.jpg)
ក.ប.ប ជួបជាមួយតំណាងក្រុមហ៊ុនចំនួន ២១ ក្នុងចំណោម ២៧ ក្រុមហ៊ុន ពាក់ព័ន្ធនឹងការផ្សាយពាណិជ្ជកម្មមានភ្ជាប់រង្វាន់ កាលពីថ្ងៃទី ៨ កុម្ភៈ។ រូបថត CCF
ភ្នំពេញៈ អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប» ព្រមានចាត់វិធានការ តាមនីតិវិធីទៅលើក្រុមហ៊ុន ឬអាជីវកម្ម ដែលមានការផ្សាយពាណិជ្ជកម្មមិនពិត បំភាន់ ឬបោកបញ្ឆោតអ្នកប្រើប្រាស់នូវផលិតទំនិញរបស់ខ្លួន ដែលវិធានការនេះនឹងអនុវត្តនៅដើមខែមីនាខាងមុខ។
ការព្រមាននេះបានធ្វើឡើង ក្រោយពីតំណាងក្រុមហ៊ុនចំនួន ២១ ក្នុងចំណោម ២៧ ក្រុមហ៊ុន បានជួបប្រជុំពិភាក្សាការងារជាមួយលោក ឌឹម ថេង អគ្គនាយករងនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប» ពាក់ព័ន្ធនឹងការផ្សាយពាណិជ្ជកម្មមានភ្ជាប់រង្វាន់។ ទំព័រហ្វេសប៊ុករបស់ «ក.ប.ប» បានបញ្ជាក់ថា៖ «កិច្ចប្រជុំនេះបានធ្វើឡើងនៅស្នាក់ការកណ្ដាលនៃអគ្គនាយកដ្ឋាន ក.ប.ប ដោយមានការចូលរួមពីតំណាងក្រុមហ៊ុន ដែលត្រូវបានអញ្ជើញដោយអគ្គនាយកដ្ឋាន ក.ប.ប ក្នុងគោលបំណងផ្សព្វផ្សាយអំពីការអនុវត្តច្បាប់ ដែលអគ្គនាយកដ្ឋាន ក.ប.ប នឹងចាត់វិធានការតាមនីតិវិធីទៅលើក្រុមហ៊ុន ឬអាជីវកម្ម ដែលមានការផ្សាយពាណិជ្ជកម្មមិនពិត បំភាន់ ឬបោកបញ្ឆោតអ្នកប្រើប្រាស់»។
លោក ផាន អូន ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន «ក.ប.ប» បានប្រាប់ភ្នំពេញប៉ុស្តិ៍បន្ថែមកាលពីថ្ងៃទី ៩ កុម្ភៈថា ក្រុមហ៊ុនដែលបានជួបជាមួយ «ក.ប.ប» នៅពេលនេះ គឺមិនទាន់ត្រូវបានរកឃើញថា មានជាប់ពាក់ព័ន្ធនឹងបទល្មើសខាងលើនៅឡើយទេ។
លោកបានបន្តថា ការជួបពិភាក្សាគ្នាលើកនេះ គឺធ្វើឡើងជាលើកចុងក្រោយ មុននឹង «ក.ប.ប» អនុវត្តវិធានការតាមច្បាប់ បន្ទាប់ពី «ក.ប.ប» បានជួបជាមួយបណ្តាក្រុមហ៊ុនទាំងនោះចំនួន ៣ ដងរួចមកហើយ ដើម្បីផ្សព្វផ្សាយអំពីការអនុវត្តច្បាប់ពាក់ព័ន្ធនឹងការផ្សាយពាណិជ្ជកម្មមិនពិត បំភាន់ ឬបោកបញ្ឆោតអ្នកប្រើប្រាស់។
លោកបញ្ជាក់ថា៖ «យើងបានជួបពួកគាត់កន្លងមកក្នុងឆ្នាំ ២០២១ គឺចំនួន ៣ លើកហើយ ដើម្បីជម្រាបគាត់ពីការផ្សព្វផ្សាយទាំងឡាយដែលមានភ្ជាប់រង្វាន់ គាត់ត្រូវតែបង្ហាញពីឯកសារយោង ដែលបង្ហាញថា មានរង្វាន់ពិតប្រាកដ។ ការប្រើប្រាស់ពាក្យពេចន៍ណាមួយនោះ គឺត្រូវចាត់ទុកថា ជាអំពើមិនសុចរិតក្រោមច្បាប់នោះ យើងនឹងពិន័យជាអន្តរការណ៍»។
បើតាមលោក ផាន អូន «ក.ប.ប» នឹងអនុវត្តពិន័យជាអន្តរការណ៍ពាក់ព័ន្ធនឹងការប្រកបអាជីវកម្មមិនសុចរិតក្នុងការផ្សាយពាណិជ្ជកម្មមិនពិត បំភាន់ ឬបោកបញ្ឆោតអ្នកប្រើប្រាស់ទៅកាន់បណ្តាក្រុមហ៊ុននានាទូទាំងប្រទេស នៅក្នុងខែមីនាខាងមុខ ដោយទុកពេលឱ្យក្រុមហ៊ុនទាំងនេះបានត្រៀមខ្លួនរយៈពេល ៣ សប្តាហ៍បន្តទៀត។
លោកបានបន្តថា៖ «យើងសង្ឃឹមថា ក្រុមហ៊ុនដែលមានការផ្សាយពាណិជ្ជកម្មទាំងនេះនឹងបំពេញតាមច្បាប់ ឬបំពេញតាមការផ្សាយ ដែលមានសុចរិតភាពសម្រាប់ប្រជាពលរដ្ឋយើង»៕
