សីហនុ/តាកែវ: យ៉ាងហោចណាស់មានរថយន្ត ២៥២ គ្រឿងត្រូវបានសមត្ថកិច្ចចម្រុះក្នុងខេត្ត ២ គឺតាកែវ និងខេត្តព្រះសីហនុឃាត់ និងផាកពិន័យដោយសារមិនបានបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ ២០២១ ចាប់ពីថ្ងៃទី ៣ កុម្ភៈ ដល់ថ្ងៃទី ១០ ខែកុម្ភៈ។ នេះបើតាមមន្ត្រីសាខាពន្ធដារខេត្តព្រះសីហនុ និងតាកែវនៅថ្ងៃទី ១០ ខែកុម្ភៈ។
លោក ចាន់ ប៊ន អនុប្រធានសាខាពន្ធដារខេត្តតាកែវបានឱ្យដឹងនៅថ្ងៃទី ១០ ខែកុម្ភៈ ថា ចាប់ពីថ្ងៃ ៣ កុម្ភៈ រហូតដល់ថ្ងៃទី ១០ ខែកុម្ភៈ សមត្ថកិច្ចចម្រុះបានពិនិត្យឃើញរថយន្តចំនួន ៧៦ គ្រឿង មិនបានបង់ពន្ធសម្រាប់ឆ្នាំ ២០២១។ លោកថា យានយន្តទាំងនោះមានចម្រុះជាច្រើនដូចជា រថយន្តដឹកអ្នកដំណើរ រថយន្តដឹកទំនិញ រថយន្តក្រុង និងរថយន្តសម្រាប់ធ្វើដំណើរលក្ខណៈគ្រួសារជាដើម។
លោកបានបន្តថា ពលរដ្ឋបានសហការល្អក្នុងការបង់ពន្ធលើមធ្យោបាយដឹកជញ្ជូននៅពេលសមត្ថកិច្ចឃាត់រថយន្ត។ អ្នកខ្លះបានចូលបង់ពន្ធដោយខ្លួនឯង ដោយមិនចាំបាច់ដល់សមត្ថកិច្ចឃាត់នោះទេ។ ពលរដ្ឋភាគច្រើនបានដោះសាថា ការដែលមិនបានទៅបង់ពន្ធផ្លូវទាន់ពេលតាមការកំណត់របស់អគ្គនាយកដ្ឋានពន្ធដារ ដោយសារតែភ្លេច និងមិនបានចាប់អារម្មណ៍ ព្រោះរវល់ការងារ។
ក្នុងពេលចុះប្រតិបត្តិការត្រួតពិនិត្យយានយន្តដែលមិនបានបង់ពន្ធផ្លូវនោះ សមត្ថកិច្ចចម្រុះក៏បានរំឭក អប់រំណែនាំបន្ថែមពីពេលវេលាដែលត្រូវបង់ពន្ធផងដែរ ដើម្បីកុំឱ្យមានការភ្លេច ឬយឺតពេលដែលនាំឱ្យខាតបង់ថវិកាដោយសារការផាកពិន័យ។ នេះបើតាមការបញ្ជាក់ពីលោក ចាន់ ប៊ន។
លោកថ្លែងថា៖ «ពេលពលរដ្ឋគាត់បង់ថ្លៃផាកពិន័យរួចកម្លាំងយើងបានរំឭកគាត់ថា ឆ្នាំ ២០២២ នេះ យើងនឹងចាប់ផ្តើមទទួលបង់ពន្ធផ្លូវពីខែ ៦ រហូតដល់ខែ ១១ សូមបងប្អូនកុំភ្លេចទៀត។ ពលរដ្ឋគាត់ថា អ៊ីចឹងគាត់នឹងចាំទុក ហើយធ្វើយ៉ាងណាមិនឱ្យភ្លេចទៀតទេ ព្រោះនេះគឺជាកាតព្វកិច្ចមួយរបស់ពួកគាត់» ។
លោក ប៉ែត ចក់ អនុប្រធានសាខាពន្ធដារខេត្តព្រះសីហនុបានឱ្យដឹងនៅថ្ងៃទី ១០ ខែកុម្ភៈដែរថា សមត្ថកិច្ចចម្រុះដឹកនាំដោយមន្ត្រីពន្ធដារខេត្តព្រះសីហនុបានរកឃើញយានយន្តចំនួន ១៧៦ គ្រឿងដែលមិនបានបង់ពន្ធលើមធ្យោបាយដឹកជញ្ជូនក្នុងឆ្នាំ ២០២១។ លោកថាពេលរកឃើញយានយន្តមិនបង់ពន្ធផ្លូវសមត្ថកិច្ចចម្រុះបានឱ្យពលរដ្ឋបង់ថ្លៃផាកពិន័យភ្លាមៗនៅនឹងកន្លែង។
លោកបន្តថា ពលរដ្ឋបានលើកពីបញ្ហាកូវីដ ១៩ ធ្វើឱ្យពួកគាត់ភ្លេចមិនបានទៅបង់ពន្ធ ប៉ុន្តែការលើកឡើងនេះអាចគ្រាន់តែជាលេសរបស់ពួកគាត់ ព្រោះជាក់ស្តែងមានពលរដ្ឋជាច្រើនបានភ្ញាក់រឭកដឹងពីកាតព្វកិច្ច និងបានទៅបង់ពន្ធទាន់ពេល។
លោកថ្លែងថា៖ «ភាគច្រើនគាត់ភ្លេច គាត់ថាកូវីដកើតឡើង អ៊ីចឹងទៅក៏អត់បានទៅបង់ពន្ធ អ៊ីចឹងដល់ពេលគាត់ភ្លេចៗទៅវាក៏ហួសថ្ងៃទៅ។ អ្នកមួយចំនួនគាត់បានស្វះស្វែងយល់អំពីកាតព្វកិច្ច ប៉ុន្តែអ្នកមួយចំនួនតូចប៉ុណ្ណោះដែលមិនបានយល់» ។
លោកអនុប្រធានពន្ធដារខេត្តព្រះសីហនុបានឱ្យដឹងទៀតថា អគ្គនាយកដ្ឋានពន្ធដារ បានប្រកាសតម្រូវឱ្យម្ចាស់យានយន្ត និងយានជំនិះគ្រប់ប្រភេទចូលខ្លួនបង់ពន្ធចាប់ពីថ្ងៃទី ១ ខែមិថុនា រហូតដល់ថ្ងៃទី ៣០ ខែវិច្ឆិកា ជារៀងរាល់ឆ្នាំ។ ហេតុនេះ ដើម្បីកុំឱ្យខកខានក្នុងការបង់ពន្ធសូមពលរដ្ឋគ្រប់រូបដែលមានកាតព្វកិច្ចបង់ពន្ធលើមធ្យោបាយដឹកជញ្ជូនទៅបង់ឱ្យបានទាន់ពេលកំណត់ ដើម្បីចៀសវាងការផាកពិន័យ ។
លោកបានបញ្ជាក់ថា៖ «ទោះបីគាត់មិនបានបង់នៅក្នុងពេលហ្នឹងក៏ដោយ ពេលដែលយើងឈប់ត្រួតពិនិត្យយើងឱ្យគាត់ចូលខ្លួនទៅបង់ក៏នៅតែត្រូវពិន័យដដែលទេ អត់មានពីណាមួយគេចបានទេ យើងរំឭកតាំងពីឆ្នាំ ដែលគាត់ខានបង់មករហូត» ។
បើតាមលោក ប៉ែត ចក់ ការត្រួតពិនិត្យពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ ២០២១ ធ្វើឡើង ដើម្បីពង្រឹងការអនុវត្តច្បាប់ស្តីពីសារពើពន្ធ និងអនុលោមភាពនៃការបង់ពន្ធលើមធ្យោបាយយានយន្តគ្រប់ប្រភេទដោយចាប់ផ្តើមអនុវត្តពីថ្ងៃទី ១ កុម្ភៈ ឆ្នាំ ២០២២ តទៅ៕