កំពតៈ នគរបាលព្រហ្មទណ្ឌខេត្តកំពត បញ្ជូនបុរសសង្ស័យម្នាក់ទៅសាលាដំបូងខេត្តនៅថ្ងៃទី ៩ កុម្ភៈ បន្ទាប់ពីចាប់ខ្លួនបាន ១ ថ្ងៃ ក្នុងសំណុំរឿងប្លន់ហើយរំលោភសេពសន្ថវៈកាលពីឆ្នាំ ២០២១ នៅ ក្នុងភូមិប្រភ្នំ ឃុំប្រភ្នំ ស្រុកអង្គរជ័យ ខេត្តកំពត។
លោក លក ញ៉ាវ ស្នងការរងទទួលផែនការងារនគរបាលព្រហ្មទណ្ឌ ខេត្ត កំពតប្រាប់ភ្នំពេញប៉ុស្តិ៍នៅថ្ងៃទី៩ កុម្ភៈថា ជនសង្ស័យឈ្មោះ អ៊ឹង កប ភេទ ប្រុស អាយុ ២៨ឆ្នាំ រស់នៅភូមិ-ឃុំ ព្រែកកើស ស្រុក កំពង់ត្រាច ខេត្ត កំពត។ ជនសង្ស័យត្រូវបាននគរបាលព្រហ្មទណ្ឌ នៃស្នងការដ្ឋាននគរបាល ខេត្ត កំពង់ស្ពឺ សហការជាមួយនាយកដ្ឋានក្រសួងមហាផ្ទៃឃាត់ខ្លួនបានកាលពីថ្ងៃទី៨កុម្ភៈ នៅក្រុងច្បារមន ខេត្ត កំពង់ស្ពឺ។
លោកថ្លែងថា៖«ការងារនេះយើងបានសុំកិច្ចសហការជាមួយកម្លាំងជំនាញខេត្តកំពង់ស្ពឺ និងពីកម្លាំងនាយកដ្ឋានព្រហ្មទណ្ឌក្រសួងមហាផ្ទៃ។ ជនសង្ស័យយើងបានកសាងសំណុំរឿងបញ្ជូនទៅតុលាការខេត្តកំពតនៅថ្ងៃនេះហើយ(ថ្ងៃទី៩កុម្ភៈ)។ គាត់ជាប់បទលួចមានស្ថានទម្ងន់ទោស និងបទរំលោភសេពសន្ថវៈ»។
លោករំឭកប្រាប់ថា កាលពីថ្ងៃទី១៨ តុលា ឆ្នាំ ២០២១ ជនសង្ស័យបានចូលប្លន់នៅផ្ទះជនរងគ្រោះម្នាក់ក្នុងភូមិ ប្រភ្នំ ឃុំ ប្រភ្នំ ស្រុក អង្គរជ័យ ខេត្ត កំពត។ ក្នុងអំពើប្លន់នោះជនសង្ស័យយកបានលុយខ្មែរមួយចំនួនមិនតែប៉ុណ្ណោះជនសង្ស័យបានធ្វើសកម្មភាពចាប់រំលោភលើក្មេងស្រីឈ្មោះម.ស អាយុ ១៣ឆ្នាំ និងបងបង្កើតរបស់នាងឈ្មោះម.ណ អាយុ១៧ឆ្នាំហើយរត់គេចខ្លួនបាត់ចាប់តាំងពីថ្ងៃនោះមក។
លោកស្នងការង ថ្លែងថា ក្រោយពីជនសង្ស័យរត់គេចខ្លួនមកត្រូវបានលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាល ខេត្ត កំពត កសាងសំណុំរឿងបញ្ជូនទៅសាលាដំបូងខេត្តកំពតហើយលោកលាង សំណាត់ ចៅក្រមស៊ើបសួរ និងជាប្រធានសាលាដំបូង ខេត្តកំពតបានចេញដីកានៅថ្ងៃទី២៣ វិច្ឆិកា ឆ្នាំ២០២១ដើម្បីតាមចាប់ខ្លួនជនសង្ស័យឈ្មោះ អ៊ឹង កប ម្នាក់នេះ។
លោកបន្តទៀតថា បន្ទាប់មានចំណាត់ការពីតុលាការមកត្រូវបានលោក ឧត្តមសេនីយ៍ទោ ស្នងការ ម៉ៅ ច័ន្ទមធុរិទ្ធ ដាក់បញ្ជាដល់សមត្ថកិច្ចជំនាញព្រហ្មទណ្ឌរបស់លោក។ ដោយមានការសហការជាមួយស្នងការដ្ឋាននគរបាលខេត្តកំពង់ស្ពឺ និងដោយមានកិច្ចសុំសហការជាមួយនាយកដ្ឋានព្រហ្មទណ្ឌអគ្គស្នងការដ្ឋាននគរបាលជាតិធ្វើការស្រាវជ្រាវយ៉ាងសកម្មរហូតឈានទៅចាប់ខ្លួនជនសង្ស័យបានកាលពីថ្ងៃទី៨ កុម្ភៈ ឆ្នាំ២០២២នៅខេត្តកំពង់ស្ពឺ។
ពាក់ព័ន្ធនឹងការឃុំខ្លួនយ៉ាងណានោះ ភ្នំពេញ ប៉ុស្តិ៍ បានទូរស័ព្ទទាក់ទងលោក ម៉ាន់ បូរេត អ្នកនាំពាក្យតុលាការខេត្ត កំពត នៅល្ងាចថ្ងៃទី៩កុម្ភៈ តែទូរស័ព្ទរបស់លោកមិនអាចទាក់ទងបាន៕