ភ្នំពេញៈ អ្នកជំនាញទីផ្សារឌីជីថលបានជួបជជែកគ្នាស្តីពីការលក់អនឡាញ ដោយការជួបជជែកគ្នានេះ គឺជាផ្នែកមួយនៃគម្រោងសម្ព័ន្ធកាន់តែខ្លាំងជាមួយឌីជីថល ដែលត្រូវបានបង្កើតឡើង បន្ទាប់ពីមានការរីករាលដាលនៃជំងឺកូវីដ ១៩ ដែលបានបណ្តាលឱ្យអាជីវកម្មរាប់រយត្រូវបានបិទទ្វារ។
ការជជែកពិភាក្សានេះត្រូវបានធ្វើឡើងកាលពីយប់ថ្ងៃទី ៩ កុម្ភៈ តាមរយៈប្រព័ន្ធ Zoom ដែលមានការចូលរួមពីទីផ្សារអេឡិចត្រូនិកកំពូលៗប្រចាំកម្ពុជាក្នុងគោលបំណងផ្សព្វផ្សាយអំពីវេទិកាទីផ្សារអេឡិចត្រូនិកក្នុងការបង្កើនភាពរឹងមាំ នៃវិស័យទីផ្សារឌីជីថល សម្រាប់អាជីវកម្មខ្នាតមីក្រូ តូច និងមធ្យម (MSMEs) នៅកម្ពុជា។
លោក សួន បូឌីសត្ត អ្នកសម្របសម្រួលគម្រោងសម្ព័ន្ធ "កាន់តែខ្លាំងជាមួយឌីជីថល" បានប្រាប់ភ្នំពេញប៉ុស្តិ៍នៅថ្ងៃទី ៩ កុម្ភៈថា សម្ព័ន្ធ " កាន់តែខ្លាំងជាមួយឌីជីថល" បានរៀបចំសិក្ខាសាលាអនឡាញសម្រាប់អាជីវកម្មក្នុងស្រុកនេះគឺដើម្បីជួបជជែកពិភាក្សា និងទទួលបានការផ្តល់ជូនពិសេសពីបណ្តាផ្សារពាណិជ្ជកម្មអេឡិចត្រូនិកធំៗនៅកម្ពុជា។ សិក្ខាសាលានេះ គឺជាផ្នែកមួយរបស់សម្ព័ន្ធ " កាន់តែខ្លាំងជាមួយឌីជីថល" ក្នុងការបើកទំព័រឆ្នាំ ២០២២ ជាមួយការបន្តកិច្ចខិតខំប្រឹងប្រែង ពង្រឹងផ្នែកឌីជីថលសម្រាប់ជួយដល់អាជីវកម្មខ្នាតតូច និងមធ្យមនៅក្នុងប្រទេសកម្ពុជានៅលើវេទិកាពាណិជ្ជកម្មអេឡិចត្រូនិកជាមួយដៃគូរបស់យើង។
លោកបានបញ្ជាក់ថា៖ «យើងបានឱ្យអ្នកចូលរួមជាពិសេសអ្នកជំនាញបានជជែកពិភាក្សាគ្នា ដើម្បីឱ្យអាជីវកម្មខ្នាតមីក្រូ តូច និងមធ្យមនៅស្រុកខ្មែរ ពួកយើងហ្នឹងមានការរីកចម្រើន។ សិក្ខាសាលានេះក៏បានឱ្យពួកគាត់បង្ហាញគោលដៅរបស់ពួកគាត់ សម្រាប់សារអេឡិចត្រូនិកហ្នឹងសម្រាប់អនាគតថា អាចនឹងឈានទៅដល់ពង្រីកខ្លួនជាអន្តរជាតិបានឬទេ?»។
លោក សួន បូឌីសត្ត បានលើកឡើងទៀតថា ដោយសារតែទីផ្សារឌីជីថលកំពុងមានសារៈសំខាន់ និងបានជួយគាំទ្រដល់អាជីវកម្មជាច្រើន ដែលកំពុងរងគ្រោះ ដោយសារការរីករាលដាលជំងឺកូវីដ ១៩ កិច្ចពិភាក្សានេះក៏បានបង្ហាញពីការយល់ដឹងអំពីការផ្លាស់ប្តូរនៃតម្រូវការទីផ្សារកម្ពុជា ដែលទាក់ទងនឹងចង្វាក់ផលិតកម្មរបស់អាជីវកម្មរបស់ពួកគេ និងបង្ហាញពីគេហទំព័រទីផ្សារឌីជីថល ដែលគាំទ្រដល់អាជីវកម្មខ្នាតមីក្រូ តូច និងមធ្យមក្នុងស្រុកទៅដល់ពួកគេផងដែរ។
បន្ទាប់ពីការរីករាលដាលនៃជំងឺកូវីដ ១៩ ដែលធ្វើឱ្យអាជីវកម្មរាប់រយត្រូវបានបិទទ្វារ យូអិនឌីភី ប្រចាំកម្ពុជា ស្ថានទូតអូស្ត្រាលី ក្រសួងប្រៃសណីយ៍ និងទូរគមនាគមន៍ និងសមាជិកសម្ព័ន្ធជាច្រើនផ្នែកបានរួមគ្នាដើម្បីបង្កើតសម្ព័ន្ធ "កាន់តែខ្លាំងជាមួយឌីជីថល"។ សម្ព័ន្ធនេះត្រូវបានបង្កើតឡើង គឺក្នុងគោលបំណងឆ្លើយតបទៅនឹងបញ្ហាប្រឈម ដោយពង្រឹងផ្នែកឌីជីថលទៅដល់មីក្រូសហគ្រាស សហគ្រាសធុនតូច និងមធ្យម នៅក្នុងប្រទេសកម្ពុជា។ នេះតាមទំព័រហ្វេសប៊ុករបស់ក្រសួងប្រៃសណីយ៍ និងទូរគមនាគមន៍។
ក្រសួងប្រៃសណីយ៍បានឱ្យដឹងថា៖ «ដោយសារការខិតខំប្រឹងប្រែងអស់ពីសមត្ថភាពពីគ្រូបណ្តុះបណ្តាល និងដៃគូរបស់យើងក្នុងឆ្នាំ ២០២១ យុទ្ធនាការនេះបានផ្ដល់វគ្គបណ្តុះបណ្ដាល អាជីវកម្មខ្នាតតូច និងមធ្យមចំនួន ១ ០០០ អាជីវកម្ម ដោយជោគជ័យដែលក្នុងនោះមានអាជីវកម្មប្រមាណ ៦៦,៧៦ ភាគរយ នៃអាជីវកម្មសរុបបានចាប់ផ្តើមលក់អនឡាញ»។
ក្រសួងប្រៃសណីយ៍ក៏បានបញ្ជាក់ទៀតថា កិច្ចសហការពីសម្ព័ន្ធនេះក៏បានផ្តល់ប្រយោជន៍ដល់អ្នកប្រើប្រាស់ និងម្ចាស់អាជីវកម្មរហូតដល់ ៤,២ លាននាក់ តាមរយៈយុទ្ធនាការផ្សព្វផ្សាយតាមអនឡាញ ខណៈអាជីវកម្មជាង ១០ ម៉ឺននៅកម្ពុជាបានទទួលផលពីទីផ្សារឌីជីថលនេះ៕