បាត់ដំបងៈ មានពលករខ្មែរប្រុស-ស្រីរួមទាំងក្មេងៗជាកូនពលករចំនួន ២៨៣ នាក់បានវិលត្រឡប់មកពីប្រទេសថៃវិញនៅថ្ងៃទី ១០ កុម្ភៈ តាមច្រកតំបន់អូរអន្លក់ក្នុងឃុំតាសែន ស្រុកកំរៀង ក្នុងនោះមាន ៤៥ នាក់ត្រូវបានបញ្ជូនទៅមណ្ឌលចត្តាឡីស័ក ដោយសារតែពួកគេមិនទាន់បានចាក់វ៉ាក់សាំងបង្ការជំងឺកូវីដ ១៩។
លោកវរសេនីយ៍ឯក ម៉ង់ ស៊ី មេបញ្ជាការវរ ៨១៩ ប្រចាំការនៅតាមបណ្តោយព្រំដែនកម្ពុជា-ថៃក្នុងស្រុកកំរៀង ខេត្តបាត់ដំបង បានឱ្យដឹងនៅថ្ងៃទី ១០ កុម្ភៈថា នៅថ្ងៃទី ១០ កុម្ភៈ កម្លាំងសមត្ថកិច្ចរបស់លោកបានទទួលពលករប្រុស-ស្រី និងក្មេងៗជាកូនពលករចំនួន ២៨៣ នាក់ (ស្រី ១១០ នាក់) ក្នុងនោះ មានក្មេងៗចំនួន ៦១ នាក់ (ក្មេងស្រី ២៣ នាក់)។ ចំពោះអ្នកដែលត្រូវបញ្ជូនទៅមណ្ឌលចត្តាឡីស័កនៅស្រុកសំពៅលូនមានចំនួន ៤៥ នាក់ (ស្រី ១៥ នាក់បូកក្មេង ៨ នាក់) ដោយសារតែពួកគេនៅមិនទាន់បានចាក់វ៉ាក់សាំងបង្ការជំងឺកូវីដ ១៩ នៅឡើយ។ លោកបន្តថា សមត្ថកិច្ចដែលឈរជើងនៅច្រកអូរអន្លក់ក្នុងឃុំតាសែន ស្រុកកំរៀង រួមមានកម្លាំងនគរបាល-ប៉ុស្តិ៍អូរអន្លក់ សហការជាមួយកងយោធពលខេមរភូមិន្ទ និងគ្រូពេទ្យផង។ ប៉ុស្តិ៍ច្រកអូរអន្លក់គឺជាច្រកគោលដៅនៅតំបន់ទល់ដែនជាប់ព្រំដែនកម្ពុជា-ថៃក្នុងខេត្តបាត់ដំបង ដែលជាច្រកតំបន់ក្នុងការបញ្ជូនពលករកម្ពុជាពីប្រទេសថៃ។
លោកបញ្ជាក់ថា៖ «ពលករប្រាប់ខ្ញុំថា មូលហេតុដែលពួកគាត់ត្រឡប់មកផ្ទះវិញនេះដោយសារពួកគាត់ទៅប្រទេសថៃយូរឆ្នាំមកហើយ ម្យ៉ាងអស់ការងារធ្វើផង។ សមត្ថកិច្ចរបស់ខ្ញុំ និងគ្រូពេទ្យតែងតែអប់រំពួកគាត់ពីជំងឺកូវីដមុននឹងអនុញ្ញាតឱ្យគាត់ត្រឡប់ទៅលំនៅឋានវិញ»។
លោក ហាត ឡៃឡែ ស្នងការរងខេត្តបាត់ដំបងទទួលផែនការងារនគរបាលព្រំដែនឱ្យដឹងនៅថ្ងៃទី ១០ កុម្ភៈថា រយៈពេលដើមខែក្នុងឆ្នាំនេះ ពលករខ្មែរត្រឡប់មកពីប្រទេសថៃមានចំនួនច្រើន។
បើតាមរបាយការណ៍ពីកម្លាំងនគរបាលប៉ុស្តិ៍ច្រកអូរអន្លក់ក្នុងឃុំតាសែន ស្រុកកំរៀង និងនៅច្រកពោធិ៍ជ្រៃ ឃុំសិរីមានជ័យ ស្រុកសំពៅលូនបានឱ្យដឹងថា ពលករវិលត្រឡប់មកពីប្រទេសថៃវិញនេះ មូលហេតុអស់ការងារធ្វើ ហើយម្យ៉ាងទៀតពួកគាត់ទៅប្រទេសថៃយូរឆ្នាំចង់មកលេងស្រុកកំណើតផង។ ពលករទាំងនោះភាគច្រើនបានចាក់វ៉ាក់សាំងការពារជំងឺកូវីដរួចរាល់ហើយ។
ពលករទៅប្រទេសថៃភាគច្រើនស៊ីឈ្នួលធ្វើចម្ការ ឬបេះផ្លែឈើឱ្យគេ។ ពាក់ព័ន្ធនឹងតួលេខចំនួនពលករដែលវិលត្រឡប់មកវិញប្រចាំខែនីមួយៗនោះលោក ហាត ឡៃឡែ បញ្ជាក់ថា ចំនួនតួលេខនេះលោកមិនបានចាំថា មានចំនួនពិតប្រាកដប៉ុន្មាននាក់នោះទេ។
លោកថ្លែងថា៖ «វាមានអ្នកដែលទើបនឹងទៅថ្មី និងឥឡូវក៏អត់ការងារធ្វើដែរ ហើយទាហានថៃបញ្ជូនមកហ្នឹងយើងចែកជា ២។ ចំពោះអ្នកដែលបានចាក់វ៉ាក់សាំងរួចបើធ្វើតេស្តមិនឃើញមានកូវីដទេយើងឱ្យគាត់ទៅផ្ទះបាន។ តែបើអ្នកដែលអត់បានចាក់វ៉ាក់សាំងទេ យើងនឹងយកគាត់ទៅធ្វើចត្តាឡីស័ក»។
ទោះយ៉ាងណាលោកស្រី រស់ ជីវី ស្នងការរងទទួលផែនការងារប្រឆាំងការជួញដូរមនុស្ស និងការពារអនីតិជនខេត្តបាត់ដំបងប្រាប់នៅថ្ងៃទី ១០ កុម្ភៈថា ចំពោះពលករដែលត្រឡប់មកពីប្រទេសថៃ គឺលោកស្រីពុំមានចំនួនពិតប្រាកដទេ។
ប៉ុន្តែបើគិតក្នុងខែមករា ឆ្នាំ ២០២២ នេះ ចំនួនពលករមានជិតក្បែរពាន់នាក់ហើយ។
លោកស្រីថា៖ «ពលករទាំងនោះភាគច្រើនចាក់វ៉ាក់សាំងរួចហើយ តែចំពោះសកម្មភាពមេខ្យល់លួចនាំពលករឆ្លងដែនទៅប្រទេសថៃវិញ គឺពុំឃើញមានទេ»៕