បាត់ដំបងៈ មនុស្សចំនួន ៤ នាក់ក្នុងនោះមានស្រីម្នាក់ និងក្មេងម្នាក់ ស្លាប់នៅកន្លែងកើតហេតុ និងមនុស្សប្រុស-ស្រី ៩ នាក់ទៀតរបួសធ្ងន់ស្រាលក្នុងគ្រោះថ្នាក់ចរាចរណ៍រថយន្តចុះចំណោតបុកម៉ូតូ ១ គ្រឿង ដែលកើតឡើង នៅចំណុចទួលចំណោតភ្នំព្រឹក ក្នុងភូមិថ្នល់បត់ ឃុំអូររំដួល ស្រុកភ្នំព្រឹក ខេត្តបាត់ដំបងនៅព្រឹកថ្ងៃទី ១៣ កុម្ភៈ។
លោក ហេង បារាំង អធិការនគរបាលស្រុកភ្នំព្រឹក ប្រាប់នៅថ្ងៃទី ១៣ កុម្ភៈ ថា ជនរងគ្រោះស្លាប់ភាគីខាងម៉ូតូ ទី ១-ឈ្មោះញ៉ែម ធឿន ភេទស្រី អាយុ ៦២ ឆ្នាំ ទី ២-ឈ្មោះហែល រ៉េត ភេទប្រុស អាយុ ៦៣ ឆ្នាំ ទី ៣-ឈ្មោះ ក្រៃ ភព ភេទប្រុស អាយុ ៣ ឆ្នាំ។ ពួកគេរស់នៅភូមិថ្នល់បត់ ឃុំអូររំដួល ស្រុកភ្នំព្រឹក ខេត្តបាត់ដំបង។ ចំណែកអ្នកបើកគោយន្តឈ្មោះ ញ៉ាញ់ ពៅ ភេទប្រុស អាយុ ៣៨ ឆ្នាំ (របួសធ្ងន់) រស់នៅភូមិកោះតូច ឃុំសំពៅលូន ស្រុកសំពៅលូន ខេត្តបាត់ដំបង។ រីឯបុរសម្នាក់ឈ្មោះ សុត វី អាយុ ៣៤ ឆ្នាំ ដែលជិះលើរថយន្ត ក៏បានស្លាប់នៅកន្លែងកើតហេតុ និងមានមនុស្សប្រុស-ស្រី ៩ នាក់ទៀត ដែលរួមដំណើរលើរថយន្តជាមួយគ្នាបានរងរបួសធ្ងន់ស្រាល។
លោកថ្លែងថា៖ «តាមអ្នកបើករថយន្តដែលរងរបួសនោះ គាត់ថាពេលបើកចុះចំណោតភ្នំព្រឹក គាត់ដាក់លេខមិនចូល។ ពេលនោះរថយន្តមានល្បឿនលឿនក៏ជ្រុលទៅបុកម៉ូតូទៅ»។
លោកអធិការរៀបរាប់តាមសាក្សីនៅកន្លែងកើតហេតុថា នៅវេលាម៉ោងជាង ៨ ព្រឹកថ្ងៃទី ១៣ កុម្ភៈ មានរថយន្តកែច្នៃ ១ គ្រឿងដឹកដំឡូងមី បើកបរដោយបុរសម្នាក់ឈ្មោះ ញ៉ាញ់ ពៅ បើកបរក្នុងទិសដៅពីជើង ទៅត្បូង ធ្វើដំណើរពីស្រុកសំពៅលូនមកស្រុកភ្នំព្រឹក។ លុះបើកដល់ចំណុចកើតហេតុពេលកំពុងចុះចំណោតពីលើភ្នំព្រឹក ស្រាប់តែគេឃើញរថយន្តកែច្នៃ ១ គ្រឿងនោះរេចង្កូតក្នុងល្បឿនលឿន ជ្រុលទៅបុកម៉ូតូ ១ គ្រឿងទៀត បើកបរក្នុងទិសដៅស្របទិសគ្នា បុករះស្លាប់ភ្លាមៗ នៅកន្លែងកើតហេតុតែម្តង បន្ទាប់មកទើបរថយន្តក្រឡាប់។
លោកបញ្ជាក់ថា ភ្លាមៗ ក្រោយកើតហេតុ សមត្ថកិច្ចនគរបាលស្រុកភ្នំព្រឹកបានហៅរថយន្តសង្គ្រោះបន្ទាន់ដឹកជនរងគ្រោះទៅសង្គ្រោះបន្ទាន់នៅមន្ទីរពេទ្យបង្អែកស្រុកភ្នំព្រឹក និងអ្នករបួសខ្លះទៀតត្រូវបានដឹកទៅព្យាបាលនៅមន្ទីរពេទ្យផ្សេងទៀត។ ចំពោះការពាក់ព័ន្ធផ្នែកផ្លូវច្បាប់យ៉ាងណានោះ សមត្ថកិច្ចនឹងមានចំណាត់ការបន្តទៀត ព្រោះពេលនេះសមត្ថកិច្ចជំនាញកំពុងធ្វើការវាស់វែងទីតាំងកើតហេតុរកខុសត្រូវ ខណៈអ្នកបើកបររថយន្តបង្កគ្រោះថ្នាក់ម្នាក់នោះ ក៏កំពុងសង្គ្រោះនៅមន្ទីរពេទ្យដែរ៕