.jpg)
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងពិធីសម្ពោធដាក់ឱ្យប្រើប្រាស់នូវអគារ និងសមិទ្ធផលនានានៅវិទ្យាស្ថានគរុកោសល្យរាជធានីភ្នំពេញស្ថិតនៅវិទ្យាស្ថានគរុកោសល្យរាជធានីភ្នំពេញ។ រូបថត PPTEC
ភ្នំពេញៈ រដ្ឋមន្ត្រីក្រសួងសេដ្ឋកិច្ចបញ្ជាក់ថាក្រសួងអប់រំបាននិងកំពុងអភិវឌ្ឍគ្រឹះស្ថានបណ្ដុះបណ្ដាលគ្រូឱ្យស័ក្ដិសមជាកន្លែងអប់រំគ្រូបង្រៀនប្រកបដោយគុណភាពទាំងផ្នែកហេដ្ឋារចនាសម្ព័ន្ធរូបវន្ត និងបរិក្ខារបង្រៀន និងរៀនព្រមទាំងការធ្វើទំនើបកម្មវិធីសាស្ដ្របង្រៀនឱ្យស្របតាមបរិបទសតវត្សរ៍ទី ២១ ដើម្បីធានាថាគរុសិស្សមានមូលដ្ឋានរឹងមាំ ក្នុងការបង្រៀនបន្តដល់សិស្សនូវចំណេះដឹងប្រកបដោយប្រសិទ្ធភាព និងគុណភាព។
ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ថ្លែងបែបនេះ ក្នុងពេលធ្វើជាអធិបតីក្នុងពិធីសម្ពោធដាក់ឱ្យប្រើប្រាស់នូវអគារ និងសមិទ្ធផលនានានៅវិទ្យាស្ថានគរុកោសល្យរាជធានីភ្នំពេញស្ថិតនៅវិទ្យាស្ថានគរុកោសល្យរាជធានីភ្នំពេញ កាលពីថ្ងៃទី ៩ កុម្ភៈ។ លោកថា ក្រសួងអប់រំបាននិងកំពុងអភិវឌ្ឍគ្រឹះស្ថានបណ្តុះបណ្តាលគ្រូ ដែលរួមមាន វិទ្យាស្ថានជាតិអប់រំ វិទ្យាស្ថានគរុកោសល្យ មជ្ឈមណ្ឌលគរុកោសល្យភូមិភាគ សាលាគរុកោសល្យ និងវិក្រឹតការខេត្ត សាលាមធ្យមសិក្សាគរុកោសល្យមត្តេយ្យមជ្ឈិម និងគ្រឹះស្ថានបណ្តុះបណ្តាល គ្រូដទៃទៀតលើគ្រប់ទិដ្ឋភាព។
លោកបញ្ជាក់ថា៖ «អភិវឌ្ឍគ្រឹះស្ថានបណ្តុះបណ្តាលគ្រូនេះគឺដើម្បីស័ក្តិសមជាកន្លែងអប់រំគ្រូបង្រៀនប្រកបដោយគុណភាព ទាំងខាងផ្នែកហេដ្ឋារចនាសម្ព័ន្ធរូបវន្ត និងបរិក្ខារបង្រៀន និងរៀន ព្រមទាំងការធ្វើទំនើបកម្មវិធីសាស្ត្របង្រៀន កម្មវិធីបណ្តុះបណ្តាល និងគរុកោសល្យ ឱ្យស្របតាមបរិបទនៃសតវត្សរ៍ទី ២១ ក្នុងគោលដៅធានាថា គរុសិស្ស គរុនិស្សិតមានមូលដ្ឋានគ្រឹះរឹងមាំសម្រាប់ការបង្រៀនបន្តដល់សិស្សានុសិស្សនូវចំណេះទូទៅ ប្រកបដោយប្រសិទ្ធភាព និងគុណភាព»។
លោក អូន ព័ន្ធមុនីរ័ត្ន ឱ្យដឹងថា កន្លងមកក្រសួងអប់រំបានដាក់ចេញនូវផែនការសកម្មភាពស្ដីពីការអភិវឌ្ឍគ្រឹះស្ថានបណ្តុះបណ្តាលគ្រូបានបង្កើតគណៈកម្មការកំណែទម្រង់វិទ្យាស្ថានជាតិអប់រំ។ ក្រសួងបានប្រែក្លាយមជ្ឈមណ្ឌលគរុកោសល្យភូមិភាគរាជធានីភ្នំពេញ និងខេត្តបាត់ដំបងទៅជាវិទ្យាស្ថានគរុកោសល្យរាជធានីភ្នំពេញ។
ខេត្តបាត់ដំបងបានផ្ទេរការគ្រប់គ្រងគ្រឹះស្ថានបណ្តុះបណ្តាលគ្រូ និងសាលាអនុវត្តនៅតាមខេត្តឱ្យមកស្ថិតក្រោមការគ្រប់គ្រងរបស់ក្រសួងអប់រំ និងបានដាក់សម្ពោធឱ្យប្រើប្រាស់នូវហេដ្ឋារចនាសម្ព័ន្ធអប់រំនៅតាមសាលាគរុកោសល្យ និងវិក្រឹតការខេត្តចំនួន ១១ ទីតាំង ក្រោមកិច្ចសហការជាមួយអង្គការយូណេស្កូ និងការគាំទ្រថវិកាពីមូលនិធិភាពជាដៃគូសកលសម្រាប់ការអប់រំ។
លោកថ្លែងថា នៅថ្ងៃទី ៩ កុម្ភៈ ការអភិវឌ្ឍហេដ្ឋារចនាសម្ព័ន្ធ វិទ្យាស្ថានគរុកោសល្យរាជធានី-ភ្នំពេញ ដែលមានអគារសិក្សា ការបំពាក់សម្ភារសិក្សាទំនើប និងការរៀបចំហេដ្ឋារចនាសម្ព័ន្ធរូបវ័ន្តស្អាត ស្របតាមស្ដង់ដានៃគ្រឹះស្ថានបណ្តុះបណ្តាលគ្រូបង្រៀនគឺជាការចាប់ផ្តើមដ៏មានអត្ថន័យ ដែលនឹងជួយជំរុញល្បឿននៃការអនុវត្តកំណែទម្រង់ការបណ្តុះបណ្តាលគ្រូបង្រៀននៅកម្ពុជា ឆ្ពោះទៅលើកកម្ពស់គុណភាពអប់រំ និងសំដៅបង្កើនលទ្ធផលសិក្សារបស់សិស្សឱ្យកាន់តែប្រសើរឡើង។
បើតាមលោក អូន ព័ន្ធមុនីរ័ត្ន ក្រសួងអប់រំ យុវជន និងកីឡានឹងបន្តអនុវត្តកំណែទម្រង់គ្រឹះស្ថានបណ្តុះបណ្តាលគ្រូ ជាពិសេសវិទ្យាស្ថានគរុកោសល្យទាំង ២។ លើកកម្ពស់គុណភាពធនធានមនុស្សនៅវិទ្យាស្ថានគរុកោសល្យ ដោយនឹងជ្រើសរើសបន្ថែមបុគ្គលិកបំពេញកង្វះខាត និងអភិវឌ្ឍសមត្ថភាពគ្រូឧទ្ទេស ព្រមទាំងផ្ទេរចូលបន្ថែមគ្រូបង្រៀនឆ្នើមដូចជាគ្រូបង្រៀនល្អ ផ្នែកអំណាន ថ្នាក់ដំបូង និងគណិតវិទ្យាថ្នាក់ដំបូង។ រៀបចំឱ្យមានឋានៈសាស្ដ្រាចារ្យ សាស្ត្រាចារ្យរង និងសាស្ត្រាចារ្យជំនួយ។ រៀបចំ Adjunct Professor ដែលមកជួយបង្រៀនមិនយកកម្រៃ។
រៀបចំគុណវុឌ្ឍិគ្រូឧទ្ទេសឱ្យត្រូវតាមស្ដង់ដា។ រៀបចំផែនការជ្រើសរើសគរុនិស្សិតល្អជាគ្រូឧទ្ទេស។ បង្កើតឱ្យមាន Digital Center ក្នុងវិទ្យាស្ថានគរុកោសល្យ។ សាងសង់ផ្ទះគ្រូឧទ្ទេសនៅវិទ្យាស្ថានគរុកោសល្យ ដើម្បីទាក់ទាញគ្រូឧទ្ទេស និងផ្ទេរគ្រូបង្រៀន ដែលមានសញ្ញាបត្របរិញ្ញាបត្រជាន់ខ្ពស់ និងមានសមត្ថភាពចូលបម្រើការនៅវិទ្យាស្ថានគរុកោសល្យជាដើម។
លោកបានបន្តថា ក្រសួងអប់រំនឹងបន្តលើកទឹកចិត្តសិស្សដែលមានសមត្ថភាពឱ្យដាក់ពាក្យប្រឡងចូលរៀននៅវិទ្យាស្ថានគរុកោសល្យដោយត្រូវលើកទឹកចិត្តសិស្សនិទ្ទេស A, B, C ឱ្យចូលរៀន ដំឡើងឋានៈដល់បេក្ខជនដែលបានបញ្ចប់ការសិក្សាពីវិទ្យាស្ថានគរុកោសល្យផងដែរ។
ទាក់ទិនករណីនេះលោកណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា បានឱ្យដឹងថា វិទ្យាស្ថានគរុកោសល្យរាជធានីភ្នំពេញត្រូវបានបង្កើតឡើងកាលពីថ្ងៃទី ២២ ខែឧសភា ឆ្នាំ ២០១៧ តាមអនុក្រឹត្យលេខ ៧៣ របស់រាជរដ្ឋាភិបាល។ កាលពីដើមឡើយជាអតីតមជ្ឈមណ្ឌលគរុកោសល្យភូមិភាគរាជធានី-ភ្នំពេញ និងសាលាគរុកោសល្យ និងវិក្រឹតការរាជធានីភ្នំពេញ។ ភារកិច្ចស្នូលរបស់វិទ្យាស្ថាននេះគឺរ៉ាប់រងការបណ្តុះបណ្តាលគ្រូបង្រៀនថ្នាក់បរិញ្ញាបត្រអប់រំ (១២+៤) និងធ្វើវិក្រឹតការគ្រូបង្រៀនសម្រាប់កម្រិតបឋមសិក្សា និងកម្រិតមូលដ្ឋានបង្រៀននៅអនុវិទ្យាល័យ។
លោកបន្តថា ស្ថិតក្រោមកំណែទម្រង់គ្រឹះស្ថានបណ្តុះបណ្តាលគ្រូបង្រៀន វិទ្យាស្ថានគរុកោសល្យរាជធានីភ្នំពេញបានខិតខំធ្វើការអភិវឌ្ឍទាំងខាងផ្នែករឹង និងផ្នែកទន់ ដោយមានការគាំទ្រពីគម្រោងសាងសង់វិទ្យាស្ថានគរុកោសល្យ (The project for the construction of Teacher Education Colleges) ដែលជាជំនួយហិរញ្ញប្បទានឥតសំណងរបស់រាជរដ្ឋាភិបាលនៃប្រទេសជប៉ុន និងប្រជាជនជប៉ុន តាមរយៈស្ថានទូតជប៉ុនប្រចាំកម្ពុជា និងទីភ្នាក់ងារ JICA។
លោកណាត ប៊ុនរឿន បានបញ្ជាក់ថា៖ «ស្ថិតក្រោមគម្រោងខាងលើការអភិវឌ្ឍហេដ្ឋារចនាសម្ព័ន្ធត្រូវបានធ្វើឡើងនៅវិទ្យាស្ថានគរុកោសល្យរាជធានីភ្នំពេញ ដែលត្រូវបានសម្ពោធដាក់ឱ្យប្រើប្រាស់ជាផ្លូវការនាពេលនេះ និងហេដ្ឋារចនាសម្ព័ន្ធនៅវិទ្យាស្ថានគរុកោសល្យបាត់ដំបងដែលនឹងត្រូវសម្ពោធដាក់ឱ្យប្រើប្រាស់ជាផ្លូវការនៅពេលខាងមុខ បានស្ដែងឱ្យឃើញពីការខិតខំប្រឹងប្រែងប្រកបដោយផ្លែផ្ការបស់គណៈគ្រប់គ្រង គ្រូឧទ្ទេស និងបុគ្គលិកអប់រំទាំងអស់ ឆ្លើយតបទៅនឹងកំណែទម្រង់អប់រំ ជាពិសេសកំណែទម្រង់ការបណ្តុះបណ្តាលគ្រូបង្រៀននៅកម្ពុជា»៕
