រដ្ឋមន្ត្រីក្រសួងមហាផ្ទៃលោក ស ខេង បានណែនាំដល់អាជ្ញាធរមានសមត្ថកិច្ចចុះទៅកាន់មូលដ្ឋានប្រជាពលរដ្ឋ ជាពិសេសត្រូវរួមគ្នាដោះស្រាយបញ្ហា ដោយគ្មានការលាក់លៀម និងត្រូវបន្តផ្តល់សេវាសាធារណៈឱ្យមានប្រសិទ្ធភាព ដោយមិនប្រកាន់និន្នាការនយោបាយឡើយ។
ការណែនាំនេះ ត្រូវបានធ្វើឡើងខណៈរដ្ឋមន្ត្រីក្រសួងមហាផ្ទៃលោក ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តព្រៃវែង និងបាត់ដំបងបានអញ្ជើញជាអធិបតីកិច្ចប្រជុំបូកសរុបសកម្មភាពការងារប្រចាំឆ្នាំ ២០២១ លើកទិសដៅការងារឆ្នាំ ២០២២ របស់គណៈកម្មាធិការគណបក្សខេត្តព្រៃវែង ប្រារព្ធនៅមន្ទីរគណបក្សប្រជាជនកម្ពុជា ខេត្តព្រៃវែង កាលពីថ្ងៃទី ១២ ខែកុម្ភៈនេះ។
នាឱកាសនោះលោកបានណែនាំថា៖ «កិច្ចការបន្តចាប់ពីពេលនេះទៅការប្រមូលផ្ដុំគ្នាចុះទៅកាន់មូលដ្ឋានប្រជាពលរដ្ឋ ជាពិសេសចូលរួមផ្ដល់ការគាំទ្រដល់បេក្ខជន បេក្ខនារីក្រុមប្រឹក្សាឃុំសង្កាត់របស់គណបក្សឱ្យធ្វើសកម្មភាពនានានៅមូលដ្ឋានគឺជាអាទិភាព ហើយទន្ទឹមនឹងនេះត្រូវរួមគ្នាប្រមូលបញ្ហាប្រឈមនៅមូលដ្ឋានមកដោះស្រាយ ដោយគ្មានការលាក់លៀម ខិតខំផ្ដល់សេវាសាធារណៈជូនប្រជាពលរដ្ឋល្អដោយមិនប្រកាន់និន្នាការនយោបាយ ធ្វើអំពើល្អដោយការមិនរំលោភអំណាច មិនបំពានសិទ្ធិ សេរីភាពប្រជាពលរដ្ឋ និងត្រូវពង្រឹងគុណភាពសមាជិកមានស្រាប់ ព្រមទាំងពង្រីកសមាជិកថ្មីបន្ថែម»។
លោកក៏បានណែនាំដល់មន្ត្រីឱ្យអនុវត្តផែនការគោលនយោបាយដែលមានស្រាប់ រួមមានត្រូវបន្តអនុវត្តកំណែទម្រង់វិមជ្ឈការ និងវិសហមជ្ឈការ ការអនុវត្តគោលនយោបាយភូមិ ឃុំ សង្កាត់មានសុវត្ថិភាព បញ្ហាគ្រោះថ្នាក់ចរាចរណ៍ ការដោះស្រាយទំនាស់ក្រៅប្រព័ន្ធតុលាការ ការប្រយុទ្ធប្រឆាំងគ្រឿងញៀន រួមទាំងការស្ដារនីតិសម្បទាអ្នកញៀនគ្រឿងញៀន។
ជាពិសេសនោះ លោក ស ខេង ក៏បានជំរុញឱ្យអាជ្ញាធរបង្កើនការយកចិត្តទុកដាក់បញ្ហាគ្រឿងញៀន ហើយឪពុកម្ដាយ អាណាព្យាបាលត្រូវជួយទប់ស្កាត់ក្រុមគ្រួសារកុំឱ្យជាប់ពាក់ព័ន្ធនឹងគ្រឿងញៀន៕