សៀមរាបៈ អាជ្ញាធរជាតិអប្សរាបានបើកវគ្គបណ្តុះបណ្តាលពង្រឹងជំនាញវិជ្ជាជីវៈបដិសណ្ឋារកិច្ច និងបំពាក់បំប៉នភាសាអង់គ្លេសដល់ភ្នាក់ងារទេសចរណ៍ជាតិចំនួន ១០០ នាក់ ដើម្បីរួមចំណែកលើកតម្លៃសម្បត្តិបេតិកភណ្ឌរបស់ពិភពលោក។
ការបណ្តុះបណ្តាលភ្នាក់ងារទេសចរណ៍ចំនួន ១០០ នាក់នេះធ្វើឡើងដោយមជ្ឈមណ្ឌលបណ្តុះបណ្តាលអង្គរ និងនាយកដ្ឋានអភិវឌ្ឍន៍ទេសចរណ៍អង្គរនៃអាជ្ញាធរជាតិអប្សរានៅថ្ងៃទី ៨ ខែកុម្ភៈលើជំនាញបដិសណ្ឋារកិច្ចដល់មន្ត្រី និងបុគ្គលិកដែលកំពុងបម្រើការងារនេះ។ គោលបំណងនៃការបណ្តុះបណ្តាលនេះគឺដើម្បីផ្ដល់ជំនាញត្រឹមត្រូវដល់ភ្នាក់ងារទេសចរណ៍របស់អាជ្ញាធរអប្សរា ទាំងការស្វាគមន៍ និងបម្រើសេវាយ៉ាងកក់ក្ដៅ ក្នុងដំណើរការគ្រប់គ្រងតំបន់រមណីយដ្ឋានអង្គរ ដើម្បីរួមចំណែកការលើកតម្លៃសម្បត្តិបេតិកភណ្ឌរបស់ពិភពលោក។
អគ្គនាយករងនៃអាជ្ញាធរជាតិអប្សរាលោក ឡុង កុសល ដែលចូលរួមជាអធិបតីក្នុងពិធីនោះបានថ្លែងថា វគ្គបណ្តុះបណ្តាលនេះពិតជាមានសារៈសំខាន់ណាស់សម្រាប់មន្ត្រី និងភ្នាក់ងារទេសចរណ៍នៃអាជ្ញាធរជាតិអប្សរា ដែលកំពុងបម្រើសេវាកម្មទេសចរណ៍ដោយត្រូវគិតគូរទាំងគុណភាពនៃសេវាកម្មទេសចរណ៍ និងគិតគូរពីផលប៉ះពាល់នៃភ្ញៀវទេសចរដែលមកមើលប្រាសាទបុរាណ ។
លោកថា៖ «យើងត្រូវតែសិក្សាបន្ថែមសមត្ថភាពរបស់យើងក្នុងន័យធ្វើយ៉ាងណាឱ្យភ្ញៀវទេសចរដែលមកទស្សនាអង្គរអាចទទួលបានបទពិសោធដ៏ល្អបំផុត ហើយផ្តល់ផលប៉ះពាល់ដ៏តិចបំផុតដល់តំបន់រមណីយដ្ឋានអង្គរ»។
លោកបានឱ្យដឹងថា ការបណ្តុះបណ្តាលនេះផ្តោតលើខ្លឹមសារ ៤ ចំណុច រួមមាន ១- របៀបបដិសណ្ឋារកិច្ចសម្រាប់ភ្នាក់ងារទេសចរណ៍ ២- បទប្បញ្ញត្តិនៃការទស្សនាប្រាសាទ និងរមណីយដ្ឋានអង្គរ ៣- ដំណោះស្រាយលើបញ្ហាប្រឈមនានានៅតាមប្រាសាទ និងទី ៤- បំប៉នជំនាញ ភាសាអង់គ្លេសសម្រាប់ប្រើប្រាស់ក្នុងវិជ្ជាជីវៈ។
លោក កុសល បានឱ្យដឹងដែរថា នេះគឺជាការបណ្តុះបណ្តាលផ្ទៃក្នុងដើម្បីឱ្យភ្នាក់ងារមានសមត្ថកិច្ច និងសមត្ថភាពគ្រប់គ្រាន់ក្នុងការទទួលធ្វើបដិសណ្ឋារកិច្ចសម្រាប់ភ្ញៀវទេសចរ ព្រោះគាត់ជាអ្នកជួរមុខ ដែលតែងប្រាស្រ័យជាមួយភ្ញៀវ។
លោកថា៖ «នេះជាលើកទី ១ កន្លងមកក៏យើងមានដែរ ប៉ុន្តែបណ្តុះបណ្តាលទៅលើជំនាញផ្សេងៗ មិនត្រឹមតែបដិសណ្ឋារកិច្ចទេ យើងក៏បង្រៀននូវកាយវិការ ទឹកមុខ អាកប្បកិរិយាសមរម្យ ក្នុងការប្រាស្រ័យទាក់ទងជាមួយភ្ញៀវ។ ក្រៅពីនោះក៏បានបណ្តុះបណ្តាលគាត់ពីការសង្គ្រោះបឋម រឿងនេះសំខាន់ណាស់ ព្រោះអ្នកដើរទស្សនា ជួនកាលមានបញ្ហាសុខភាព ដូច្នេះការចេះវិធីសាស្ត្រជួយបឋមជារឿងចាំបាច់»។
លោកបន្ថែមថា ការបណ្តុះបណ្តាលនេះដោយធ្វើការវិលជុំទី ១ បណ្តុះបណ្តាលគ្រប់ជនបង្គោល ទី ២ អ្នកទទួលបានបណ្តុះបណ្តាលនេះត្រូវបណ្តុះបណ្តាលបន្តដល់សមាជិករបស់ខ្លួនដែលមានសមាជិកសរុបទាំងអស់ជាង ៣០០ នាក់ ។
ទីប្រឹក្សាសមាគមទីភ្នាក់ងារទេសចរណ៍កម្ពុជាលោក ហូ វណ្ឌី ថ្លែងថា ការបណ្តុះបណ្តាលនេះនឹងជួយបង្កើនជំនាញបដិសណ្ឋារកិច្ចបន្ថែមដល់ទីភ្នាក់ងារទេសចរណ៍ដើម្បីបម្រើជូនអ្វីដែលថ្មីៗ។
លោកថា៖ «យើងសង្កេតឃើញថា អាជ្ញាធរជាតិអប្សរាបានធ្វើកិច្ចការងារជាច្រើនពាក់ព័ន្ធហេដ្ឋារចនាសម្ព័ន្ធប្រាង្គប្រាសាទអង្គរ អ៊ីចឹងទាល់តែយើងស៊ីចង្វាក់គ្នារវាងអ្នកដាក់ផែនការ និងអ្នកប្រតិបត្តិ ជាពិសេសការីទេសចរណ៍ ទីភ្នាក់ងារទេសចរណ៍ក៏ដូចជាអ្នកផ្គត់ផ្គង់សេវាកម្មមួយចំនួនដែលផ្តល់សេវាកម្មជូនភ្ញៀវផ្ទាល់ឱ្យគាត់ស្គាល់ពីទិសដៅថ្មីគឺផែនការដើរកម្សាន្តរបស់ភ្ញៀវបន្ទាប់ពីកូវីដ»។
លោកបានបញ្ជាក់ផងដែរ ពីសារៈសំខាន់របស់ការីទេសចរណ៍ ដែលជាអ្នករៀបចំកញ្ចប់ទស្សនកិច្ចថា៖ «គាត់ត្រូវតែស្វែងយល់អំពីបរិបទថ្មីៗជាពិសេសការចង្អុលបង្ហាញ ការអត្ថាធិប្បាយ ការពន្យល់ភ្ញៀវ ត្រូវតែទំនាក់ទំនងជាមួយស្ថាប័នជំនាញ ជាពិសេសត្រូវជួលមគ្គុទ្ទេសក៍ដែលមានអាជ្ញាប័ណ្ណចេញពីក្រសួងទេសចរណ៍ ពីព្រោះអ្នកទាំងនេះបានឆ្លងកាត់ការបណ្តុះបណ្តាលស្របតាមក្រឹត្យក្រម»៕