ស្ទឹងត្រែងៈ ចៅក្រមស៊ើបសួរសាលាដំបូងខេត្តស្ទឹងត្រែងកាលពីថ្ងៃទី ៨ ខែកុម្ភៈ បានចេញដីកាឃុំខ្លួនបុរសម្នាក់ ក្រោយពីបានសម្លាប់មនុស្សម្នាក់ក្នុងជម្លោះប្រើប្រាស់គ្រឿងញៀន នៅភូមិ-ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង។
លោក ដួង ស៊ីវុត្ថា នាយការិយាល័យព្រហ្មទណ្ឌកម្រិតធ្ងន់ ខេត្តស្ទឹងត្រែងឱ្យដឹងនៅថ្ងៃទី ៩ កុម្ភៈថា បុរសម្នាក់ក្នុងចំណោម ៣ នាក់ដែលត្រូវចៅក្រមឃុំខ្លួន ឈ្មោះ អូន ភាន់ អាយុ ៣២ ឆ្នាំពាក់ព័ន្ធបទឃាតកម្ម។ ជនត្រូវចោទម្នាក់នេះពាក់ព័ន្ធនឹងការវាយសម្លាប់ជនរងគ្រោះដោយកាំភ្លើងច្នៃ។ ចំណែកបុរស ២ នាក់ទៀតមិនជាប់ពាក់ព័ន្ធនឹងបទល្មើសឃាតកម្មទេ។
លោកថ្លែងថា៖ «មុនដំបូងយើងមានការសង្ស័យហើយបានហៅមនុស្ស ៣ នាក់មកសាកសួរ។ ប៉ុន្តែក្រោយសួរនាំមកឃើញថាបុរស ២ នាក់នោះមិនពាក់ព័ន្ធទេ គ្រាន់តែប្រើប្រាស់គ្រឿងញៀនទេ មេធាវីពួកគេបានធានាឱ្យនៅក្រៅឃុំបណ្តោះអាសន្ន»។
លោកថ្លែងដោយយោងតាមចម្លើយដែលកម្លាំងសមត្ថកិច្ចរបស់លោកសាកសួរបុរសឈ្មោះ អូន ភាន់ បានឆ្លើយថា រូបគេ និងជនរងគ្រោះឈ្មោះ ឌៀម ចិន្តា អាយុ ៣១ ឆ្នាំ គឺជាអ្នកប្រើប្រាស់គ្រឿងញៀនជាមួយគ្នា។ លុះនៅថ្ងៃទី ៣១ ខែមករា ឆ្នាំ ២០២២ ក៏ណាត់ជួបគ្នា ដើម្បីជក់ថ្នាំញៀនតែ ខណៈកំពុងជក់ថ្នាំញៀនពួកគេបានទាស់ពាក្យសម្តីគ្នាហើយពេលនោះរូបគេបានយកកាំភ្លើងកែច្នៃវាយក្បាលជនរងគ្រោះរហូតស្លាប់។
លោក ស៊ីវុត្ថា ថ្លែងថា ក្រោយពីនគរបាលបច្ចេកទេស វិទ្យាសាស្ត្រ រួមនឹងគ្រូពេទ្យចុះធ្វើកោសល្យវិច័យលើសាកសពមកបានពិនិត្យឃើញថា នៅលើក្បាលសាកសពមានស្នាមផុងលលាដ៍ក្បាល។ រីឯចម្លើយរបស់ជនសង្ស័យក៏ឆ្លើយថា គេបានយកកាំភ្លើងកែច្នៃវាយក្បាលជនរងគ្រោះដែរ ដោយជ្រុលដៃបណ្ដាលឱ្យស្លាប់ទៅ។
លោកថា៖ «នេះគ្រាន់តែទំនាស់ពាក្យសម្តីគ្នាទេ»៕