សៀមរាបៈ ស្រុកអង្គរជុំនៃខេត្តសៀមរាបបានក្លាយជាស្រុកដំបូងបំផុតនៅក្នុងខេត្តសៀមរាប ដែលសម្រេចបានជាស្រុកបញ្ឈប់ការបន្ទោបង់ពាសវាលពាសកាល បន្ទាប់ពីមានការជំរុញនិងផ្សព្វផ្សាយរួមជាមួយកិច្ចសហការល្អរវាងអាជ្ញាធរមូលដ្ឋាន សហគមន៍ និងអ្នកពាក់ព័ន្ធក្នុងរយៈពេល ៤ ឆ្នាំ ដែលធ្វើឱ្យប្រជាពលរដ្ឋក្នុងស្រុកមានបង្គន់ប្រើប្រាស់គ្រប់ៗគ្នា។
សេចក្តីប្រកាសព័ត៌មានរបស់អង្គការភ្លែនអន្តរជាតិកម្ពុជានៅថ្ងៃទី១០ ខែកុម្ភៈ បានឲ្យដឹងថា គណៈកម្មាធិការវាយតម្លៃដែលមានសមាសភាពមកពីក្រសួងអភិវឌ្ឍន៍ជនបទ មន្ទីរអភិវឌ្ឍន៍ជនបទ និងតំណាងស្រុកជិតខាង បានវាយតម្លៃស្រុកអង្គរជុំជាស្រុកដំបូងបំផុតក្នុងខេត្តសៀមរាបដែលបញ្ឈប់ការបន្ទោបង់ពាសវាលពាសកាល(ODF)ទាំងស្រុង កាលពីថ្ងៃទី២៣ ខែធ្នូឆ្នាំ២០២១ ។
អង្គការនេះបន្តថា ស្រុកអង្គរជុំគឺជាស្រុកមួយក្នុងចំណោមក្រុង ស្រុកទាំង១២ នៃខេត្តសៀមរាប មានឃុំចំនួន៧ឃុំ និង៨៦ភូមិ មានប្រជាជនរស់នៅចំនួនជាង ១៥ ៧០០ខ្នងផ្ទះ។ ក្នុងឆ្នាំ២០១៦ មានតែ៤៥% នៃគ្រួសារទាំងអស់ប៉ុណ្ណោះដែលមានលទ្ធ ភាពប្រើប្រាស់បង្គន់អនាម័យ។
អង្គការភ្លែនអន្តរជាតិបញ្ជាក់ថា«ការយល់ដឹងរបស់ប្រជាជនអំពីសារៈសំខាន់នៃការអនុវត្តអនាម័យនៅមានកម្រិតទាប ការបន្ទោបង់ពាសវាលពាសកាលជារឿងធម្មតា។ បន្ទាប់ពីការជំរុញនិងផ្សព្វផ្សាយ រួមជាមួយកិច្ចសហការល្អរវាងអាជ្ញាធរមូលដ្ឋាន សហគមន៍ និងអ្នកពាក់ព័ន្ធទាំងអស់ ក្នុងរយៈពេល៤ឆ្នាំ ប្រជាជនទាំងអស់នៅក្នុងស្រុកមានបង្គន់ប្រើប្រាស់គ្រប់ៗគ្នា»។
លក្ខខណ្ឌជំរុញឱ្យស្រុកអង្គរជុំបានក្លាយជាស្រុកបញ្ឈប់ការបន្ទោបង់ពាសវាលពាសកាលទាំងស្រុង ដោយសារប្រជាពលរដ្ឋក្នុងឃុំនីមួយៗយល់ដឹងខ្ពស់ពីបញ្ហាអនាម័យ និងមានទម្លាប់អនុវត្តអនាម័យ ក្រោយពីបានចូលរួមយល់ដឹងអំពីការផ្សព្វផ្សាយបំផុសអំពីអនាម័យ។ នេះបើតាមការបញ្ជាក់បន្ថែមរបស់អង្គការភ្លែនអន្តរជាតិ។
លោក យី គីមថាន តំណាងអង្គការភ្លែនអន្តរជាតិកម្ពុជាថ្លែងថា ស្រុកអង្គរជុំ ក្លាយជាស្រុកដំបូងបំផុតនៅខេត្តសៀមរាបដែលបញ្ឈប់ការបន្ទោបង់ពាសវាលពាសកាល(ODF) ក៏ដោយសារកិច្ចសហការល្អពីអាជ្ញាធរភូមិ ឃុំ ស្រុក ជាមួយដៃគូអភិវឌ្ឍន៍នានា។ ឃុំនិងស្រុកបានលើករបៀបវារៈការងារទឹកស្អាត និងអនាម័យក្នុងកិច្ចប្រជុំក្រុមប្រឹក្សាជាប្រចាំខែ ដោយមានការគាំទ្របច្ចេកទេសពីក្រសួងនិងមន្ទីរអភិវឌ្ឍន៍ជនបទ អង្គការបណ្តុះកុមារ និងអង្គការភ្លែនអន្តរជាតិ បានចូលរួមនិងផ្សព្វផ្សាយលើកកម្ពស់អនាម័យនៅក្នុងស្រុក ។
លោកបញ្ជាក់ទៀតថា៖«ការលើកកម្ពស់អនាម័យមិនមែនគ្រាន់តែជាការសាងសង់បង្គន់ប៉ុណ្ណោះទេ ប៉ុន្តែវាជាការអប់រំដើម្បីផ្លាស់ប្តូរ ទម្លាប់បញ្ឈប់ការបន្ទោបង់ពាសវាលពាសកាល ផឹកទឹកដែលមានសុវត្ថិភាព និងមានទម្លាប់លាងសម្អាតដៃជាមួយសាប៊ូជានិច្ច»។
លោកតំណាងអង្គការភ្លែនអន្តរជាតិលើកឡើងផងដែរថា ការរក្សាស្ថានភាពបញ្ឈប់ការបន្ទោបង់ពាសវាលពាសកាលមានសារៈសំខាន់បំផុតដែលទាមទារឲ្យមានការប្តេជ្ញាចិត្តខ្ពស់និងភាពជាអ្នកដឹកនាំនិងសកម្មភាពយ៉ាងសកម្មរបស់អាជ្ញាធរខេត្ត ក្រសួងអភិវឌ្ឍន៍ជនបទ មន្ទីរអភិវឌ្ឍន៍ជនបទ ខេត្ត ស្រុក និងឃុំ ដើម្បីធានាថាសមិទ្ធផលនេះមានផលប៉ះពាល់យូរអង្វែងដល់ប្រជាពលរដ្ឋ។
លោក ប៊ុយ ប៊ុន មេឃុំ នគរភាស ស្រុកអង្គរជុំ បានថ្លែងនៅថ្ងៃទី១០ ខែកុម្ភៈថា អាជ្ញាធរឃុំបានសម្រុកធ្វើការអប់រំណែនាំប្រជាពលរដ្ឋឲ្យមានការយល់ដឹងពីបញ្ហាអនាម័យចាប់ពីឆ្នាំ២០១៤រហូតទទួលបានជោគជ័យក្នុងឆ្នាំ២០២១។ លោកថា ការកែប្រែទម្លាប់របស់ប្រជាពលរដ្ឋមិនមែនជាការងាយទេ ត្រូវតែធ្វើហើយធ្វើទៀត រំឭកហើយ រំឭកទៀត និងចុះទៅដល់មូលដ្ឋានប្រជាពលរដ្ឋសង្កេតមើលពីសភាពជាក់ស្តែងនៃការយល់ដឹងនិងការមានធនធានរបស់ប្រជាពលរដ្ឋក្នុងការរៀបចំធ្វើបង្គន់អនាម័យផងដែរ។
លោកថ្លែងថា៖ «អ្វីណាដែលយើងមានសមត្ថភាពជួយ យើងជួយ អ្វីណាដែលគេធ្វើខ្លួនគេបាន យើងឲ្យគេធ្វើខ្លួនឯងទៅ ហើយយើងមិនបោះបង់ចោលទេគឺយើងតាមដានជាប្រចាំ បើកប្រជុំប្រចាំខែ តាមដានពិនិត្យមើលភូមិណាធ្វើបានផល ភូមិណាធ្វើមិនបានផល មូលហេតុយ៉ាងម៉េច» ។
លោកបញ្ជាក់ថា ការចាប់ផ្តើមដំបូងពិបាកបន្តិចមែន ប៉ុន្តែដល់យូរៗទៅ ប្រជាពលរដ្ឋចាប់ផ្តើមមានការយល់ដឹងនិងភ្ញាក់រឭកធ្វើបង្គន់អនាម័យ រហូតមកទល់បច្ចុប្បន្ននេះ ការធ្វើបង្គន់អនាម័យសុទ្ធតែទំនើបល្អស្អាតហើយសុទ្ធតែមានអាងទឹកទៀតផង ខុសផ្ទុយកាលពី៥ ទៅ១០ឆ្នាំមុនដែលប្រជាពលរដ្ឋតែងបន្ទោបង់ពាសវាលពាសកាល ជះក្លិនមិនល្អនៅដោយកន្លែងនៃភូមិនីមួយៗ។
សូមជម្រាបថា ខេត្តស្វាយរៀង ជាខេត្តដំបូងគេក្នុងប្រទេសកម្ពុជាដែលបានក្លាយជាខេត្តបញ្ឈប់ការបន្ទោបង់ពាសវាលពាសកាល កាលពីថ្ងៃទី៣០ខែតុលាឆ្នាំ២០២១ ដោយសារមានការប្ដេជ្ញាចិត្តពីអាជ្ញាធរខេត្តនិងអាជ្ញាធរមូលដ្ឋានក្នុងការបញ្ជ្រាបការយល់ដឹងដល់ប្រជាពលរដ្ឋដែលជោគជ័យនេះមានការឧបត្ថម្ភពីអង្គការដៃគូ ។ក្រៅពីនោះកាលពីដើមខែកុម្ភៈឆ្នាំ២០២២នេះ រដ្ឋបាលខេត្តកណ្តាលក៏បានប្រកាសដាក់ស្រុកចំនួន៤ ជាស្រុកបញ្ឈប់ការបន្ទោបង់ពាសវាលពាសកាលផងដែរ។ក្នុងនោះរួមមាន ស្រុកអង្គស្នួល ស្រុកកណ្តាលស្ទឹង ស្រុកខ្សាច់កណ្តាល និងស្រុកលើកដែក៕