់អគ្គិភ័យ និងសង្គ្រោះនៃក្រសួងមហាផ្ទៃ លោក នេត វន្ថា នៅថ្ងៃទី ០៧ ខែកុម្ភៈ ឆ្នាំ ២០២២ បានអំពាវនាវជាថ្មីម្ដងទៀតដល់ប្រជាពលរដ្ឋនៅតាមមូលដ្ឋាន និងម្ចាស់អាជីវកម្ម រោងចក្រ សហគ្រាស និងក្លិបកម្សាន្តនានានៅទូទាំងប្រទេសបង្កើនការយកចិត្តទុកដាក់អំពីបញ្ហាគ្រោះអគ្គិភ័យ។
ការអំពាវនាវនេះបានធ្វើឡើង បន្ទាប់ពីមានគ្រោះអគ្គិភ័យចំនួន ៦ ករណីបានកើតឡើងផ្ទួនៗគ្នាកាលពីចុងសប្ដាហ៍មុន នៅក្នុងរាជធានី ខេត្តចំនួន ៥ រួមមាន រាជធានីភ្នំពេញ ខេត្តបាត់ដំបង កំពង់ឆ្នាំង តាកែវ និងខេត្តកំពត ដោយបានបង្កឱ្យមនុស្ស ៥ នាក់រងរបួសធ្ងន់ និងស្រាល ព្រមទាំង ឆេះខូចខាតផ្ទះ រោងចក្រ ទូកទេសចរណ៍ និងទ្រព្យសម្បត្តិមួយចំនួនទៀត។
លោកថ្លែងថា៖ «អគ្គិភ័យនៅតែជាបញ្ហាប្រឈមដ៏ធំបំផុតមួយ ដែលមិនគ្រាន់តែប៉ះពាល់ដល់សេដ្ឋកិច្ចគ្រួសារ សហគមន៍ និងសង្គមជាតិប៉ុណ្ណោះទេ ថែមទាំងបង្កគ្រោះថ្នាក់ដល់អាយុជីវិតមនុស្សផងដែរ»។
លោក វន្ថា បានថ្លែងថា ករណីគ្រោះអគ្គិភ័យនៅរាជធានីភ្នំពេញកាលពីថ្ងៃទី ៥ ខែកុម្ភៈ នៅចំណុចផ្ទះល្វែងមួយក្នុងសង្កាត់ផ្សារដើមគ ខណ្ឌទួលគោក រាជធានីភ្នំពេញបានបង្កឱ្យមានជនរងគ្រោះ ៥ នាក់រងរបួសធ្ងន់ និងស្រាល និង ខូចខាតផ្ទះអស់ ១ ល្វែង ព្រមទាំងទ្រព្យសម្បតិ្តជាច្រើនទៀត ដែលករណីនេះ បណ្ដាលមកពីការផ្ទុះឆ្លងចរន្តអគ្គិសនី។
នៅថ្ងៃដដែលនេះ នៅឯភូមិ-ឃុំតាស្ដា ស្រុកសំពៅលូន ខេត្តបាត់ដំបងវិញក៏មានករណីគ្រោះអគ្គិភ័យឆេះផ្ទះប្រជាពលរដ្ឋអស់ ៣ ខ្នង និងខូចខាតសម្ភារមួយចំនួនផងដែរ។
លោកបានបន្តថា កាលពីថ្ងៃទី ៦ ខែកុម្ភៈ មានករណីគ្រោះអគ្គិភ័យកើតឡើងផ្ទួនៗគ្នានៅក្នុងខេត្តចំនួន ៣ គឺ ខេត្តតាកែវ កំពង់ឆ្នាំង និង កំពត។ ក្នុងនោះករណីនៅខេត្តតាកែវបានកើតឡើងវេលាម៉ោង ៤:៣០ នាទីរសៀលនៅរោងចក្រកែច្នៃប្រេងម៉ាស៊ីនពីសម្បកកង់ចាស់ៗ ដែលមានទីតាំងស្ថិតនៅខាងត្បូងផ្សារត្រាំខ្នា ស្ថិតក្នុងភូមិត្រពាំងឈូក ឃុំសូភី ស្រុកបាទី ខាងកើតផ្លូវជាតិលេខ ៣ ដោយបានបង្កការខូចខាត ស៊ីទែនសម្រាប់ផ្ទុកប្រេងម៉ាស៊ីន ចំនួន ២ ហើយករណីនេះ បណ្ដាលមកពី «កំហុសបច្ចេកទេស» នៃការរៀបចំដំឡើងឡ ឬ ម៉ាស៊ីនចម្រាញ់ប្រេងម៉ាស៊ីនពីការដុតសម្បកកង់ឡានចាស់ៗនោះ មិនបានត្រឹមត្រូវតាមមាត្រដ្ឋានបច្ចេកទេស។
បើតាមលោក វន្ថា ក្នុងខណៈពេលដូចគ្នានោះនៅខេត្តកំពង់ឆ្នាំងក៏មានគ្រោះអគ្គិភ័យកើតឡើងផងដែរ នៅចំណុចភូមិកំពង់បាស្រូវ ឃុំជលសា ស្រុកជលគិរី ខេត្តកំពង់ឆ្នាំង ដែលបានបង្កឱ្យមានការឆេះខូចខាតផ្ទះប្រជាពលរដ្ឋចំនួន ៦ ខ្នង។ គ្រោះអគ្គិភ័យនោះបណ្ដាលមកពីករណី «ផ្ទុះកំប៉ុងហ្គាសតូច» ក្នុងពេលដាំស្ល។ ចំណែកករណីនៅឯខេត្តកំពតវិញ គឺបានកើតឡើងនៅវេលាម៉ោង ៨:៤០នាទីយប់ មានករណីឆេះទូកទេសចរណ៍១គ្រឿង ឈ្មោះ វីបូឡា ដែលកំពុងចតនៅក្បែរផែទូកមួយនៅស្ថិតនៅភូមិទ្វីខាងត្បូង សង្កាត់អណ្តូងខ្មែរ ក្រុងកំពត បណ្ដាលឱ្យខូចខាតយ៉ាងដំណំ។ ករណីនេះត្រូវបានរកឃើញ បណ្ដាលមកពីការ «ផ្ទុះឆ្លងចរន្តអគ្គិសនីពីម៉ាស៊ីន» ទៅកន្លែងទីធ្លាខាងលើទូក សម្រាប់ភ្ញៀវជិះកម្សាន្ត ប៉ុន្តែសំណាងល្អគ្មានភ្ញៀវទេសចរនៅលើទូក។ កាលពីថ្ងៃទី ៧ ខែកុម្ភៈ លោក ពៅ ចាន់ធឿន អាយុ ៣៧ ឆ្នាំ ដែលជាម្ចាស់ទូកទេសចរណ៍បានប្រាប់ភ្នំពេញប៉ុស្តិ៍ ដោយទទួលស្គាល់ថា ភាពខ្វះចន្លោះនៃការត្រួតពិនិត្យ ខ្សែបណ្ដាញអគ្គិសនីនៅលើទូក និងពីម៉ាស៊ីនទូកនាំឱ្យមានការខាតបង់ទ្រព្យសម្បត្តិ ដែលខំរកអស់រយៈពេលជាច្រើនឆ្នាំមកនេះ។
លោកបានថ្លែងថា៖ «ខ្ញុំបានប្រឹងប្រែងតាំងពីនៅជាកម្មករទូករហូតដល់សន្សំប្រាក់ទិញទូកបើកមុខរបរដោយខ្លួនឯង ប៉ុន្តែគ្រោះអគ្គិភ័យតែមួយប៉ប្រិចភ្នែក ដែលកើតចេញពីភាពខ្វះខាតក្នុងការត្រួតពិនិត្យខ្សែបណ្ដាញអគ្គិសនីបានធ្វើឱ្យខ្ញុំខាតបង់ប្រាក់ជិត ២ ម៉ឺនដុល្លារ»។
យ៉ាងណាក៏ដោយលោកបានសម្ដែងការដឹងគុណដល់អាជ្ញាធរមូលដ្ឋានក៏ដូចជា កងកម្លាំងនគរបាលពន្លត់អគ្គិភ័យ ដែលបានជួយអន្តរាគមន៍សង្គ្រោះទូកទេសចរណ៍របស់គាត់ ពីគ្រោះអគ្គិភ័យនោះគឺខូចខាតប្រមាណត្រឹមតែ ៤០ ភាគរយប៉ុណ្ណោះ៕