មន្ត្រីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) បានចុះបង្ក្រាបទំនិញប្រភេទសាច់បង្កកជិត ៤ តោន នៅរាជធានីភ្នំពេញ ដែលពុំមានឯកសារបញ្ជាក់ពីប្រភពច្បាស់លាស់ និងឃាត់ទុកសាច់ទាំងនោះជាបណ្តោះអាសន្ន។
យោងតាមការចុះផ្សាយរបស់ ក.ប.ប. បានឱ្យដឹងថា នៅទី ១១ ខែកុម្ភៈ ឆ្នាំ ២០២២ មន្ត្រីសាខា ក.ប.ប. រាជធានីភ្នំពេញ បានចុះអង្កេតតាមដាន និងរកឃើញនូវមុខសញ្ញាផលិតផលសាច់បង្កក ដូចជាប្រភេទជើងមាន់ ជើងទា ប្រហិតសាច់ និងគ្រឿងសមុទ្រ។ល។ ដែលពុំមានបញ្ជាក់ពីកាលបរិច្ឆេទផលិត សុពលភាព បិទស្ទីកឃ័រក្រដាសបន្លំលើបាកូដ មិនមានឯកសារ និងប្រភពមិនច្បាស់លាស់ប្រមាណ ៣,៦ តោន។
ក.ប.ប. បានបន្តថា ទំនិញទាំងនេះត្រូវបានមន្ត្រីសាខា ក.ប.ប. រាជធានីភ្នំពេញ បានធ្វើការឃាត់ទុកបណ្តោះអាសន្ននៅទីតាំងស្តុកចែកចាយនោះ និងបញ្ជូនគំរូមួយចំនួនមកនាយកដ្ឋានមន្ទីរពិសោធន៍នៃអគ្គនាយកដ្ឋាន ក.ប.ប. ដើម្បីធ្វើតេស្តវិភាគស្វែងរកសារធាតុគីមីហាមឃាត់នានា។
ក្នុងប្រតិបត្តិការនេះដែរ មន្ត្រីជំនាញបានរកឃើញ និងដកហូតបង្គាមានចាក់សារធាតុចាហ៊ួយ (CMC) នៅលើក្បាលបង្គាចំនួន ៤៧,៥ គីឡូក្រាម នៅទីតាំងដដែល ចំណែកឯម្ចាស់ទីតាំងត្រូវបានអញ្ជើញមកបំភ្លឺនៅសាខា ក.ប.ប. រាជធានីភ្នំពេញ៕