អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» បានរៀបចំសិក្ខាសាលា បណ្តុះបណ្តាលដល់មន្ត្រីរបស់ខ្លួនប្រចាំនៅខេត្តមណ្ឌលគិរី ដើម្បីពង្រឹងសមត្ថភាពបន្ថែម និងលើកទិសដៅអនុវត្តការងារបន្ត។
ក.ប.ប. សហការជាមួយទីភ្នាក់ងារកិច្ចសហប្រតិបត្តិការអាល្លឺម៉ង់ (GIZ) បានរៀបចំសិក្ខាសាលាស្ដីពី «ការពង្រឹងកិច្ចសហប្រតិបត្តិការដើម្បីធានានូវវឌ្ឍនភាពការងារ» កាលពីថ្ងៃទី ១១ ខែកុម្ភៈនេះ ក្រោមអធិបតីលោក ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប. និង លោក Frank Jettke ប្រធានក្រុមការងារអាស៊ាននៃទីភ្នាក់ងារកិច្ចសហប្រតិបត្តិការអាល្លឺម៉ង់ (GIZ) ក្រោមការសម្របសម្រួលដោយនាយកដ្ឋានកិច្ចការប្រកួតប្រជែង និងនាយកដ្ឋានកិច្ចការពារអ្នកប្រើប្រាស់។
ក.ប.ប. បានឱ្យដឹងថា សិក្ខាសាលានេះមានគោលបំណងពិនិត្យ និងតាមដានលើវឌ្ឍនភាពនៃការអនុវត្តគម្រោង COMPETE និង PROTECT រវាងអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» និងទីភ្នាក់ងារកិច្ចសហប្រតិបត្តិការអាល្លឺម៉ង់ (GIZ) ព្រមទាំងពិភាក្សាលើផែនការការងារសម្រាប់អនុវត្តបន្តក្រោមគម្រោងទាំង ២ ខាងលើនេះ។
ជាមួយគ្នានេះ ក្នុងសិក្ខាសាលានេះក៏មានបណ្ដុះបណ្ដាលលើជំនាញទន់ (ភាពជាអ្នកដឹកនាំ) ដល់សិក្ខាកាមទាំងអស់ដែលបានចូលរួមផងដែរ៕