ភ្នំពេញៈ ប្រជាពលរដ្ឋនៅសហគមន៍តាតុក ស្ថិតនៅភូមិព្រែកថ្លឹង សង្កាត់ជើងឯក ខណ្ឌដង្កោចំនួន ៣៥ គ្រួសារ ដែលរងផលប៉ះពាល់ពីការអភិវឌ្ឍប្រឡាយ៣បានប្រមូលផ្តុំគ្នានៅមុខសាលារាជធានីភ្នំពេញនៅថ្ងៃទី ៩ កុម្ភៈ ដើម្បីតាមដានលិខិតស្នើសុំការអភិវឌ្ឍនៅនឹងកន្លែងដែលបានស្នើសុំកន្លងមក។
អ្នកស្រី ប៉ៅ ស្រីម៉ៅ តំណាងសហគមន៍តាតុកបានប្រាប់ភ្នំពេញប៉ុស្តិ៍នៅថ្ងៃទី៩ កុម្ភៈថា កន្លងទៅ រាជរដ្ឋាភិបាលបានប្រកាសពីគម្រោងអភិវឌ្ឍន៍ប្រឡាយ៣នេះ ហើយការអភិវឌ្ឍនេះនឹងមានផលប៉ះពាល់ដល់ផ្ទះរបស់ពួកគាត់ដែលមានចំនួន៣៥ខ្នងផ្ទះ ដែលរស់នៅតាមបណ្តោយប្រឡាយនេះទេ។
បន្ថែមពីនេះអ្នកស្រីបានអះអាងថា កន្លងមកសហគមន៍បានដាក់លិខិតស្នើឲ្យមានដំណោះស្រាយទៅដល់អាជ្ញាធរពាក់ព័ន្ធតាំងពីឆ្នាំ២០១៩មកម៉្លេះនិងស្នើសុំការអភិវឌ្ឍនៅនឹងកន្លែង ប៉ុន្តែពុំមានការឆ្លើយតបជាវិជ្ជមានណាមួយនៅឡើយ ទើបពលរដ្ឋសម្រេចចិត្តប្រមូលផ្តុំគ្នាដើម្បីតាមដានលិខិតស្នើសុំការអភិវឌ្ឍនៅនឹងកន្លែងជាថ្មីទៀត។
អ្នកស្រីបានបញ្ជាក់ថា៖«ដីពួកខ្ញុំគឺនៅមាត់ប្រឡាយទេមិនមែននៅលើប្រឡាយទេ។ប្រជាពលរដ្ឋខ្ញុំមិនចង់បានអីទេគឺចង់បានការរស់នៅកន្លែងដដែលមិនចង់ដោះដូរទៅណាទេបើមានការអភិវឌ្ឍណាមួយនៅប្រឡាយនេះ។យើងបារម្ភណាស់នៅគ្រប់តំបន់កន្លែងណាក៏គេមានប្លង់ តែកន្លែងខ្ញុំនេះគឺមិនមានប្លង់ទេ ខ្ញុំសុំកុំឲ្យមានការដោះដូរពួកខ្ញុំទៅណាមកណាទៀត»។
អ្នកស្រី អឹម សារឿន ដែលជាពលរដ្ឋម្នាក់ទៀតបានថ្លែងថា ប្រជាពលរដ្ឋទាំង៣៥គ្រួសារនេះ បានរស់នៅលើប្រឡាយ៣នេះតាំងពីអំឡុងឆ្នាំ១៩៨០ ហើយមកទល់បច្ចុប្បន្នអាជ្ញាធរនៅតែមិនទាន់ចេញប្លង់កាន់កាប់ដីធ្លីជូននៅឡើយទេ។ដូច្នេះអ្នកស្រីស្នើសុំឱ្យសាលារាជធានីភ្នំពេញឆ្វៀលដីទំហំជាង៤ពាន់ម៉ែត្រការ៉េពីប្រឡាយនេះដើម្បីឱ្យពលរដ្ឋអភិវឌ្ឍដោយខ្លួនឯង។
លោក អៀង វុទ្ធី នាយកប្រតិបត្តិនៃអង្គការសមធម៌កម្ពុជាបានថ្លែងថា ការស្នើអភិវឌ្ឍនៅនឹងកន្លែងគឺជាសិទ្ធិស្របច្បាប់របស់ពលរដ្ឋដែលអាចមានសិទ្ធិស្នើសុំអភិវឌ្ឍនៅនឹងកន្លែងហើយការអភិវឌ្ឍបែបនេះក៏ធ្លាប់បានធ្វើនៅតំបន់ផ្សេងៗរួចមកហើយ។ដូច្នេះលោកយល់ថាអាជ្ញាធរពាក់ព័ន្ធគួរតែស្វែងរកលទ្ធភាពផ្តល់នូវដំណោះស្រាយដែលអាចទទួលបានដល់ពលរដ្ឋឲ្យបានឆាប់រហ័សដោយកុំបន្តអូសបន្លាយកាន់តែយូរទៀត ព្រោះករណីនេះពលរដ្ឋបានស្នើសុំជាយូរឆ្នាំមកហើយ។
លោកបានបញ្ជាក់ថា៖«ពលរដ្ឋគាត់ច្បាស់ជាមានការព្រួយបារម្ភហើយដែលរដ្ឋាភិបាលគួរតែផ្តល់ដំណោះស្រាយកាន់តែឆាប់កាន់តែល្អដល់ពួកគាត់។បើស្ថិតក្នុងស្ថានភាពបែបនេះគឺពលរដ្ឋពិបាកក្នុងការរស់នៅហើយប៉ះពាល់ទៅដល់អារម្មណ៍និងផ្លូវចិត្តរបស់ពួកគាត់ព្រោះផ្ទះរបស់ខ្លួនគ្មានការទទួលស្គាល់តាមផ្លូវច្បាប់»។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានប្រាប់ភ្នំពេញប៉ុស្តិ៍នៅថ្ងៃទី៩ កុម្ភៈថា លោកបានដឹងពីការមកប្រមូលផ្តុំរបស់ពលរដ្ឋនេះ ប៉ុន្តែដោយសារតែជាប់រវល់ លោកមិនទាន់បានលម្អិតនិងសិក្សាពីករណីនេះបានទេដោយសុំពេលពិនិត្យឯកសារនិងការស្នើរបស់ពលរដ្ឋជាមុនសិនមុននឹងធ្វើការឆ្លើយតប។
លោកបានបញ្ជាក់ថា៖«យើងដឹងតែថាមានបងប្អូនយើងទៅដាក់ញត្តិដែលមិនទាន់ច្បាស់ថារឿងអី។អ៊ីចឹងទេខ្ញុំសុំពិនិត្យខ្លឹមសារញត្តិនិងការចង់បានរបស់បងប្អូនយើងសិនបានខ្ញុំអាចឆ្លើយថាយើងនឹងដោះស្រាយយ៉ាងណា។សុំចាំសិន»៕