.jpg)
គ្រូពេទ្យមកទទួលអ្នកជំងឺឆ្លងកូវីដបំប្លែងថ្មីអូមីក្រុង នៅក្នុងសង្កាត់ស្ទឹងមានជ័យ។ រូបថត ហ្វេសប៊ុក
ភ្នំពេញៈ ក្រសួងសុខាភិបាលប្រកាសពីការរកឃើញអ្នកឆ្លងវីរុសកូវីដ ១៩ បំប្លែងថ្មី ប្រភេទអូមីក្រុង រហូតដល់ ២៦២ នាក់ ដែលក្នុងនោះភាគច្រើនឆ្លងក្នុងសហគមន៍ រីឯអ្នកដំណើរមកពីក្រៅប្រទេសឆ្លងត្រឹមតែជាង ៣០ នាក់ និងមានអ្នកជាសះស្បើយចំនួន ៧៦ នាក់ ហើយក៏គ្មានអ្នកស្លាប់ដោយសារជំងឺនេះទេ ក្នុងរយៈពេល ៣៧ ថ្ងៃមកនេះ។
ក្រសួងសុខាភិបាលបានឱ្យដឹងនៅព្រឹកថ្ងៃទី ១០ កុម្ភៈនេះថា ក្រសួងបានរកឃើញមនុស្សចំនួន ២៦២ នាក់បន្ថែមទៀត មានឆ្លងមេរោគកូវីដ ១៩ ប្រភេទអូមីក្រុង។ ការរកឃើញនេះមានករណីឆ្លងក្នុងសហគមន៍ចំនួន ២២៦ នាក់ និងអ្នកដំណើរមកពីបរទេសចំនួន ៣៦ នាក់។ ចំណែកអ្នកជំងឺកូវីដ ដែលបានជាសះស្បើយថ្មីទៀត គឺមានចំនួន ៧៦ នាក់។
គិតត្រឹមព្រឹកថ្ងៃទី ១០ កុម្ភៈ ឆ្នាំ ២០២២ កម្ពុជាមានអ្នកឆ្លងវីរុសកូវីដ ១៩ សរុបចំនួន ១២២ ៤៦៨ នាក់ អ្នកជាសះស្បើយសរុបមានចំនួន ១១៨ ៤២០ នាក់ និងអ្នកស្លាប់មានចំនួន ៣ ០១៥ នាក់៕
