ភ្នំពេញៈ ក្រសួងវប្បធម៌ និងវិចិត្រសិល្បៈបានបូកសរុបពីសមិទ្ធផលដែលក្រសួងនេះសម្រេចបាននៅក្នុងរយៈពេលជាងពាក់កណ្ដាលអាណត្តិនីតិកាលទី ៦ នៃរដ្ឋសភា ក្នុងនោះមានការជួសជុល និងអភិរក្ស សំណង់បុរាណបានចំនួន ១០ ៩ សំណង់ និងបុរាណវត្ថុសិល្បៈសរុបចំនួន ៨ ២៩៦ (រូប ដុំ បំណែក ផ្ទាំង និងគ្រាប់) បើទោះបីជាជួបការលំបាកដោយសារតែមានការរាតត្បាតនៃជំងឺកូវីដ ១៩ ក៏ដោយ។
ក្នុងពិធីសន្និបាតបូកសរុបការងារវប្បធម៌ និងវិចិត្រសិល្បៈឆ្នាំ ២០២១ និងលើកទិសដៅការងារសម្រាប់ឆ្នាំ ២០២២ ដែលបានប្រារព្ធធ្វើឡើង នាថ្ងៃទី ៩ ខែកុម្ភៈលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈបានថ្លែងថា ស្ទើរពេញ ១ ឆ្នាំ ២០២១ វិបត្តិកូវីដ ១៩ បានធ្វើឱ្យការបំពេញការងាររបស់មន្ត្រីក្រសួងជួបការលំបាកជាខ្លាំង។ ទោះជាយ៉ាងណា ក្រសួងក៏នៅតែបន្តខិតខំអនុវត្តការងារដោយអនុលោមទៅតាមគន្លង ប្រក្រតីភាពថ្មី ដូចជាកម្មវិធីសន្និបាតនាពេលនេះជាដើម។
លោកស្រីបានបន្តថា៖ «គិតមកដល់ថ្ងៃនេះ យើងបានបំពេញការងារអស់រយៈពេលជាងពាក់កណ្តាលអាណត្តិរួចទៅហើយ។ ជាលទ្ធផល យើងសម្រេចបាននូវសមិទ្ធកម្មការងារជាច្រើនគួរជាទីមោទនៈក្នុងនោះនៅឆ្នាំ ២០១៩ ក្រសួងសម្រេចបានការងារចំនួន ៩៧ ភាគរយ និងក្នុងឆ្នាំ ២០២០ សម្រេចបានចំនួន ៨២ ភាគរយ»។ បើតាមលោកស្រី សកុណា ក្នុងរយៈពេលជាងពាក់កណ្តាលអាណត្តិនីតិកាលទី ៦ នេះ ក្រសួងវប្បធម៌ និងវិចិត្រសិល្បៈបានបន្តខិតខំប្រឹងប្រែងអនុវត្ត និងសហការអនុវត្តការងារគ្រប់មុខព្រួញទាំងអស់នៃយុទ្ធសាស្ត្រ ទាំងការងារក្នុងវិស័យវប្បធម៌ ការងារក្រៅវិស័យវប្បធម៌ និងការងារអន្តរវិស័យ។ លោកស្រីបញ្ជាក់ថា ចំពោះការងារអភិរក្សវប្បធម៌ក្នុងទិសដៅដើម្បីលើកកម្ពស់ការអភិវឌ្ឍប្រកបដោយចីរភាព និងបរិយាប័ន្ន ក្រសួងសម្រេចបានសមិទ្ធផលសំខាន់ៗមួយចំនួន រួមមានបានជួសជុល និងអភិរក្សសំណង់បុរាណចំនួន ១០៩ សំណង់ បុរាណវត្ថុសិល្បៈ សរុបចំនួន ៨ ២៩៦( រូប ដុំ បំណែក ផ្ទាំង និងគ្រាប់) វត្ថុជាតិពន្ធុសាស្ត្រចំនួន ៥០៩ មុខ និងសាស្ត្រាស្លឹករឹតចំនួន ៣១ ០៤៦ ខ្សែ។
លោកស្រីមានប្រសាសន៍បន្តថា ទន្ទឹមគ្នានេះ ក្រសួងបានរកឃើញ និងទទួលបានវត្ថុបុរាណ និងវត្ថុសិល្បៈពីមជ្ឈដ្ឋាននានាចំនួន ៣១ ៤៣៤ (វត្ថុ រូប ដុំ បំណែក ផ្ទាំង និងគ្រាប់) បូករួមទាំងវត្ថុបុរាណចំនួនជាង ១០០ រូបបន្ថែមទៀត ដែលត្រូវធ្វើមាតុភូមិនិវត្តន៍ពីបរទេស ក្រោយបញ្ចប់កិច្ចចរចាជាង ៣ ឆ្នាំ។ ក្រសួងក៏បានចុះបញ្ជីវត្ថុបុរាណ វត្ថុសិល្បៈ និងវត្ថុជាតិពន្ធុសាស្ត្រសរុប ២៣ ៥៨៧ (វត្ថុ រូបដុំ បំណែក ផ្ទាំង និងគ្រាប់) និងបញ្ចូលទិន្នន័យវត្ថុបុរាណ វត្ថុសិល្បៈ និងវត្ថុជាតិពន្ធុសាស្ត្រទៅក្នុងប្រព័ន្ធទិន្នន័យ Database សរុប ១២ ៣៧៥ (វត្ថុរូប ដុំ បំណែក ផ្ទាំង និងគ្រាប់)។
ដោយឡែក ចំពោះការងារអភិវឌ្ឍវប្បធម៌ជាតិក្នុងទិសដៅដើម្បីធ្វើពិពិធកម្មសេដ្ឋកិច្ច តាមរយៈការអភិវឌ្ឍប្រភពកំណើនសេដ្ឋកិច្ចគន្លឹះនៅក្នុងរយៈពេលពាក់កណ្តាលអាណត្តិដូចគ្នានេះដែរ លោកស្រី សកុណា បានលើកឡើងថា ក្រសួងវប្បធម៌បានកែលម្អហេដ្ឋារចនាសម្ព័ន្ធ និងលើកកម្ពស់សោភណភាពរមណីយដ្ឋានបេតិកភណ្ឌពិភពលោក និងទីតាំងវប្បធម៌សំខាន់ៗ ដើម្បីបង្កើនភាពទាក់ទាញ សម្រាប់វិស័យទេសចរណ៍ និងជំរុញការអភិវឌ្ឍប្រកបដោយចីរភាពនៅរមណីយដ្ឋានអង្គរ រមណីយដ្ឋានប្រាសាទព្រះវិហារ រមណីយដ្ឋានប្រាសាទ សំបូរព្រៃគុក សារមន្ទីរជាតិ សារមនី្ទរវាយនភណ្ឌប្រពៃណីអាស៊ី សារមន្ទីរព្រះនរោត្តមសីហនុអង្គរ និងសារមន្ទីរកុលាលភាជន៍នៅភូមិតានីជាដើម។ល។
បើតាមក្រសួងវប្បធម៌ និងវិចិត្រសិល្បៈការកែលម្អហេដ្ឋារចនាសម្ព័ន្ធ និងសោភណភាពតំបន់អង្គរ គឺជាគម្រោងវិនិយោគដ៏ធំរបស់រាជរដ្ឋាភិបាល អំឡុងពេលកូវីដ ១៩ ដែលជាការយកចិត្តទុកដាក់ខ្ពស់របស់រាជរដ្ឋាភិបាលចំពោះដួងព្រលឹងជាតិ អត្តសញ្ញាណជាតិ កិត្យានុភាពជាតិ និងជាបេតិកភណ្ឌពិភពលោក ស្របពេលដែលទីក្រុងសៀមរាបត្រូវបានប្រកាសជា «ទីក្រុងវប្បធម៌អាស៊ាន» សម្រាប់ឆ្នាំ ២០២១-២០២២៕