.jpg)
ពលរដ្ឋនៅខេត្តកំពង់ឆ្នាំងផ្តល់ឧបករណ៍ឆក់ត្រីដល់នគរបាលស្រុកកំពង់លេង។ រូបថត ប៉ូលិសស្រុកកំពង់លេង
ភ្នំពេញៈ ឧបករណ៍ឆក់ត្រីគ្រប់ប្រភេទចំនួន៣០៨គ្រឿង ត្រូវបានប្រជាពលរដ្ឋរស់នៅ ៨ ស្រុក-ក្រុង ទូទាំងខេត្តកំពង់ឆ្នាំង ប្រគល់ជូនរដ្ឋអំណាចមូលដ្ឋានដោយស្ម័គ្រចិត្ត បន្ទាប់ពីមានការផ្សព្វផ្សាយពីលោក ស៊ុន សុវណ្ណរិទ្ធ អភិបាលខេត្តកំពង់ឆ្នាំង កាលពីថ្ងៃទី ៣០ មករា ឆ្នាំ ២០២២។
លោកអៀរ ប៊ុនធឿន ស្នងការរង នៃស្នងការដ្ឋាននគរបាល ខេត្តកំពង់ឆ្នាំង ដែលជាអ្នកទទួលបន្ទុកអនុវត្តលើការងារប្រមូលឧបករណ៍ឆក់ត្រីបានឱ្យដឹងនៅថ្ងៃទី១០ កុម្ភៈ ថា នៅទូទាំងខេត្តកំពង់ឆ្នាំង មានប្រជាពលរដ្ឋរស់នៅក្នុងស្រុកចំនួន៥ នៅជាប់ដងទន្លេសាប រួមមានស្រុកបរិបូរណ៍ ស្រុកកំពង់លែង ស្រុករលាប្អៀរ ស្រុកកំពង់ត្រឡាច និងស្រុកជលគិរី ព្រមទាំងស្រុកផ្សេងៗទៀត ក្នុងខេត្តកំពង់ឆ្នាំងបានប្រគល់ឧបករណ៍ឆក់ត្រីចម្រុះជូនដល់ស្នងការដ្ឋាននគរបាលខេត្តកំពង់ឆ្នាំងបានចំនួន៣០៨គ្រឿងហើយ គិតចាប់ពីថ្ងៃទី៣១ មករា ឆ្នាំ២០២២ដល់ថ្ងៃទី៦ កុម្ភៈ។
លោកបន្តថា ការដែលពលរដ្ឋស្ម័គ្រចិត្តប្រគល់ឧបករណ៍ឆក់ត្រីនេះ បន្ទាប់ពីមានការផ្សព្វផ្សាយរបស់លោកស៊ុន សុវណ្ណរិទ្ធ អភិបាលនៃគណៈអភិបាលខេត្តកំពង់ឆ្នាំង។ ការផ្សព្វផ្សាយនេះលោកអភិបាលខេត្តក៏បានដាក់កំណត់រយៈពេល៧ថ្ងៃ(ពីថ្ងៃទី៣១ មករា ដល់ ថ្ងៃទី៦ កុម្ភៈ) ដើម្បីទុកពេលឱ្យពលរដ្ឋភ្ញាក់រឭកដោយខ្លួនឯង។ ប៉ុន្តែបើប្រជាពលរដ្ឋណាមិនអនុវត្តតាមការប្រកាសផ្សព្វផ្សាយ និងបណ្តែតបណ្តោយឱ្យហួសកាលកំណត់នោះ សមត្ថកិច្ចជំនាញ មាននគរបាលនៅតាមបណ្តាស្រុក-ក្រុង នឹងអនុវត្តតាមផ្លូវច្បាប់ហើយ។
លោកថ្លែងថា៖«លោកអភិបាលខេត្តបានដាក់បទបញ្ជាដាច់ណាត់ថា ទុកពេលឱ្យពលរដ្ឋ១សប្តាហ៍ចំពោះអ្នកមានឧបករណ៍ឆក់ត្រីទាំងឆក់ត្រជាក់និងឆក់ក្តៅហ្នឹងត្រូវតែស្ម័គ្រចិត្តប្រគល់ឱ្យរដ្ឋអំណាច។ បើហួសពី១សប្តាហ៍ គឺនៅពេលសមត្ថកិច្ចចាប់បានត្រូវអនុវត្តច្បាប់តែម្តង»។
បើតាមលោកអៀរ ប៊ុនធឿន រយៈពេល៦ថ្ងៃ នៃការកំណត់នេះ ប្រជាពលរដ្ឋនៅទូទាំងខេត្តកំពង់ឆ្នាំងបានស្ម័គ្រចិត្តប្រគល់ឱ្យរដ្ឋអំណាចនៅតាមស្រុក-ក្រុង បានចំនួន៣០៨គ្រឿង លើចំនួនមនុស្ស៣០៧នាក់។ ប៉ុន្តែគិតចាប់ពីថ្ងៃទី៧ កុម្ភៈ រហូតដល់ថ្ងៃទី១០ កុម្ភៈ ឆ្នាំ២០២២ គឺបានហួសឱសានវាទថ្ងៃកំណត់ហើយ។ ប៉ុន្តែសមត្ថកិច្ចជំនាញរបស់លោកមិនទាន់ចាប់បាននរណាម្នាក់ដែលប្រើឧបករណ៍ឆក់ត្រីនេះនៅឡើយទេ។
លោកបញ្ជាក់ថា ចំពោះឧបករណ៍ឆក់ត្រី ដែលពលរដ្ឋស្ម័គ្រចិត្តប្រគល់ឱ្យរដ្ឋអំណាចនោះមិនមែនសំដៅលើតែស្រុកនៅតាមដងទន្លេសាបទេ គឺនៅទូទាំងខេត្តកំពង់ឆ្នាំងតែម្តង ដែលមានចំនួន៨ស្រុក-ក្រុងទូទាំងខេត្តកំពង់ឆ្នាំងតែម្តង៕
