ពោធិ៍សាត់ៈ ជនសង្ស័យក្នុងបទល្មើសកាប់រានដីព្រៃម្នាក់បានធ្វើអត្តឃាតកម្មដោយចងកនៅក្នុងបន្ទប់ឃុំខ្លួននៃមន្ទីរបរិស្ថានខេត្តពោធិ៍សាត់ដែលមានទីតាំងស្ថិតនៅភូមិពាលញែក១ សង្កាត់ផ្ទះព្រៃ ក្រុង-ខេត្តពោធិ៍សាត់ កាលពីព្រឹកថ្ងៃទី ៨ ខែ កុម្ភៈ ឆ្នាំ ២០២២។ នេះបើតាមមន្ត្រីនគរបាលមូលដ្ឋាន។
លោក ធាង ឡេង អធិការស្រុកវាលវែងបានប្រាប់ភ្នំពេញប៉ុស្តិ៍ថា ជនសង្ស័យដែលបានចងកធ្វើអត្តឃាតនោះឈ្មោះ ចាន់ វិត អាយុ២២ឆ្នាំ មានលំនៅក្នុងភូមិ-ឃុំប្រមោយ ស្រុកវាលវែង ខេត្តពោធិ៍សាត់។ ជនសង្ស័យ ត្រូវបានមន្ត្រីនៃមន្ទីរបរិស្ថានខេត្តសហការជាមួយសមត្ថកិច្ចកងរាជអាវុធហត្ថលើផ្ទៃប្រទេសនិងកម្លាំងអង្គការសម្ព័ន្ធសត្វព្រៃ Wildlife Allianceឃាត់ខ្លួននៅល្ងាចថ្ងៃទី៦ ខែកុម្ភៈ ឆ្នាំ២០២២ ខណៈកំពុងប្រព្រឹត្តបទល្មើសកាប់រានដីព្រៃនៅតំបន់អូរសោម។
លោកបានបញ្ជាក់ថា៖«យោងតាមរបាយការណ៍ដែលសមត្ថកិច្ចយើងទទួលបាន ជនសង្ស័យបានចងកសម្លាប់ខ្លួនក្នុងបន្ទប់ឃុំខ្លួននៃមន្ទីរបរិស្ថានខេត្តពោធិ៍សាត់ដោយប្រើកំណាត់សំពត់ងូត។យ៉ាងណាក៏ដោយខ្ញុំមិនទាន់ទទួលបានរបាយការណ៍លម្អិត អំពីករណីនេះនៅឡើយទេ»។
ជុំវិញករណីនេះ លោក គង់ ពុទ្ធីរ៉ា ប្រធានមន្ទីរបរិស្ថានខេត្តពោធិ៍សាត់បានប្រាប់ភ្នំពេញប៉ុស្តិ៍ថា ក្រោយការចាប់ខ្លួន ជនសង្ស័យត្រូវបានមន្ត្រីបរិស្ថានសាកសួរចម្លើយនិងបានកសាងសំណុំរឿងចោទប្រកាន់ក្នុងបទល្មើសកាប់រានដីព្រៃ។នៅល្ងាចថ្ងៃទី៧ ខែកម្ភៈ ជនសង្ស័យត្រូវបានបញ្ជូនទៅតុលាការដើម្បីចាត់ការបន្តតាមនីតិវិធីច្បាប់ ប៉ុន្តែដោយសារពេលវេលាខ្លី តំណាងអយ្យការអមសាលាដំបូងខេត្តពោធិ៍សាត់បានប្រាប់ឲ្យនាំជនសង្ស័យត្រឡប់មកឃុំខ្លួននៅមន្ទីរបរិស្ថានវិញដើម្បីរង់ចាំការសាកសួរបន្តនៅព្រឹកថ្ងៃទី៨ ខែកុម្ភៈ។
លោកបានបញ្ជាក់ថា៖«ពេលនាំមកពីតុលាការវិញ មន្ត្រីយើងបាននាំជនសង្ស័យទៅបន្ទប់ឃុំខ្លួនវិញដោយបានផ្ដល់បាយនិងម្ហូបអាហារឲ្យបរិភោគដូចធម្មតា។លុះព្រឹកឡើងថ្ងៃទី៨ខែកុម្ភៈនៅមុនពេលនាំជនសង្ស័យទៅតុលាការដើម្បីសាកសួរចម្លើយជាថ្មីម្ដងទៀតនោះ មន្ត្រីយើងក៏បានទិញបាយនិងម្ហូបអាហារព្រមទាំងទឹកឲ្យជនសង្ស័យបរិភោគផងដែរ។ប៉ុន្តែនៅក្នុងពេលនោះជនសង្ស័យបានឆ្លៀតពេលមន្ត្រីយើងមិនប្រយ័ត្នក៏បានលួចធ្វើអត្តឃាតដោយចងកសម្លាប់ខ្លួនតែម្ដងទៅ»។
បើតាមលោក ពុទ្ធីរ៉ា ក្រោយករណីនេះកើតឡើង លោកបានទូរស័ព្ទរាយការណ៍បន្ទាន់ទៅកាន់លោកព្រះរាជអាជ្ញានិងលោកស្នងការខេត្តពោធិ៍សាត់ដើម្បីចុះមកពិនិត្យកោសល្យវិច័យសពជនសង្ស័យរូបនោះនិងទាក់ទងទៅសាច់ញាតិដើម្បីមកទទួលសពយកទៅធ្វើបុណ្យតាមប្រពៃណី។
ពាក់ព័ន្ធការធ្វើកោសល្យវិច័យសពជនសង្ស័យខាងលើនេះ លោក ម៉ូ លីដា ស្នងការរងនគរបាលខេត្តពោធិ៍សាត់ ទទួលបន្ទុកផ្នែកព្រហ្មទណ្ឌបានប្រាប់ភ្នំពេញប៉ុស្តិ៍ថា ការពិនិត្យបានធ្វើឡើងចាប់តាំងពីកន្លែងដេកដល់បន្ទប់ទឹក នៃបន្ទប់ឃុំខ្លួន។
លោកបានបញ្ជាក់ថា៖«ក្នុងបន្ទប់ដេកឃើញមានកញ្ចប់បាយដែលជនសង្ស័យបានបរិភោគអស់ពាក់កណ្ដាល។រីឯក្នុងបន្ទប់ទឹកមានព្រឹលបង្អួចនៅកម្ពស់ប្រមាណ២,៥ម៉ែត្រពីបាតបង្គន់។សពជនសង្ស័យត្រូវបានប្រទះឃើញចងកដោយប្រើកំណាត់សំពត់ងូតទឹកជាប់នឹងចម្រឹងព្រឹលបង្អួចនោះ។ក្រៅពីបែកបំពង់កនៅចំណុចដែលចងកនោះសពជនរងគ្រោះ គ្មានស្លាកស្នាមអ្វីផ្សេងទៀតដែលគួរឲ្យសង្ស័យជាអំពើឃាតកម្ម ឬហិង្សានោះឡើយ»។
លោកបានបន្តថា ក្រោយពីពិនិត្យរួចរាល់ហើយនោះ ក្រុមសមត្ថកិច្ចជំនាញដែលក្នុងនោះមានទាំងលោកព្រះរាជអាជ្ញាអមសាលាដំបូងខេត្តពោធិ៍សាត់ផងនោះ បានសម្រេចប្រគល់សពទៅឲ្យមន្ត្រីនៃមន្ទីរបរិស្ថានជាអ្នករក្សាទុក ដើម្បីប្រគល់ជូនទៅគ្រួសារនៃសពយកទៅធ្វើបុណ្យតាមប្រពៃណី។
យោងតាមរបាយការណ៍ដែលភ្នំពេញប៉ុស្តិ៍ទទួលបាន ក្នុងអំឡុងពេលល្បាតស្រាវជ្រាវនិងបង្ក្រាបបទល្មើសកាលពីល្ងាចថ្ងៃទី៦ ខែកុម្ភៈនោះ ក្រុមមន្ត្រីបរិស្ថានដែលមានការចូលរួមសហការពីកម្លាំងកងរាជអាវុធហត្ថលើផ្ទៃប្រទេសនិងអង្គការ Wildlife Alliance បានប្រទះឃើញក្រុមជនសង្ស័យ៨នាក់ ប៉ុន្តែភ្លាមៗនោះ ក្រុមជនសង្ស័យ៧នាក់បានដឹងខ្លួនទាន់ ហើយរត់គេចខ្លួនបាត់អស់នៅសល់តែជនសង្ស័យ ឈ្មោះ ចាន់ វិត ដែលមិនរត់។កម្លាំងសមត្ថកិច្ចបានចាប់ឃាត់ខ្លួនគាត់ជាមួយវត្ថុតាងរណារយន្ត១គ្រឿងនិងកាំបិតផ្គាក់១៕