.jpg)
ក្រុមអ្នកបើកឡានធំដែលនគរបាលពិនិត្យឃើញប្រើគ្រឿងញៀន។ រូបថត នគរបាល
ភ្នំពេញៈ លោក ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃបានបញ្ជាឱ្យអគ្គស្នងការនគរបាលជាតិ សហការជាមួយអាជ្ញាធរជាតិប្រយុទ្ធប្រឆាំងគ្រឿងញៀន ភាគីពាក់ព័ន្ធ និងក្រុមហ៊ុនឯកជនក្នុងវិស័យដឹកជញ្ជូនធ្វើការពិនិត្យអ្នកបើកបររថយន្តធុនធំទាំងអស់ពាក់ព័ន្ធនឹងករណីប្រើប្រាស់គ្រឿងញៀន។
លោក ស ខេង ដែលជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ) ផងដែរនោះបានបញ្ជាបែបនេះក្នុងពេលធ្វើជាអធិបតីដឹកនាំកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ ២០២១ និងលើកទិសដៅការងារឆ្នាំ ២០២២ របស់ គ.ស.ច.គ។
លោកថ្លែងថា៖«ខ្ញុំភ្ជាប់ទៅនឹងបញ្ហាមួយទៀត អ្នកបើកបរ ឡាន (Truck) ដឹកទំនិញធំៗអ្នកបើកបរឱ្យក្រុមហ៊ុន។ សូមឱ្យឯកឧត្តមនាយឧត្តមសេនីយ៍ [នេត សាវឿន] អគ្គស្នងការនគរបាលជាតិបន្តដើម្បីធ្វើរឿងហ្នឹងពិនិត្យមើលរឿងហ្នឹងភាគច្រើនគឺគ្រឿងញៀនតែម្ដងពាក់ព័ន្ធនឹងគ្រឿងញៀន»។
លោកបន្តថា៖ «អ៊ីចឹងហើយសូមឱ្យក្រុមហ៊ុនវិស័យឯកជនទាំងអស់ ឬក៏ស្ថាប័នមានការពាក់ព័ន្ធសហការជាមួយនឹងអាជ្ញាធរជាតិប្រយុទ្ធប្រឆាំងគ្រឿងញៀនផង ពិសេសអគ្គស្នងការដ្ឋាននគរបាល អគ្គស្នងការនគរបាល ដើម្បីធ្វើការពិនិត្យអ្នកបើកបរទាំងអស់នោះ។ ខ្ញុំថាមិនតិចទេដែលពាក់ព័ន្ធនឹងគ្រឿងញៀន»។
លោក ស ខេង បានណែនាំឱ្យធ្វើកិច្ចការងារនេះដោយត្រូវរៀបចំបែបបទនីតិវិធីដើម្បីនឹងធ្វើការត្រួតពិនិត្យបែបយ៉ាងណាៗ ពិសេសសហការរវាងសមត្ថកិច្ចជាមួយវិស័យឯកជន ពិសេសក្រុមហ៊ុនដឹកជញ្ជូន រួចហើយរកវិធីដោះស្រាយលើបញ្ហានេះគឺជាបញ្ហាដែលលោកស្នើឱ្យយកចិត្ដទុកដាក់។
លោកបានលើកឡើងថា ស្ថិតនៅក្នុងបរិបទនៃការឆ្លងរាតត្បាតជំងឺកូវីដ ១៩ គ្រោះថ្នាក់ចរាចរណ៍ផ្លូវគោកនៅតែបន្តកើតមានហើយបានបន្សល់ទុកនូវសោកនាដកម្មជាច្រើនដល់ប្រជាពលរដ្ឋ ដូចជាការបាត់បង់ជីវិត ការរងរបួស ពិការភាព និងការខាតបង់ទ្រព្យសម្បត្ដិដែលបង្កដោយអ្នកប្រើប្រាស់ផ្លូវមួយចំនួនដែលមិនគោរពប្រតិបត្ដិច្បាប់ និងខ្វះសីលធម៌យោគយល់អធ្យាស្រ័យគ្នា និងហាក់បីដូចជាមិនស្រឡាញ់ជីវិតខ្លួនឯង ឬជីវិតអ្នកដទៃ។
លោកថ្លែងថា ទោះបីយ៉ាងនេះក្តី ដោយសារកិច្ចខិតខំប្រឹងប្រែងចាត់វិធានការ រឹតបន្តឹងច្បាប់ និងការផ្សព្វផ្សាយអប់រំច្បាប់យ៉ាងសកម្មរបស់យន្តការ និងសមត្ថកិច្ចគ្រប់ថ្នាក់ ចំណុះ គ.ស.ច.គ បានធ្វើឱ្យស្ថានភាពគ្រោះថ្នាក់ចរាចរណ៍ផ្លូវគោកជារួមក្នុងឆ្នាំ ២០២១ មានការថយចុះគួរជាទីមោទនៈ ទោះបីគោលដៅមួយចំនួនដូចជារាជធានីភ្នំពេញ ខេត្តកណ្ដាល ខេត្ដកំពង់ចាម និងខេត្ដព្រះសីហនុនៅតែមានតួលេខគ្រោះថ្នាក់ខ្ពស់ និងគ្រោះថ្នាក់ចរាចរណ៍នៅថ្ងៃបុណ្យ និងថ្ងៃឈប់សម្រាកមានការកើនឡើងក៏ដោយ។
លោក យុន ឈុន្នី រដ្ឋលេខាធិការក្រសួងមហាផ្ទៃ និងជាអគ្គលេខាធិការរង គ.ស.ច.គ បានរាយការណ៍លទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ ២០២១ ក្នុងនោះសមត្ថកិច្ចប្រតិបត្តិការត្រួតពិនិត្យអនុវត្តច្បាប់ចរាចរណ៍ផ្លូវគោករួមមានត្រួតពិនិត្យយានយន្តសរុបចំនួន ២ ១១២ ៦៧០ គ្រឿងក្នុងនោះ ម៉ូតូចំនួន ៦៤%។ រកឃើញយានយន្តល្មើសនិងពិន័យចំនួន ២២៣ ៨៧៩ គ្រឿង (២២៤ ៤២២ ករណី) ស្មើ ១១% ក្នុងនោះ ម៉ូតូចំនួន ១៦៨ ៩៥៦ គ្រឿង (១៦៨ ៩៥៧ ករណី) ស្មើ ៧៥% និងរថយន្ត ចំនួន ៥៤ ៩២៣ គ្រឿង (៥៥ ៤៦៥ ករណី) រថយន្តចំនួន ២៥% ហើយការពិន័យចំពោះបទល្មើសចរាចរណ៍ឆ្នាំ ២០២១ បានថវិកាចំនួន ៩,៩១ ពាន់លានរៀល ស្មើនឹង ២,៤៣ លានដុល្លារ (១៩ ៩១១ ៨៩៥ ០០០ រៀល)។
លោកបានឱ្យដឹងថាគ្រោះថ្នាក់ចរាចរណ៍ផ្លូវគោកឆ្នាំ ២០២១ បានកើតឡើងចំនួន ២ ៦៧០ លើកបណ្តាលឱ្យស្លាប់ចំនួន ១ ៤៩៧ នាក់ និងរបួសស្រាលចំនួន ៣ ៦១៥ នាក់ របួសធ្ងន់ ២ ២៤៦ នាក់។ ក្នុងនោះអ្នកស្លាប់ភាគច្រើននៅរាជធានីភ្នំពេញចំនួន ២៤៥ នាក់ ខេត្តកណ្តាលចំនួន ១៤១ នាក់ និងខេត្តកំពង់ចាម ចំនួន ៩៦ នាក់។
លោក ឈុន្នី បានបញ្ជាក់ថា៖ «មូលហេតុបណ្តាលឱ្យមានគ្រោះថា្នក់ គឺបើកបរលើសល្បឿនកំណត់ ៣៨% មិនគោរពសិទ្ធិ ២៤% មិនប្រកាន់ស្តាំ ១៤% ជែង ៨% បត់ ៨% ស្រវឹង ៤% កត្តាយានយន្ត ៣% និងងងុយ ១% »។
លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូនបង្ហាញការងារទិសដៅសម្រាប់ឆ្នាំ ២០២២ ក្រុមការងារ គ.ស.ច.គ នឹងបន្ដយុទ្ធនាការអប់រំផ្សព្វផ្សាយអំពីច្បាប់ស្ដីពីចរាចរណ៍ផ្លូវគោកនៅតាមរាជធានី-ខេត្ត ទាំង ២៥ ចែកស្ទិកឃ័រចំណាំងប្លាត និងមួកសុវត្ថិភាពដល់អ្នកបើកបរទោចចក្រយានយន្ដ។
លោកថ្លែងថា៖ «យើងបន្ដរឹតបន្ដឹងការអនុវត្តច្បាប់ស្ដីពីចរាចរណ៍ផ្លូវគោកនៅគោលដៅដើមទីក្នុងកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុ ព្រមទាំងបន្ដការងារត្រួតពិនិត្យយានយន្ដកែច្នៃខុសលក្ខណៈបច្ចេកទេសនៅតាមរាជធានី-ខេត្ត»។
លោក គឹម បញ្ញា នាយកអង្គការមូលនិធិបង្ការរបួសអាស៊ីបានថ្លែងថា ការកាត់បន្ថយគ្រោះថ្នាក់ចរាចរណ៍នៅកម្ពុជា គឺផ្ដើមចេញពីការកែប្រែឥរិយាបថ និងបណ្ដុះឥរិយាបថសុវត្ថិភាពចរាចរណ៍ដល់អ្នកបើកបរ។ កិច្ចការងារនេះគឺត្រូវផ្ដើមចេញពីការបញ្ចូលការអប់រំផ្សព្វផ្សាយនៅតាមសាលារៀនតាមរយៈកម្មវិធីសិក្សាដល់កុមារ សិស្សានុសិស្ស និងផ្សារភ្ជាប់ជាមួយនឹងការអនុវត្ដជាក់ស្ដែងដោយនាំសិស្សនៅកម្រិតថ្នាក់ទី ១០ ដល់ថ្នាក់ទី ១២ ទៅពិនិត្យមើលពីស្ថានភាពជនរងគ្រោះដោយសារគ្រោះថ្នាក់ចរាចរណ៍ដើម្បីឱ្យពួកគេយល់ពីបញ្ហាប្រឈមនៃគ្រោះថ្នាក់នេះគឺមានកម្រិតធ្ងន់ធ្ងរ។
លោកថ្លែងថា៖ «ទាក់ទងនឹងការបណ្ដុះឥរិយាបថនេះ ខ្ញុំឃើញភាគច្រើនជនរងគ្រោះដោយសារគ្រោះថ្នាក់ចរាចរណ៍ គឺជាអ្នកបើកបរម៉ូតូដែលស្ថិតនៅក្នុងវ័យពី ១៥ ទៅ ២៩ ឆ្នាំ។ ដូច្នេះបើសិនជារដ្ឋាភិបាលអាចមានលទ្ធភាពគួរបញ្ចូលការបណ្ដុះបណ្ដាលអំពីជំនាញបើកបរម៉ូតូដល់សិស្ស និងយុវជនបន្ថែមលើការនាំទៅស្វែងយល់ផ្ទាល់តាមមន្ទីរពេទ្យ»។
លោកថា ការអប់រំផ្សព្វផ្សាយអំពីបញ្ហាគ្រោះថ្នាក់ចរាចរណ៍គួរត្រូវបានធ្វើឡើងតាមការផ្សព្វផ្សាយបញ្ហាអំពីការរីករាលដាលជំងឺកូវីដ ១៩ ដែរ ដូចជានៅពេលពលរដ្ឋខលទូរស័ព្ទបានឮសំឡេងសារអប់រំពីសុវត្ថិភាពចរាចរណ៍ជាដើម៕
វីដេអូ៖
