.jpg)
លោកស្រី ឱ វណ្ណឌីន ពេលចុះទៅក្រចេះពីថ្ងៃ ៨ កុម្ភៈ។ រូបថត ក្រសួងសុខាភិបាល
ភ្នំពេញៈ រដ្ឋលេខាធិការក្រសួងសុខាភិបាលលោកស្រី ឱ វណ្ណឌីន បានណែនាំឱ្យរដ្ឋបាលខេត្តទូទាំងប្រទេសរៀបចំក្រុមគ្រូពេទ្យចល័ត ដើម្បីចុះចាក់វ៉ាក់សាំងដូសជំរុញជូនពលរដ្ឋនៅតាមមូលដ្ឋានបន្ថែមពីលើទីតាំងកំពុងដំណើរការស្រាប់នៅតាមមណ្ឌលនានា ខណៈករណីឆ្លងកូវីដប្រភេទអូមីក្រុងកំពុងកើនឡើង។
ក្នុងឱកាសចុះពិនិត្យមើលដំណើរការចាក់វ៉ាក់សាំងនៅខេត្តក្រចេះកាលពីថ្ងៃទី ៨ ខែកុម្ភៈ លោកស្រី ឱ វណ្ណឌីន ដែលជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ក្នុងក្របខ័ណ្ឌទូទាំងប្រទេសផងនោះបានថ្លែងថា ការរៀបចំឱ្យមានក្រុមគ្រូពេទ្យចល័តចុះទៅដល់ទីតាំងមូលដ្ឋានប្រជាពលរដ្ឋគឺជារឿងចាំបាច់បន្ថែមទៀត ដើម្បីឱ្យពលរដ្ឋដែលពិបាកធ្វើដំណើរទទួលបានដូសជំរុញគ្រប់ៗគ្នា។
លោកស្រីថា៖ «យើងនឹងផ្លាស់ប្តូរនីតិវិធី និងបែបបទដោយភាពទន់ភ្លន់ជាជាងយើងអង្គុយរង់ចាំឱ្យគាត់មកទទួលយកវ៉ាក់សាំង អ៊ីចឹងទាំងអាជ្ញាធរក្រុមគ្រូពេទ្យត្រូវសហការគ្នាឈរលើស្មារតីសាមគ្គីភាពកិច្ចសហប្រតិបត្តិការល្អ និងរៀបចំចាត់ចែង ដើម្បីទៅរកគាត់វិញ»។
ក្នុងន័យនេះលោកស្រីបានបញ្ជាក់ថា អាជ្ញាធរភូមិ-ឃុំ ចាំបាច់ត្រូវធ្វើជំរឿនពលរដ្ឋដែលបានចាក់ដូសទី ៣ ហើយក្នុងករណីរកឃើញមានអ្នកមិនទាន់បានចាក់ដូសជំរុញនោះ ត្រូវសហការជាមួយក្រុមគ្រូពេទ្យ ដើម្បីកំណត់ថ្ងៃចុះចាក់ជូនដល់ទីតាំងមូលដ្ឋាននោះតែម្តង។
លោកស្រី ឱ វណ្ណឌីន បានកត់សម្គាល់ថា មូលហេតុដែលពលរដ្ឋមួយចំនួនមិនទាន់ទទួលបានដូសជំរុញដោយសារពលរដ្ឋខ្វះការទទួលបានព័ត៌មាន និងខ្លះទៀតមមាញឹកលើការងារ។
លោកស្រីថា៖ «បងប្អូនប្រជាពលរដ្ឋខ្លះគាត់គិតថា បានចាក់វ៉ាក់សាំងហើយ តែដោយសារគាត់មិនបានយល់ថា ការចាក់នោះគេតម្រូវចាក់ដូសទី ២ ទី ៣ ឬទី ៤ យ៉ាងម៉េច អ៊ីចឹងគាត់ហាក់ដូចជា គិតថា មិនមានភាពចាំបាច់អីដែលត្រូវគាត់ចាក់ទៀតទេ។ ម្យ៉ាងវិញទៀតដោយសារគាត់រវល់នឹងការប្រកបរបររកស៊ីទទួលទានផង ហើយមួយចំនួនធំនៅតាមមូលដ្ឋាន គាត់ទៅធ្វើស្រែ ចម្ការ ដែលពិបាកមកទទួលយកនូវវ៉ាក់សាំងរហូតដល់គាត់ចប់ ២-៣ ខែ បានគាត់ឡើងមកផ្ទះសំបែង។ បើសិនគាត់មានព័ត៌មានគ្រប់គ្រាន់ គាត់នឹងចាក់ ប៉ុន្តែប្រសិនបើខ្វះព័ត៌មានទៀត គាត់ចុះទៅស្រែទៀតហើយដល់អ៊ីចឹងការចាក់របស់គាត់នឹងខ្វះចន្លោះ»។
លោកស្រីបានលើកឡើងថាអាជ្ញាធរពាក់ព័ន្ធដែលធ្វើការរួមគ្នាអំឡុងពេលចុះមូលដ្ឋានគឺត្រូវឆ្លៀតឱកាសផ្តល់នូវការអប់រំសុខភាពបន្ថែមទៀតដល់ពួកគាត់ពីព្រោះវ៉ាក់សាំងតែ ១ មុខវាអត់គ្រប់គ្រាន់ក្នុងការទប់ស្កាត់វីរុសកូវីដ ១៩ ទេ។
ជាមួយគ្នានេះ លោកស្រីក៏បានក្រើនរំឭកដល់ប្រជាពលរដ្ឋដែលដល់វេនត្រូវចាក់ដូសជំរុញទី ២ ឬទី ៣ ត្រូវរួសរាន់មកចាក់នៅតាមទីតាំងមូលដ្ឋានសុខាភិបាលរបស់ខ្លួន ដើម្បីបង្កើនកងការពារជំងឺកូវីដ ១៩ ជាពិសេសអ្នកមានជំងឺប្រចាំកាយដូចជា អេដស៍ ឬជំងឺផ្សេងៗទៀតត្រូវតែចាក់វ៉ាក់សាំងបង្ការជំងឺកូវីដជាចាំបាច់។
ប្រធានមន្ទីរសុខាភិបាលខេត្តកំពតលោក ញា ប៊ុនថន បានថ្លែងថា ក្រុមគ្រូពេទ្យចល័ត និងអាជ្ញាធរមូលដ្ឋានបានចុះចាក់វ៉ាក់សាំងជូនពលរដ្ឋក្នុងមូលដ្ឋានតាំងពីថ្ងៃទី ៨ កុម្ភៈ ម្ល៉េះ។
លោកបានបញ្ជាក់ថា៖ «ខាងឃុំ-សង្កាត់ គេសហការជាមួយគ្រប់មណ្ឌលសុខភាពទាំងអស់ ៦៥ មណ្ឌល ក្នុងខេត្តយើងតាមពិតយើងបានផ្សព្វផ្សាយជាហូរហែពាក់ព័ន្ធការចាក់ដូសជំរុញនេះ ប៉ុន្តែដោយសារពលរដ្ឋខ្លះគាត់រវល់ខ្លះទៀតគាត់គិតថា កូវីដស្ងប់ស្ងាត់ ដោយសារយើងគ្រប់គ្រងបានល្អ អ៊ីចឹងគាត់មិនសូវខ្វល់»។
ទោះជាយ៉ាងណា នៅប៉ុន្មានថ្ងៃចុងក្រោយនេះ ការឆ្លងរីករាលដាលចូលក្នុងសហគមន៍នៃមេរោគកូវីដបំប្លែងថ្មីប្រភេទអូមីក្រុងកំពុងកើនឡើងជាលំដាប់រហូតធ្វើឱ្យលោកនាយករដ្ឋមន្ត្រី ហ៊ុន សែន បានចេញសារពិសេសមួយកាលយប់ថ្ងៃទី ៨ ខែកុម្ភៈដោយតម្រូវឱ្យមានវិធានការជាបន្ទាន់បន្ថែមលើវិធានការដែលមានស្រាប់ ខណៈក្រសួងបានរកឃើញអ្នកឆ្លងវីរុសកូវីដប្រភេទអូមីក្រុងរហូតជាង ២០០ ករណី។
ទាក់ទងនឹងបញ្ហាមេរោគប្រភេទអូមីក្រុងកំពុងវាយលុកនៅកម្ពុជានេះលោក ញា ប៊ុនថន បានថ្លែងថា ពេលនេះអាជ្ញាធរខេត្តកំពតបាននិងកំពុងបង្កើនការផ្សព្វផ្សាយអប់រំដល់ពលរដ្ឋឱ្យមានការប្រុងប្រយ័ត្នខ្ពស់ ខណៈពលរដ្ឋខ្លះបានងាកមកចាប់អារម្មណ៍លើការចាក់វ៉ាក់សាំងដូសជំរុញជាបណ្តើរៗ។
យោងតាមរបាយការណ៍ក្រសួងសុខាភិបាលឱ្យដឹងថា គិតត្រឹមថ្ងៃទី ៨ ខែកុម្ភៈ អត្រាចាក់វ៉ាក់សាំងកូវីដ ១៩ ទូទាំងប្រទេសមានជិត ៩០ ភាគរយធៀបនឹងប្រជាជនសរុប ១៦ លាននាក់៕
វីដេអូ៖
