មណ្ឌលគិរីៈ អភិបាលស្រុកអូររាំង លោក សៀក មុន្នី ទទួលស្គាល់ថា បានប្រមូលទិញដីចម្ការរបស់ប្រជាពលរដ្ឋដែលពួកគាត់កំពុងកាន់កាប់ និងអាស្រ័យផល មានទីតាំងនៅឃុំសែនមនោរម្យ ស្រុកអូររាំង ជាច្រើនហិកតា សម្រាប់លោកឧកញ៉ា ស្រី ចន្ធូ ប្រាកដមែន ប៉ុន្តែតាមរយៈស្នើសុំវិនិយោគមិនមែនបំពានដីពលរដ្ឋអាស្រ័យផលនោះទេ។
លោកសៀក មុន្នី ថ្លែងនៅថ្ងៃទី៨ ខែកុម្ភៈ ថា ពិតជាបានទិញដីនៅភូមិសាស្ត្រស្រុកអូររាំងជូនលោកឧកញ៉ាស្រី ចន្ធូ ប្រាកដមែននោះ បន្ទាប់ពីលោកឧកញ៉ាស្រី ចន្ធូ ចេញមុខបញ្ជាក់ថា ការប្រមូលទិញដីជាច្រើនហិកតា នៅខេត្តមណ្ឌលគិរី គឺធ្វើឡើងដោយចំហតាមរយៈលោក សៀក មុន្នី។ ប៉ុន្តែការប្រមូលទិញនេះ គឺមិនមានប៉ះពាល់ដល់ការរំលោភបំពានពលរដ្ឋណាម្នាក់ឡើយ។
លោកថ្លែងថា៖«ធម្មតាយើងជាអាជ្ញាធរ គាត់[ស្នើសុំយើង] ខ្ញុំឃើញឃ្លោងឃ្លាដែលលោកឧកញ៉ាបញ្ជាក់ហ្នឹង គឺចង់មានន័យថា គាត់បានទិញពិតប្រាកដមែន ព្រោះគាត់ស្នើសុំវិនិយោគដែរ។ មានន័យថា គាត់ស្នើសុំមកយើង ស្នើសុំផ្ទេរសិទ្ធិអ៊ីចឹងទៅ។ ប៉ុន្តែឥឡូវដីហ្នឹងរដ្ឋបានដកហូតវិញអស់ហើយ មិនមែនតែដីគាត់ឯណា គឺគ្រប់កន្លែង»។
លោកអភិបាលស្រុកអូររាំងធ្លាប់បានបកស្រាយថា នៅចន្លោះឆ្នាំ ២០១៨ លោក ឧកញ៉ា ស្រី ចន្ទ បានទិញដីនៅភូមិពូរ៉ាង ជាង៥០០ហិកតា ក្នុងគោលបំណងដើម្បីធ្វើការអភិវឌ្ឍចិញ្ចឹមគោយកទឹកដោះ។ ពេលនោះ រដ្ឋបាលស្រុកអូររាំងមិនទាន់មានប្រព័ន្ធគ្រប់គ្រងទិន្នន័យផ្ទៃដីផ្ទាល់ខ្លួន ទើបធ្វើឱ្យមានការពិបាកក្នុងការកំណត់អត្តសញ្ញាណព្រំប្រទល់ម្ចាស់ដី ទំហំផ្ទៃដីទាំងអស់ក្នុងស្រុកអូររាំង ដែលប្រជាពលរដ្ឋបានលក់ ផ្ទេរកម្មសិទ្ធិ ទៅឱ្យឈ្មួញ និងអ្នកទិញផ្សេងៗទៀត។
លុះក្រោយមក នៅចុងឆ្នាំ២០១៨ រដ្ឋបាលស្រុកអូររាំង មានប្រព័ន្ធគ្រប់គ្រងទិន្នន័យដីផ្ទាល់ខ្លួន ដែលមានភាពងាយស្រួលក្នុងការកំណត់ប្រភេទដីទាំងអស់ ដែលប្រជាពលរដ្ឋបានលក់ ឬផ្ទេរកម្មសិទ្ធិ។ ដូច្នេះ នៅចុងឆ្នាំដដែលនេះ មានប្រជាពលរដ្ឋប្រមាណជាង ៥០គ្រួសារ បានប្រមូលគ្នាលក់ដីទៅឱ្យឧកញ៉ាស្រី ចន្ទ មានប្រមាណជាង៥០០ហិកតា ដែលដីទាំងនេះបានមកពីពលរដ្ឋរស់នៅក្នុងភូមិពូរាំង។ ចំពោះដីដែលបានលក់ទៅឱ្យឧកញ៉ា ស្រី ចន្ទ នោះ កន្លែងខ្លះត្រូវគេទិញលក់ ២ទៅ៣ដង ផងដែរ។
លិខិតបំភ្លឺរបស់លោកឧកញ៉ាស្រី ចន្ធូ ដែលភ្នំពេញប៉ុស្តិ៍ទទួលបាននៅថ្ងៃទី៨ ខែកុម្ភៈ ឱ្យដឹងថា អំឡុងឆ្នាំ២០១២ រហូតដល់ឆ្នាំ២០២០ លោកបានប្រមូលទិញដីចម្ការរបស់ប្រជាពលរដ្ឋដែលពួកគាត់កំពុងកាន់កាប់ និងអាស្រ័យផល មានទីតាំងនៅឃុំសែនមនោរម្យ ស្រុកអូររាំង ខេត្តមណ្ឌលគិរីជាច្រើនហិកតា។ ការប្រមូលទិញនេះបានធ្វើឡើងជាចំហ តាមរយៈលោក សៀក មុនី អភិបាលស្រុកអូររាំង និងបានបង់ពន្ធប្រថាប់ត្រាត្រឹមត្រូវ ក្នុងគោលបំណងរៀបចំជាមូលដ្ឋានវិនិយោគ ជាពិសេសលើវិស័យកសិកម្ម។
លោកបញ្ជាក់ថា៖«ក្រោយពេលប្រមូលទិញ និងទូទាត់ប្រាក់ជូនប្រជាពលរដ្ឋរួច ខ្ញុំបានស្នើសុំចុះបញ្ជីដី ដោយមានអាជ្ញាធរដែនដី និងមន្ត្រីពាក់ព័ន្ធជាមួយជំនាញសុរិយោដី ចុះវាស់វែង និងចេញបង្កាន់ដៃឱ្យ»។
លោកថា ទន្ទឹមគ្នានឹងការចុះបញ្ជីដីនេះ លោកបានរៀបចំឯកសារដាក់ជូនអភិបាលស្រុកអូររាំង សុំបង្កើតកសិដ្ឋាន 7 Ranch Cambodia ចិញ្ចឹមគោ សេះ ចៀម ពពែ និង បានរៀបចំការដ្ឋាននេះឡើង ហើយក៏បានដាក់លិខិតជូនអភិបាលខេត្តមណ្ឌលគិរី ស្នើសុំការគាំទ្រលើគម្រោង ផែនការវិនិយោគលើវិស័យអប់រំ និងកសិកម្ម។ មានការសាងសង់សំណង់ស្ថានីយបង្កាត់ពូជសត្វ បន្លែផ្លែឈើ និងរុក្ខជាតិផ្សេងៗ វិនិយោគលើវិស័យកសិ-ទេសចរណ៏ វិស័យកីឡា និងលំនៅឋានអ្នកចូលនិវត្តន៍ជាដើម។
លោកថ្លែងថា៖«ទាំងអស់នេះបញ្ជាក់ច្បាស់ថា ខ្ញុំបានចូលកាន់កាប់អាស្រ័យផលលើដីដែលបានប្រមូលទិញនេះធ្វើ ឡើងដោយសុចរិត ដឹងឮជាសាធារណៈ និងកាន់កាប់ក្នុងនាមជាម្ចាស់ ដោយមិនបានដឹងថា ដីនេះជាដីរបស់រដ្ឋនោះទេ ហើយបើដឹងថាដីនេះជាដីរបស់រដ្ឋ នោះប្រាកដជាខ្ញុំមិនចំណាយប្រាក់ដ៏ច្រើនសន្ធឹកសន្ធាប់ដាក់វិនិយោគលើទីតាំងដីនេះដែរ»។
លោកគ្រើង តុលា អ្នកប្រឹក្សាយោបល់ក្រុមការងារបណ្តាញសហគមន៍ជនជាតិដើមភាគតិចព្នងខេត្តមណ្ឌលគិរី ថ្លែងនៅថ្ងៃទី៩ កុម្ភៈថា អ្វីជាការកត់សម្គាល់របស់លោក គឺខុសពីអ្វីដែលអាជ្ញាធរស្រុកអូររាំងបានលើកឡើង។ ព្រោះបើតាមការដែលលោកជួបសម្ភាសផ្ទាល់ជាមួយប្រជាពលរដ្ឋបង្ហាញថា ពលរដ្ឋពិតជាបានលក់ដីមួយចំនួនមែន ប៉ុន្តែមិនបានលក់ទៅឱ្យឈ្មោះ ស្រី ចន្ធូ នោះទេ។ ការលក់នោះទៀតសោតក៏មិនមានចំនួនច្រើនរយហិកតានោះដែរ។
លោកថ្លែងថា៖«ពលរដ្ឋគាត់ទទួលស្គាល់ថា គាត់លក់មែន ១ហិកតា ២ហិកតា លក់មែន ប៉ុន្តែមិនដល់៤១ ឬ៤២ហិកតានោះទេ។ អ៊ីចឹងខ្ញុំចង់ឱ្យមានការស្រាវជ្រាវបន្តទៀត និងមានវិធានការក្នុងការសិក្សាឡើងវិញថា តើ រឿងហ្នឹងពិតជាព្រជាពលរដ្ឋ អ្នកលក់ឬ ក៏ស្រី ចន្ធូ ហ្នឹងគាត់អ្នករំលោភ ឬមួយថា មានការឃុបឃិត»។
លោកតុលាបញ្ជាក់ថា ដើម្បីបង្ហាញពីតម្លាភាព និងប្រាកដថា មិនមានការឃុបឃិតជាប្រព័ន្ធក្នុងរឿងដីធ្លីនៅស្រុកអូររាំងនេះ អាជ្ញាធរខេត្តគួរតែធ្វើការនិរាករណ៍ប្លង់ទាំងអស់ដែលមានឈ្មោះរបស់លោកឧកញ៉ាស្រី ចន្ធូ។ លោកថា បើអាជ្ញាធរខេត្តមិនបាននិរាករណ៍ប្លង់ទាំងនោះចោលទេមានន័យថា អាជ្ញាធរពិតជាមានការឃុបឃិតជាប្រព័ន្ធមិនខាន។
ភ្នំពេញប៉ុស្តិ៍មិនអាចទាក់ទងសុំការបំភ្លឺពីអ្នកនាំពាក្យរដ្ឋបាលខេត្តមណ្ឌគិរីបានទេ នៅថ្ងៃទី៩ ខែកុម្ភៈនេះ ប៉ុន្តែកន្លងមកលោកធ្លាប់បញ្ជាក់ថា អាជ្ញាធរខេត្តនឹងធ្វើការស្រាវជ្រាវឱ្យបានច្បាស់លាស់មុននឹងចោទប្រកាន់ផ្លូវច្បាប់ណាមួយលើនរណាម្នាក់៕
វីដេអូ៖