យ៉ាងហោចណាស់កម្មកររោងចក្រ ប្រមាណ ៣០ នាក់ រងរបួសធ្ងន់ និងស្រាល ដោយសាររថយន្តដឹកកម្មករនោះដាច់ចង្កូត ខណៈម្ចាស់រថយន្តរត់គេចខ្លួនបាត់។
ស្នងការដ្ឋាននគរបាលខេត្តកំពង់ស្ពឺ បានឱ្យដឹងថា ហេតុការណ៍នេះកើតឡើងនៅថ្ងៃសៅរ៍ ទី១២ ខែកុម្ភៈនេះ វេលាម៉ោង៦ និង២៥នាទីព្រឹក នៅចំណុចភូមិពង្រ ឃុំស្រង់ ស្រុកគងសី ខេត្តកំពង់ស្ពឺ បង្កឡើងដោយរថយន្ដ ១ គ្រឿង ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3D -1 938 បើកបរដោយឈ្មោះ ឯក សាម៉ន ភេទប្រុស អាយុ ៣៤ ឆ្នាំ។
ស្នងការខេត្តបន្តថា រថយន្តដឹកកម្មករ - កម្មការិនីខាងលើ គឺបើកបរពីទិសខាងលិច ទៅទិសខាងកើត លុះបើកបរមកដល់ចំណុចខាងលើ ឡាននោះដាច់ម៉ែត្រចង្កូត បណ្ដាលឱ្យរថយន្ដរេចង្កូតរួចក៏ធ្លាក់ចូលប្រឡាយទឹកដោយខ្លួនឯង។
បើតាមរបាយការណ៍របស់សមត្ថកិច្ចខេត្ត ក្នុងហេតុការណ៍នេះ បង្កឱ្យមានកម្មកររងរបួសធ្ងន់ ៣នាក់ ស្រ្តីមានផ្ទៃពោះម្នាក់ និង ២៨ នាក់ទៀត រងរបួសស្រាល។
បច្ចុប្បន្ន កម្លាំងនគរបាលនៃអធិការដ្ឋាននគរបាលស្រុក គងពិសី និងជំនាញខេត្ដបានជួយអន្ដរាគមន៍សម្របសម្រួល និងបញ្ជូនអ្នករបួសទៅមន្ទីរពេទ្យសង្រ្គោះបន្ទាន់ និងចំណាត់ការស្រាវជ្រាវរកបុគ្គលជាតៃកុងឡានមកទទួលខុសត្រូវតាមផ្លូវច្បាប់ផងដែរ៕