ភ្នំពេញៈ លោកនាយករដ្ឋមន្ត្រី ហ៊ុន សែន និងក្រសួងសុខាភិបាលបានក្រើនរំឭកជាថ្មី ដោយភ្ជាប់សារអំពាវនាវយ៉ាងទទូចដល់ប្រជាពលរដ្ឋឱ្យមានការប្រុងប្រយ័ត្នខ្ពស់ ដោយអនុវត្តវិធានសុខាភិបាលឱ្យបានម៉ឺងម៉ាត់ ខណៈវីរុសបំប្លែងថ្មីអូមីក្រុងកំពុងវាយលុកនៅកម្ពុជា និងបន្តកើនឡើងជារៀងរាល់ថ្ងៃ។
លោកនាយករដ្ឋមន្ត្រី ហ៊ុន សែន បានចេញសារពិសេសមួយនាយប់ថ្ងៃទី ៨ ខែកុម្ភៈ ដោយលោកតម្រូវឱ្យមានវិធានការជាបន្ទាន់បន្ថែមលើវិធានការ ដែលមានរួចមកហើយ ដើម្បីការពារការឆ្លងរាលដាលវីរុសកូវីដ ១៩ ខណៈដែលក្រសួងបានរកឃើញវីរុសកូវីដ ១៩ ប្រភេទអូមីក្រុងឆ្លងជាង ២០០ ករណីក្នុង ១ ថ្ងៃ។
លោកក៏បានអំពាវនាវដល់ជនរួមជាតិទាំងអស់យកចិត្តទុកដាក់លើកិច្ចការពារខ្លួនជាចាំបាច់ក្នុងនោះត្រូវកាត់បន្ថយការជួបជុំ ការប្រមូលផ្តុំ ក៏ដូចជាវិធីទាំងឡាយដែលបាននិងកំពុងអនុវត្ត គឺ វិធានការ ៣ កុំ និង ៣ ការពារ។
លោក ហ៊ុន សែន ថ្លែងតាមរយៈសារសំឡេងពិសេសថា៖ «ប្រសិនបើម្នាក់ៗអនុវត្តបានជំងឺនេះក៏មិនឆ្លងរីករាលដាលធ្ងន់ធ្ងរដូចនេះដែរ។ ដូច្នេះខ្ញុំសុំអំពាវនាវទៅដល់ ប្រជាពលរដ្ឋ កាត់បន្ថយការជួបជុំ ផឹកស៊ី កម្សាន្តសប្បាយ ដើម្បីធានានូវការរក្សាគម្លាតសុវត្ថិភាព សម្រាប់ការពារនូវការឆ្លង បើទោះបីជាមេរោគបច្ចុប្បន្ននៅកម្ពុជាពុំមានករណីប្រភេទដែលតា និងអាល់ហ្វា ដែលឆក់យកជីវិតប្រជាជនក៏ដោយចុះ»។
លោកបន្តថា ជំងឺកូវីដ ១៩ ប្រភេទអូមីក្រុងបានមកជំនួសមេរោគកូវីដ ១៩ ប្រភេទដែលតា និងអាល់ហ្វា ហើយទោះបីជាវីរុសប្រភេទអូមីក្រុងនេះស្រាលក៏ដោយ ប៉ុន្តែប្រសិនបើការឆ្លងនេះមានអត្រាកើនឡើងខ្ពស់ វានឹងនាំមកនូវគ្រោះថ្នាក់ ដោយការសាយភាយពីរាជធានីភ្នំពេញ ទៅកាន់បណ្តាខេត្តដែលខេត្តមួយចំនួនពុំមានករណីឆ្លងនោះទេ។
លោកថ្លែងថា៖ «ត្រូវយកចិត្តទុកដាក់ ដើម្បីពង្រឹងនូវស្ថានភាពទាំងឡាយនៅតាមទីកន្លែង ដែលមានការបើកឱ្យធ្វើអាជីវកម្ម ដូចជា រង្គសាល ពិធីជួបជុំនានា ឬពិធីរៀបអាពាហ៍ពិពាហ៍ ឬការជួបជុំខាងសាសនាជាដើម គួរតែត្រូវបានកម្រិត ដោយការធ្វើកាន់តែតិច កាន់តែល្អ»។
លោក ហ៊ុន សែន បញ្ជាក់ថា៖ «យើងធ្វើនេះមិនមែនជាការដើរថយក្រោយនោះទេ ក៏ប៉ុន្តែយើងធ្វើនេះ ដើម្បីទប់ស្កាត់ជាយថាហេតុ។ អូមីក្រុងកំពុងតែរីករាលដាលនៅទីក្រុងភ្នំពេញ ហើយប្រសិនបើយើងមិនប្រយ័ត្នទេ អូមីក្រុងនឹងពង្រាយនៅទូទាំងប្រទេស ដូចដែលយើងធ្លាប់ជួបប្រទះនាពេលកន្លងមកដូចគ្នា»។
តាមរយៈសារសំឡេងនេះលោក នាយករដ្ឋមន្ត្រីក៏បានអំពាវនាវឱ្យប្រជាពលរដ្ឋត្រូវទៅទទួលយកនូវការចាក់វ៉ាក់សាំងកូវីដ ១៩ ឱ្យបានគ្រប់ៗគ្នា ដោយសារវ៉ាក់សាំងជួយកាត់បន្ថយនូវការឆ្លង និងការស្លាប់ដោយសារជំងឺកូវីដ ១៩។
ទន្ទឹមនឹងនេះ រដ្ឋមន្ត្រីក្រសួងសុខាភិបាលលោក ម៉ម ប៊ុនហេង បានចេញសេចក្តីណែនាំក្រើនរំឭក ដោយបន្តយន្តការ ការពារការចម្លងវីរុសកូវីដ ១៩ ជាពិសេស អូមីក្រុង (Omicron)។
សេចក្តីណែនាំចុះថ្ងៃទី ៨ កុម្ភៈ ថា ក្រសួងសុខាភិបាលសង្កេតឃើញ បច្ចុប្បន្នស្ថានភាពនៃការឆ្លងវីរុសកូវីដ ១៩ ជាពិសេស អូមីក្រុង នៅកម្ពុជាមានការកើនឡើងជាបន្តបន្ទាប់លើសពី ៣ ខ្ទង់ទៅហើយជារៀងរាល់ថ្ងៃ ដែលគួរឱ្យមានការព្រួយបារម្ភ ខណៈវិធានការការពារការចម្លងជំងឺកូវីដ ១៩ ក៏ឃើញថានៅមិនទាន់មានការអនុវត្តបានហ្មត់ចត់ និងម៉ឺងម៉ាត់។ ជាពិសេសការជួបជុំគ្នា គឺមានការកើនឡើងច្រើនទៅៗ ដោយមិនមានការប្រតិបត្តិត្រឹមត្រូវតាមវិធានការសុខាភិបាល ដែលបង្កលទ្ធភាពឱ្យមានការចម្លងវីរុសកូវីដ ១៩ កាន់តែច្រើនឡើងជារៀងរាល់ថ្ងៃនោះ។
ក្រសួងសុខាភិបាលក៏បានធ្វើការក្រើនរំឭកហើយរំឭកទៀត និងអំពាវនាវដោយទទូចដល់ប្រជាពលរដ្ឋនៅទូទាំងប្រទេសកម្ពុជាឱ្យបន្តប្រុងប្រយ័ត្នខ្ពស់ ការពារខ្លួន កុំភ្លេចខ្លួនឱ្យសោះដោយត្រូវចេះផ្លាស់ប្ដូរទម្លាប់រស់នៅរបស់ខ្លួនឱ្យស្របតាមគន្លងនៃការរៀនរស់នៅធម្មតាជាមួយវីរុសកូវីដ ១៩ តាមបែបគន្លងថ្មីក្នុងបរិបទប្រយុទ្ធនឹងជំងឺកូវីដ ១៩ សំដៅបង្ការ គ្រប់គ្រង និងកាត់ផ្តាច់នូវខ្សែចម្លងនៃវីរុស។ ជាពិសេសពពួកប្រភេទបំប្លែងថ្មីអូមីក្រុងនេះ ឬក៏ប្រភេទថ្មីផ្សេងទៀត ដែលអាចនឹងកើតមាននៅប្រទេសកម្ពុជា ជាយថាហេតុណាមួយ។
ក្រសួងសុខាភិបាលពន្យល់ថា អូមីក្រុង កំពុងតែសកម្មចរាចរយ៉ាងឆាប់រហ័សដោយគ្មានព្រំដែន និងគ្មានលិខិតឆ្លងដែននៅលើសកលលោក នៅក្នុងតំបន់ និងនៅប្រទេសកម្ពុជា ដែលតម្រូវឱ្យបងប្អូនចាំបាច់ត្រូវតែប្រុងប្រយ័ត្ន និងត្រៀមលក្ខណៈឱ្យបានគ្រប់គ្រាន់ក្នុងការឆ្លើយតបទៅនឹងជំងឺកូវីដ ១៩ នេះឱ្យបានទាន់ពេលវេលា ដើម្បីចៀសវាងបាននូវមហន្តរាយសុខភាពសាធារណៈ ផលប៉ះពាល់សេដ្ឋកិច្ចគ្រួសារ និងសេដ្ឋកិច្ចសង្គម។
ក្រសួងបញ្ជាក់ថា៖ «យើងត្រូវតែអត់ធ្មត់បន្ថែមទៀត ខណៈដែលយើងកំពុងតែរៀនរស់នៅជាមួយនឹងវត្តមាននៃវីរុសកូវីដ ១៩ និងការប្រុងប្រយ័ត្នខ្ពស់នៃការបើកដំណើរការសេដ្ឋកិច្ច និងសង្គមឡើងវិញនៅពេលនេះ ដោយយើងទាំងអស់គ្នាចាំបាច់ត្រូវធ្វើសកម្មភាពឆ្លើយតបរួមគ្នា ដោយផ្អែកលើអ្វីដែលយើងបានដឹង និងធ្វើបានជោគជ័យរួចមកហើយនោះ និងរួមគ្នាទប់ស្កាត់ការចម្លងជាបន្តទៀត ដើម្បីកុំឱ្យហួសពេល និងមានការស្តាយក្រោយ»។
ក្រសួងសុខាភិបាលក៏សង្កេតឃើញដែរថា ការចម្លងនាពេលបច្ចុប្បន្នមានសម្ទុះកើនឡើងលើក្រុមយុវវ័យ ឬវ័យកណ្តាល ដែលក្រុមនេះបានដើរចេញក្រៅផ្ទះច្រើន ឬមានការជួបជុំមិត្តភក្តិ ឬការជួបជុំណាមួយ។ ក្នុងន័យនេះ ក្រសួងស្នើឱ្យកាត់បន្ថយជាអតិបរមានូវការជួបជុំគ្នា ដើម្បីទទួលទានអាហាររួមគ្នា ឬបង្កឱ្យមានការជួបជុំទ្រង់ទ្រាយធំពេក ដូចជា ពិធីភ្ជាប់ពាក្យ ពិធីមង្គលការ ឬពិធីបុណ្យទានអ្វីមួយត្រូវមានការកំណត់ទំហំនៃពិធីឱ្យតូចៗល្មមៗ ឬត្រូវនៅផ្ទះ ប្រសិនបើមិនមានភារកិច្ចចាំបាច់ត្រូវចេញក្រៅ។
ក្រសួងសុខាភិបាល រំឭកថា ទោះបីជាមានការគ្រប់គ្រងឆ្លើយតបនឹងការរាតត្បាតជំងឺកូវីដ ១៩ បានលទ្ធផលល្អប្រសើរក៏ដោយ ក៏យើងមិនត្រូវភ្លេចខ្លួន ហើយមានការធ្វេសប្រហែស ឬបំភ្លេចចោលនូវកិច្ចការពារខ្លួនកុំឱ្យមានការចម្លងជំងឺកូវីដនោះឡើយ។
ក្រសួងបញ្ជាក់ថា៖ «ជំងឺរាតត្បាតកូវីដ ១៩ នេះនៅមិនទាន់ចប់នៅឡើយទេ ហើយយើងកំពុងតែប្រឈមមុខទៅនឹងការឆ្លងវីរុសកូវីដ ១៩ អូមីក្រុងនេះជាបន្តបន្ទាប់ជារៀងរាល់ថ្ងៃដែលជាការចាំបាច់ខ្លាំងណាស់ក្នុងពេលនេះ ដែលបុគ្គលគ្រប់រូបត្រូវត្រៀមលក្ខណៈ និងរៀបចំឱ្យបានល្អសម្រាប់ការឆ្លើយតប ការពារខ្លួន និងចូលរួមធ្វើអន្តរាគមន៍ទៅនឹងការឆ្លងជំងឺដ៏កាចសាហាវមួយនេះ»៕